This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ദശാവതാരങ്ങള്‍
സര്‍വ്വവിജ്ഞാനകോശം സംരംഭത്തില്‍ നിന്ന്
ദശാവതാരങ്ങള്‍
മനുഷ്യതിര്യഗ് യോനികളിലൂടെ ഈശ്വരന്‍ കൈക്കൊണ്ട പത്ത് ജന്മങ്ങള്‍. ലോകത്തെ അധര്‍മത്തില്‍നിന്നു രക്ഷിക്കാന്‍ മഹാവിഷ്ണു സ്വീകരിച്ച പത്ത് അവതാരങ്ങളാണ് ഇവ.
'മത്സ്യഃ കൂര്‍മ്മ വരാഹശ്ച
നരസിംഹശ്ച വാമനഃ
രാമോ രാമശ്ചരാമശ്ച
കൃഷ്ണഃകല്ക്കിര്‍ ജനാര്‍ദ്ദനഃ'
എന്നാണ് ദശാവതാരങ്ങളെപ്പറ്റി ദേവീഭാഗവതത്തില്‍ പരാമര്‍ശം വന്നിട്ടുള്ളത് എന്നു കാണുന്നു.
'യദാ യദാഹി ധര്‍മ്മസ്യ
ഗ്ലാനിര്‍ഭവതി ഭാരത
അഭ്യുത്ഥാനമധര്‍മസ്യ
തദാത്മാനം സൃജാമ്യഹം' (കഢ7)
(ധര്‍മം ക്ഷയിക്കുമ്പോഴും അധര്‍മം വര്‍ധിക്കുമ്പോഴും ഞാന്‍ വിവിധ രൂപത്തില്‍ ആവിര്‍ഭവിക്കും) എന്നാണ് ശ്രീമദ് ഭഗവദ്ഗീതയില്‍ ശ്രീകൃഷ്ണന്‍ അര്‍ജുനനോട് ഉപദേശിച്ചിട്ടുള്ളത്.
ദശാവതാരങ്ങള്‍ മത്സ്യം, കൂര്‍മം, വരാഹം, നരസിംഹം, വാമനന്‍, പരശുരാമന്‍, ശ്രീരാമന്‍, ബലരാമന്‍, ശ്രീകൃഷ്ണന്‍, കല്ക്കി എന്നിവയാണ്. എന്നാല്‍ ബലരാമനെ മഹാവിഷ്ണുവിന്റെ തല്പമായ അനന്തന്റെ അവതാരമായി കരുതുന്നവര്‍ എട്ടാമത്തെ അവതാരമായി ശ്രീകൃഷ്ണനെയും ഒന്‍പതാമത്തെ അവതാരമായി ശ്രീബുദ്ധനെയും സ്വീകരിക്കുന്നു (മലയാളമഹാനിഘണ്ടു).
ബലരാമനെയും ബുദ്ധനെയും ദശാവതാരങ്ങളില്‍ ഉള്‍ക്കൊള്ളിക്കുന്നവര്‍ ശ്രീകൃഷ്ണനെ വിഷ്ണുവിന്റെ പൂര്‍ണാവതാരമായ മൂര്‍ത്തിമദ്ഭാവമായി കരുതുന്നു (ശബ്ദകല്പദ്രുമം).
ദശാവതാരങ്ങളില്‍ ആദ്യത്തെ നാലെണ്ണം കൃതയുഗത്തിലും പിന്നീടുള്ള മൂന്നെണ്ണം ത്രേതായുഗത്തിലും എട്ടും ഒന്‍പതും ദ്വാപരയുഗത്തിലും പത്താമത്തേത് കലിയുഗത്തിലും എന്ന ക്രമത്തിലാണ് പുരാണപരാമര്‍ശങ്ങള്‍ കാണപ്പെടുന്നത്. നോ: അവതാരങ്ങള്‍, കൃഷ്ണന്‍, കല്ക്കി
