This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
നാഡീസ്രവം
സര്‍വ്വവിജ്ഞാനകോശം സംരംഭത്തില്‍ നിന്ന്
നാഡീസ്രവം
Neuro Secretion
ചില നാഡീകോശങ്ങള്‍ ഉത്പാദിപ്പിക്കുന്ന സ്രവം. ഇത് പൊതുവേ ന്യൂറോ ഹോര്‍മോണ്‍ എന്ന പേരില്‍ അറിയപ്പെടുന്നു. ന്യൂറോ ഹോര്‍മോണ്‍ സ്രവിപ്പിക്കുന്ന നാഡീകോശങ്ങളെ ന്യൂറോ സെക്രീറ്ററി കോശങ്ങള്‍ എന്നു വിളിക്കുന്നു. കശേരുകികളുടെ തലച്ചോറിലെ ഹൈപ്പോതലാമസ് എന്ന ഭാഗത്താണ് ന്യൂറോ സെക്രീറ്ററി കോശങ്ങളുടെ ആധിക്യം ഏറ്റവും കൂടുതല്‍ നിര്‍ണയിച്ചിട്ടുള്ളത്. മിക്ക ജന്തുക്കളിലും ന്യൂറോ ഹോര്‍മോണുകള്‍, ഉപാപചയം, വളര്‍ച്ച, പ്രത്യുത്പാദനം തുടങ്ങിയ പ്രവര്‍ത്തനങ്ങളെ സഹായിക്കുകയും നിയന്ത്രിക്കുകയും ചെയ്യുന്നു.
നാഡീസ്രവം അഥവാ ന്യൂറോ ഹോര്‍മോണുകള്‍ രാസപരമായി കുറഞ്ഞ തന്മാത്രാ ഭാരമുള്ള പ്രോട്ടീനുകളോ അല്ലെങ്കില്‍ പെപ്റ്റൈഡുകളോ ആണ്. കണികകളുടെ രൂപത്തില്‍ കാണപ്പെടുന്ന ഇവയ്ക്ക് 100-300 നാനോമീറ്റര്‍ വ്യാസമുണ്ടായിരിക്കും. ഈ കണികകള്‍ നേര്‍ത്ത ഒരു സ്തരം കൊണ്ട് ആവരണം ചെയ്യപ്പെട്ടിരിക്കുന്നു.
നാഡീസ്രവം, നാഡീകോശ ശരീരത്തിനുള്ളിലാണ് ഉത്പാദിപ്പിക്കപ്പെടുന്നത്. കോശശരീരത്തിനുള്ളിലെ എന്‍ഡോ പ്ളാസ്മിക ജാലികയാണ് ഇവയുടെ നിര്‍മാണത്തിന് സഹായകരമാകുന്നത്. ഉത്പാദിപ്പിക്കപ്പെട്ട ശേഷം ഈ കണികകള്‍ നാഡീകോശത്തിന്റെ ആക്സോണിലൂടെ സഞ്ചരിച്ച് അതിന്റെ അഗ്രഭാഗത്തെത്തുകയും അവിടെ സംഭരിക്കപ്പെടുകയും ചെയ്യുന്നു. വിവിധതരം ചോദനകള്‍ക്കനുസൃതമായി ന്യൂറോ സെക്രീറ്ററി കോശങ്ങള്‍ ഉത്തേജിപ്പിക്കപ്പെടുമ്പോള്‍ ഈ കണികകള്‍ കോശത്തിന് വെളിയിലേക്ക് പുറന്തള്ളപ്പെടുന്നു. തുടര്‍ന്ന്, കണികകളെ ആവരണം ചെയ്തിരിക്കുന്ന സ്തരം എക്സോസൈറ്റോസിസ് (Exocytosis) എന്ന പ്രവര്‍ത്തനഫലമായി, പൊട്ടുകയും ഉള്ളിലുള്ള സ്രവം ബഹിര്‍ഗമിക്കുകയും ചെയ്യുന്നു. ഉയര്‍ന്നതരം കശേരുകികളില്‍, നാഡീസ്രവം രക്തക്കുഴലുകളിലൂടെ നിശ്ചിത അവയവത്തിലെത്തിച്ചേരുന്നു. എന്നാല്‍ താണതരം കശേരുകികളില്‍ ഇവ വ്യാപിക്കല്‍ (diffusion) വഴിയാണ് ലക്ഷ്യത്തിലെത്തുന്നത്.
