This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ട്രൈക്ക്രോയിസം
സര്‍വ്വവിജ്ഞാനകോശം സംരംഭത്തില്‍ നിന്ന്
ട്രൈക്ക്രോയിസം
Trichroism
പ്രകാശപരമായി അസമദിശീയ (anisotorpic) സുതാര്യ ക്രിസ്റ്റലുകളില്‍ക്കൂടി ധവളപ്രകാശം കടന്നുപോകുമ്പോള്‍ ആഗിരണം ചെയ്യപ്പെട്ട് വ്യത്യസ്ത നിറങ്ങളായി കാണപ്പെടുന്ന പ്രതിഭാസം. ഈ സ്വഭാവവിശേഷം പ്രകടമാക്കുന്ന ക്രിസ്റ്റലുകളെ ട്രൈക്ക്രോയിക് ക്രിസ്റ്റലുകള്‍ എന്നു പറയുന്നു. ഉദാ. കോര്‍ഡിയെറൈറ്റ് (cordierite). ഇത്തരം ക്രിസ്റ്റലുകളുടെ ക്യൂബിന്റെ മൂന്നു ജോടി വശങ്ങളില്‍ക്കൂടിയും വ്യത്യസ്ത നിറങ്ങളിലാണ് പ്രകാശം സഞ്ചരിക്കുന്നത്.
രണ്ടു പ്രാകാശിക അക്ഷങ്ങളുള്ള ദ്വി-അക്ഷീയ (bizxial)ക്രിസ്റ്റലുകളിലാണ് ട്രൈക്ക്രോയിസം കാണപ്പെടുന്നത്. ഇത്തരം ക്രിസ്റ്റലുകള്‍ക്ക് മൂന്നു മുഖ്യ അപവര്‍ത്തനാങ്കങ്ങള്‍ ഉണ്ടായിരിക്കും. പ്രകാശത്തിന്റെ ധ്രുവണത്തിന്റെ (polarization) ദിശ അനുസരിച്ച് ഓരോ നിറവും ആഗിരണം ചെയ്യപ്പെടുകയോ മന്ദനം ചെയ്യപ്പെടുകയോ ചെയ്യുന്നു. പ്രകാശത്തിന്റെ കമ്പനം, അപവര്‍ത്തനാങ്കമനുസരിച്ച് X - ദിശയിലാണെങ്കില്‍ പ്രകാശം മഞ്ഞ നിറത്തിലും Y ദിശയിലാണെങ്കില്‍ തീവ്ര വയലറ്റ് നിറത്തിലും Z ദിശയിലാണെങ്കില്‍ വെള്ള നിറത്തിലും കാണപ്പെടും.
ക്രിസ്റ്റല്‍ അക്ഷങ്ങളുടെ അഭിവിന്യാസം (orientation) അനുസരിച്ച് അതില്‍ക്കൂടി കടന്നുവരുന്ന പ്രകാശത്തിന്റെ നിറം മാറ്റിയെടുക്കാം. അതിനു തക്ക രീതിയില്‍ ക്രിസ്റ്റലുകള്‍ മുറിച്ചെടുക്കാനും ഇന്നു കഴിയുന്നുണ്ട്. ഈ കാരണത്താല്‍ ട്രൈക്ക്രോയിസം എന്ന പ്രയോഗമോ പകരമായി ഉപയോഗിച്ചുവന്ന പ്ലിയോക്രോയിസം (pleochroism) എന്ന പദമോ ഇന്ന് പ്രചാരത്തിലില്ല. ഇവയ്ക്കു പകരം രേഖീയ (linear) ഡൈക്ക്രോയിസം, വൃത്തീയ (circular) ഡൈക്ക്രോയിസം എന്നിങ്ങനെ വിവേചിച്ച് പ്രയോഗിക്കുകയാണ് പതിവ്. നോ: ഡൈക്ക്രോയിസം
(ഡോ. വി. ഉണ്ണിക്കൃഷ്ണന്‍ നായര്‍)
