സര്‍വ്വവിജ്ഞാനകോശം സംരംഭത്തില്‍ നിന്ന്
ദീദൊ
Dido
ഗ്രീക്ക് ഇതിഹാസ കഥാപാത്രം.
ഐതിഹ്യപ്രകാരം ഉത്തരാഫ്രിക്കയിലെ പ്രാചീന പട്ടണമായ കാര്‍ത്തേജ് സ്ഥാപിച്ചത് ദീദൊ ആയിരുന്നു. ഫിനീഷ്യന്‍ പട്ടണമായ ടൈറിലെ രാജാവായ ബെലസിന്റെ പുത്രിയായി ജനിച്ച ദീദൊയുടെ യഥാര്‍ഥനാമം എലിസ്സ എന്നായിരുന്നു. എലിസ്സയുടെ സഹോദരന്‍ സ്വത്തിനായി ഇവരുടെ ഭര്‍ത്താവിനെ വധിച്ചതിനെത്തുടര്‍ന്ന് അനുയായികള്‍ക്കൊപ്പം ആഫ്രിക്കന്‍ തീരത്തേക്കു പലായനം ചെയ്യാന്‍ ഇവര്‍ നിര്‍ബന്ധിതയായി. ആഫ്രിക്കയുടെ വടക്കന്‍തീരത്ത് എത്തിയ എലിസ്സ അവിടത്തെ രാജാവായ ഇര്‍ബാസില്‍നിന്നു വാങ്ങിയ സ്ഥലത്തു സ്ഥാപിച്ച പട്ടണമായിരുന്നു കാര്‍ത്തേജ്. കാര്‍ത്തേജിന്റെ രാജ്ഞിയായ ഇവര്‍ ദീദൊ എന്ന പേരിലറിയപ്പെട്ടു. ദീദൊയോട് ഇര്‍ബാസ് നടത്തിയ വിവാഹാഭ്യര്‍ഥന നിരസിച്ചതില്‍ പ്രകോപിതനായ അദ്ദേഹം യുദ്ധഭീഷണി മുഴക്കിയതോടെ വിവാഹത്തിനു സമ്മതിക്കുവാന്‍ പ്രജകള്‍ ഇവര്‍ക്കുമേല്‍ സമ്മര്‍ദം ചെലുത്തി. എന്നാല്‍ പുനര്‍വിവാഹത്തിനു താത്പര്യമില്ലാതിരുന്ന ദീദൊ അഗ്നിയില്‍ ചാടി ജീവന്‍ വെടിയുകയാണുണ്ടായത്.
