This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഗെറ്റിസ്ബര്‍ഗ്
സര്‍വ്വവിജ്ഞാനകോശം സംരംഭത്തില്‍ നിന്ന്
ഗെറ്റിസ്ബര്‍ഗ്
Gettysburg
അമേരിക്കന്‍ ഐക്യനാടുകളിലെ ദക്ഷിണ പെന്‍സില്‍വേനിയയിലുള്ള ഒരു ചെറുപ്രവിശ്യ. സ്വയംഭരണാധികാരമുള്ള ഒരു നഗരമാണിത് (borough). അമേരിക്കന്‍ പ്രസിഡന്റ് ഏബ്രഹാം ലിങ്കണ്‍ 1863-ല്‍ നടത്തിയ സുപ്രസിദ്ധമായ പ്രസംഗംമൂലം ഈ സ്ഥലം അവിസ്മരണീയമാക്കപ്പെട്ടു. 'ഗെറ്റിസ്ബര്‍ഗ് അഡ്രസ്' എന്നാണ് ഈ പ്രസംഗം അറിയപ്പെടുന്നത്.
രണ്ടേകാല്‍ ച.കി.മീ. വിസ്തൃതിയിലുള്ള ഒരു താഴ്വരയില്‍ സ്ഥിതിചെയ്യുന്ന ഈ പട്ടണം സമുദ്രനിരപ്പില്‍ നിന്ന് 170 മീറ്ററിലേറെ ഉയരത്തിലാണ്. ഗെറ്റിസ്ബര്‍ഗിനെ ചുറ്റി ഫലസമൃദ്ധമായ കൃഷിയിടങ്ങളും മനോഹരമായ നാട്ടിന്‍പുറവും ഉണ്ട്. ജേംസ് ഗെറ്റിസ് എന്ന സ്ഥലമുടമയുടെ സ്മരണയ്ക്കായാണ് ഈ സ്ഥലത്തിന് ഗെറ്റിസ്ബര്‍ഗ് എന്നു പേരു നല്കിയത്. 1780-ഓടെ ഇവിടെ ജനാധിവാസം തുടങ്ങി. 1800 ആയപ്പോഴേക്കും ആഡംസ് കൗണ്ടിയുടെ കേന്ദ്രനഗരമെന്ന പദവിയും ഗെറ്റിസ്ബര്‍ഗിന് കൈവന്നു. സ്വയംഭരണത്തിനുള്ള അധികാരം ഗെറ്റിസ്ബര്‍ഗിന് ലഭിക്കുന്നത് 1806-ലാണ്. പെന്‍സില്‍വാനിയ കോളജ് എന്ന് അതുവരെ അറിയപ്പെട്ടിരുന്ന വിദ്യാഭ്യാസ സ്ഥാപനം ഗെറ്റിസ്ബര്‍ഗ് കോളജ് എന്ന പേരില്‍ ലൂഥറന്‍ ബന്ധത്തോടെ ആരംഭിച്ചത് 1832-ലായിരുന്നു. ആണ്‍കുട്ടികളും പെണ്‍കുട്ടികളും ഒരുമിച്ചു വിദ്യ അഭ്യസിക്കുന്ന ഈ സ്ഥാപനം ഒരു ആര്‍ട്സ് കോളജാണ്. ദേശീയ ശ്മശാനവും ഗെറ്റിസ്ബര്‍ഗില്‍ത്തന്നെ. 1863 ന.-ല്‍ ഈ ശ്മശാനം രാഷ്ട്രത്തിനായി സമര്‍പ്പിക്കപ്പെട്ടു. ഈ സന്ദര്‍ഭത്തിലായിരുന്നു ലിങ്കണ്‍ അവിസ്മരണീയമായ ഗെറ്റിസ്ബര്‍ഗ് പ്രസംഗം ചെയ്തത്. അമേരിക്കന്‍ ആഭ്യന്തര യുദ്ധത്തിലെ നാഴികക്കല്ലുകളിലൊന്നായ 'ഗെറ്റിസ്ബര്‍ഗ് യുദ്ധം' നടന്നതും ഇവിടെവച്ചാണ്. 1863 ജൂല. 1-ന് ആരംഭിച്ച ഈ യുദ്ധം വെറും മൂന്നു ദിവസമേ നീണ്ടു നിന്നുള്ളൂ. 1895-ല്‍ ഈ പടനിലം ഒരു ദേശീയ സൈനിക ഉദ്യാനമായി മാറി.
