This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.

Reading Problems? see Enabling Malayalam

ഘനവാദ്യങ്ങള്‍

സര്‍വ്വവിജ്ഞാനകോശം സംരംഭത്തില്‍ നിന്ന്

ഘനവാദ്യങ്ങള്‍

താളവാദ്യങ്ങളില്‍ ഒരു വിഭാഗം. പുരാതനകാലത്ത് മനുഷ്യന്‍ തന്റെ ഇരുകൈകളും തട്ടി ശബ്ദമുണ്ടാക്കി. അതിനുശേഷം കമ്പുകളും, കല്ലുകളും മറ്റും ഈ കാര്യത്തിന് അവര്‍ ഉപയോഗിച്ചു. സ്വരങ്ങള്‍ പുറപ്പെടുവിക്കാന്‍ കഴിയുന്ന കല്‍ത്തൂണുകള്‍ പല ക്ഷേത്രങ്ങളിലും കാണാം. ഹംപി (കര്‍ണാടക), ലേപാക്ഷി (ആന്ധ്ര), മധുര, തിരുനെല്‍വേലി, അളഗര്‍കോവില്‍, ആള്‍വാര്‍ തിരുനഗരി, ശുചീന്ദ്രം തുടങ്ങിയവ ഉദാഹരണങ്ങള്‍. അസമില്‍ പഴയകാലത്ത് ഉപയോഗിച്ചിരുന്നതായി പറയപ്പെടുന്ന 'ടൊക്ക' എന്ന വാദ്യം ഘനവാദ്യമാണ്. രാജസ്ഥാന്‍ നാടോടി സംഗീതത്തിലുപയോഗിക്കുന്ന ശ്രീമണ്ഡല്‍ എന്ന സംഗീതോപകരണത്തിനു ഘനവാദ്യം എന്നു പറയാം. ഭജന്‍, നാടോടി ഗാനങ്ങള്‍ എന്നിവ പാടുമ്പോള്‍ വടക്കേ ഇന്ത്യയുടെ പല ഭാഗങ്ങളിലും ഉപയോഗിക്കുന്ന ഒരു വാദ്യമാണ് ചിംട. പിത്തളയില്‍ നിര്‍മിച്ച ഘനമുള്ള രണ്ട് വട്ടത്തകിടുകള്‍ തമ്മില്‍ അടിച്ച് ശബ്ദമുണ്ടാക്കുന്ന ജാലറ ഒരു ഘനവാദ്യമാണ്. ഇവയ്ക്ക് ജല്ലാരി, കര്‍താല്‍, ഇലത്താളം, കുഴിത്താളം എന്നീ പേരുകളുമുണ്ട്. ഇവയില്‍ത്തന്നെ ആകൃതിയില്‍ വലുപ്പമുള്ളവയ്ക്ക് ബ്രഹ്മതാളം എന്നു പേരുണ്ട്. മണ്ണുകൊണ്ട് പ്രത്യേകരീതിയില്‍ നിര്‍മിക്കുന്ന കുടം നാടോടി സംഗീതത്തിലും, കര്‍ണാടക സംഗീതത്തിലും ഉപയോഗിക്കുന്നു. നാടോടി സംഗീതത്തില്‍ ഉപയോഗിക്കുന്ന കുടം ലോഹംകൊണ്ടും, മണ്ണുകൊണ്ടും നിര്‍മിക്കുന്നു. ഇവ മക്ടി, നൂട് എന്നീ പേരുകളില്‍ ആണ് അറിയപ്പെടുന്നത്. നൂട് എന്ന വാദ്യം കാശ്മീര്‍, സിന്ധ് എന്നീ പ്രദേശങ്ങളില്‍ കാണുന്നു. പൊതുവേ, ഘനവാദ്യങ്ങള്‍ ഉപയോഗിക്കുന്നത് കൂടുതലായും നാടോടി സംഗീതത്തിലാണ് എന്നു കാണാം. കര്‍ണാടകസംഗീതത്തിന് ഒഴിച്ചുകൂടാനാവാത്തതാണ് ഗമകം. ഘനവാദ്യങ്ങളില്‍ ഗമകത്തിന് യാതൊരു സ്ഥാനവുമില്ല. ഇവയ്ക്ക് ഘനവാദ്യങ്ങള്‍ പ്രയോഗിക്കാന്‍ കഴിയില്ല എന്നതുതന്നെ കാരണം. അതുകൊണ്ടുതന്നെ കര്‍ണാടക സംഗീതക്കച്ചേരികളില്‍ ഘനവാദ്യങ്ങള്‍ ഉപയോഗിക്കുന്നില്ല.

(പ്രൊഫ. എം.കെ. മോഹനചന്ദ്രന്‍)

താളിന്റെ അനുബന്ധങ്ങള്‍
സ്വകാര്യതാളുകള്‍