This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഖ്വാജാ അഹമ്മദ് ഫറൂക്കി
സര്‍വ്വവിജ്ഞാനകോശം സംരംഭത്തില്‍ നിന്ന്
ഖ്വാജാ അഹമ്മദ് ഫറൂക്കി
Khwaja Ahmad Farooqi (1917 - )
ഉര്‍ദുപണ്ഡിതനും സാഹിത്യനിരൂപകനും. ഉത്തര്‍പ്രദേശിലുള്ള മൊറാദാബാദ് ജില്ലയിലെ ബച്ച്റാവൂന്‍ ഗ്രാമത്തില്‍ 1917 ഒ. 30-ന് ജനിച്ചു. മീററ്റ് കോളജിലും ആഗ്രാ സര്‍വകലാശാലയിലും അഭ്യസിച്ച് പേര്‍ഷ്യനിലും ഉര്‍ദുവിലും എം.എ. ബിരുദവും, ഡല്‍ഹി സര്‍വകലാശാലയില്‍നിന്ന് ഗവേഷണബിരുദവും നേടി. ഡല്‍ഹി സര്‍വകലാശാലയിലെ ഉര്‍ദുവകുപ്പിന്റെ അധ്യക്ഷനായിരുന്നു. സ്കൂള്‍ ഒഫ് ഓറിയന്റല്‍ സ്റ്റഡീസില്‍ ഉര്‍ദു പ്രൊഫസര്‍ (1956), പശ്ചിമയൂറോപ്പില്‍ റോക്ക്ഫെല്ലര്‍ ഗവേഷകന്‍ (1956-58), ഡല്‍ഹി സര്‍വകലാശാലയിലെ ഭാഷാവിഭാഗത്തിന്റെ ഡീന്‍ എന്നീ നിലകളില്‍ സേവനമനുഷ്ഠിച്ചിട്ടുണ്ട്. ബ്രിട്ടനിലെ ദ് റോയല്‍ ഏഷ്യാറ്റിക് സൊസൈറ്റി വിശിഷ്ടാംഗത്വം നല്കി ഇദ്ദേഹത്തെ ആദരിച്ചു. ആന്ധ്ര, ഉത്തര്‍പ്രദേശ് സര്‍ക്കാരുകളുടെയും ഉര്‍ദു, മീര്‍ എന്നീ അക്കാദമികളുടെയും അവാര്‍ഡുകള്‍ ലഭിച്ചിട്ടുണ്ട്.
നിരൂപണം, തൂലികാചിത്രം, വിവര്‍ത്തനം എന്നീ വിഭാഗങ്ങളില്‍ നിരവധി കൃതികള്‍ ഫറൂക്കി രചിച്ചിട്ടുണ്ട്. ക്ലാസ്സിക്കല്‍ കവിയായ മീറിനെപ്പറ്റിയുള്ള മീര്‍ താകിമീര്‍-ഹയാത് ഔര്‍ ഷയിരി (1954) എന്ന പഠനഗ്രന്ഥത്തിന് 1957-ലെ സാഹിത്യ അക്കാദമി അവാര്‍ഡ് ലഭിച്ചു. മിര്‍സാഷാക്ക് ലഖ്നവി (1950), ക്ലാസ്സികി അദാബ് (1953), സാക്ക് ഒ ജസ്തൂജു (1967) തുടങ്ങിയവ വിമര്‍ശ ഗ്രന്ഥങ്ങളാണ്. യാദേ യാരി മിഹര്‍ബാന്‍ (1975, തൂലികാചിത്രം), കര്‍ബല്‍ കഥ (1966, ഫസ്ലിയുടെ കൃതികള്‍ എഡിറ്റു ചെയ്തത്), ദസ്താന്‍ബി (ഖാലിബ്സ് ഡയറി ഒഫ് ദി ഇന്ത്യന്‍ റിവോള്‍ട്ട് ഒഫ് 1857-ന്റെ വിവര്‍ത്തനം) എന്നിവയ്ക്കു പുറമേ ഇന്ത്യന്‍ സോഷ്യല്‍ ലൈഫ് എന്ന ഇംഗ്ലീഷ് കൃതിയും നയന്റീന്‍ത് സെഞ്ച്വറി എന്ന ഹിന്ദി കൃതിയും ഉണ്ട്.
