This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഗുമ
സര്‍വ്വവിജ്ഞാനകോശം സംരംഭത്തില്‍ നിന്ന്
ഗുമ
ലേബിയേറ്റ സസ്യകുലത്തില്‍പ്പെടുന്ന വാര്‍ഷിക ഓഷധി. ശാ.നാ. ലിയോനുരസ് സൈബീരിക്കസ് (Leonurus sibiricus). ബംഗാള്‍, ബിഹാര്‍, അസം, കര്‍ണാടക തുടങ്ങിയ സംസ്ഥാനങ്ങളില്‍ ധാരാളമായി വളരുന്നു. ഏകദേശം രണ്ടു മീറ്ററോളം ഉയരത്തില്‍ വളരുന്ന ഈ ചെടിയുടെ കാണ്ഡത്തിന് ചതുഷ്കോണാകൃതിയാണുള്ളത്. ഇലകള്‍ക്ക് 3.8-10 സെ.മീ. നീളമുണ്ടായിരിക്കും. ഇലകള്‍ കര്‍ണിതമാണ്. ഇലകളുടെ അടിഭാഗത്തെ പ്രധാനസിരകള്‍ വ്യക്തവും ലോമിലവുമായിരിക്കും. ഇലഞെടുപ്പിന് അഞ്ച് സെ.മീറ്ററോളം നീളമുണ്ടാകും.
ഇലകളുടെ കക്ഷ്യങ്ങളില്‍ നിന്നാണ് പുഷ്പങ്ങളുണ്ടാകുന്നത്. ഇവയ്ക്ക് 5 മി.മീ-ഓളം നീളമുള്ള സഹപത്രങ്ങളുണ്ട്. പുഷ്പങ്ങള്‍ക്ക് ഇളം ചുവപ്പുനിറമാണ്. 6-8 മി.മീ. നീളമുള്ള അഞ്ചു ബാഹ്യദളങ്ങളും 1.5 സെ.മീ. നീളമുള്ള അഞ്ചു ദളങ്ങളുമുണ്ട്. 2.5 മി.മീ. നീളം വരുന്ന ത്രികോണ (triquetrous) നട്ട്ലറ്റുകളാണ് ഫലങ്ങള്‍.
ചെടിയുടെ എല്ലാ ഭാഗങ്ങളും ഔഷധഗുണമുള്ളതാണ്. വേരിനും ഇലയ്ക്കും കയ്പുരസമാണ്. ല്യൂനറീന്‍ എന്നൊരു ആല്‍ക്കലോയിഡും കൊഴുപ്പും റസീനും അമ്ളവും ഈ ചെടിയില്‍ അടങ്ങിയിട്ടുണ്ട്.
