This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.

Reading Problems? see Enabling Malayalam

ഗോപാല്‍സിങ് റാവു (1872 - 1939)

സര്‍വ്വവിജ്ഞാനകോശം സംരംഭത്തില്‍ നിന്ന്

ഗോപാല്‍സിങ് റാവു (1872 - 1939)

വിപ്ലവകാരിയായ ഒരു സ്വരാജ്യ സ്നേഹി. രാജപുത്താനയിലെ ഖര്‍വായില്‍ 1872-ല്‍ ഗോപാല്‍സിങ് റാവു ജനിച്ചു. അജ്മീറിലുള്ള മേയോ കോളജില്‍ വിദ്യാഭ്യാസം പൂര്‍ത്തിയാക്കി. റാവു മാധവ്സിങ്ങിനെ പിന്തുടര്‍ന്ന് ഗോപാല്‍സിങ് ഖര്‍വാ സ്റ്റേറ്റിന്റെ ഭരണാധികാരിയായി. രാഷ്ട്രീയ, സാമൂഹ്യ പ്രശ്നങ്ങളിലുള്ള വീക്ഷണത്തില്‍ ആര്യ സമാജിന്റെ സ്വാധീനശക്തി പ്രകടമായിരുന്നു. 1897-ല്‍ ബ്രിട്ടീഷുകാര്‍ തന്റെ അയല്‍ സംസ്ഥാനമായ മസുദ (Masuda) കീഴടക്കാന്‍ ശ്രമിച്ചപ്പോള്‍ അവരുമായി ഏറ്റുമുട്ടി. 1898-ല്‍ ബനാറസിലെ ഭാരത് ധര്‍മ മഹാമണ്ഡലില്‍ അംഗമായി. വിപ്ലവകാരികള്‍ക്കു വെടിക്കോപ്പുകളും ആളും നല്കി സഹായിച്ചതിന്റെപേരില്‍ 1915-ല്‍ ഡിഫന്‍സ് ഒഫ് ഇന്ത്യാ റൂള്‍ പ്രകാരം ഇദ്ദേഹത്തെ അറസ്റ്റ് ചെയ്ത് ആജ്മീറിലുള്ള റ്റോഡ്ഗാറില്‍ തടവിലാക്കി. രണ്ടാഴ്ചയ്ക്കുശേഷം രക്ഷപ്പെട്ടെങ്കിലും വീണ്ടും ആറു വര്‍ഷം തടവില്‍ കഴിയേണ്ടിവന്നു. ഇദ്ദേഹത്തെ റ്റോഡ്ഗാറില്‍ താമസിപ്പിക്കുന്നത് സുരക്ഷിതമല്ലെന്നുകണ്ട് 1818-ലെ മൂന്നാം റെഗുലേഷന്‍ പ്രകാരം ഉത്തര്‍പ്രദേശിലെ റ്റില്‍ഹുമിലേക്കു മാറ്റി. 1920-ല്‍ ജയില്‍ വിമുക്തനായ ഗോപാല്‍ സിങ് ഒന്നാം ഡല്‍ഹി, ആജ്മീര്‍, മിര്‍വാര പ്രൊവിന്‍ഷ്യല്‍ കോണ്‍ഫറന്‍സുകളുടെ അധ്യക്ഷസ്ഥാനം വഹിച്ചു. ഒരു എഴുത്തുകാരന്‍ കൂടിയായിരുന്ന ഗോപാല്‍സിങ് നിരവധി പത്രങ്ങളില്‍ എഴുതിയിട്ടുണ്ട്. ഒരു വിപ്ലവകാരി, രാജ്യസ്നേഹി, ജനസ്നേഹി എന്നീ നിലകളില്‍ ഇന്നും രാജസ്ഥാനിലെ ജനങ്ങള്‍ ഗോപാല്‍സിങ്ങിനെ സ്മരിക്കുന്നു.

(പി. സുഷമ)

താളിന്റെ അനുബന്ധങ്ങള്‍
സ്വകാര്യതാളുകള്‍