This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ക്രൂഗേഴ്സ്ഡോര്‍പ്
സര്‍വ്വവിജ്ഞാനകോശം സംരംഭത്തില്‍ നിന്ന്
ക്രൂഗേഴ്സ്ഡോര്‍പ്
Krugersdorp
തെക്കേ ആഫ്രിക്കയിലെ ട്രാന്‍സ്വാള്‍ പ്രവിശ്യയിലുള്ള ഖനനകേന്ദ്രമായ ഒരു പട്ടണം. ദക്ഷിണാഫ്രിക്കയിലെ ഏറ്റവും വലിയ നഗരമായ യോഹനസ് ബര്‍ഗില്‍ നിന്ന് 32 കി.മീ. വടക്കുപടിഞ്ഞാറായാണ് ഇതിന്റെ സ്ഥാനം. ജനസംഖ്യ: 3,78,821 (2011). വിറ്റ് വാട്ടേഴ്സ് റാന്‍ഡിലെ സ്വര്‍ണഖനന വ്യവസായത്തിന്റെ പ്രധാന കേന്ദ്രമാണ് ഇവിടം. സ്വര്‍ണംകൂടാതെ മാങ്ഗനീസ്-യുറേനിയം ശേഖരങ്ങളും ഇവിടെ സമൃദ്ധമായുണ്ട്. തെക്കേ ആഫ്രിക്കയിലെ അപ്രധാനമല്ലാത്ത ഒരു വ്യവസായകേന്ദ്രമായ ഈ പട്ടണത്തെ റോഡുവഴിയും റെയില്‍വഴിയും അയല്‍പ്രദേശങ്ങളുമായി ബന്ധിപ്പിച്ചിരിക്കുന്നു. ജനങ്ങളിലധികവും കൃഷിക്കാരാണെങ്കിലും ഒരു നല്ല പങ്ക് ഖനനവൃത്തിയിലും ഏര്‍പ്പെട്ടിട്ടുണ്ട്. ഖനനവുമായി ബന്ധപ്പെട്ട അനേകം ചെറുകിട വ്യവസായങ്ങളും ഇവിടെ അഭിവൃദ്ധിപ്പെട്ടുവരുന്നു.
ദക്ഷിണാഫ്രിക്കന്‍ രാജ്യതന്ത്രജ്ഞനായിരുന്ന സ്റ്റെഫാനസ് യോഹനസ് പോളസ് ക്രൂഗറിന്റെ ഓര്‍മയ്ക്കായാണ് 1887-ല്‍ സ്ഥാപിതമായ പട്ടണത്തിന് ക്രൂഗോഴ്സ്ഡോര്‍പ് എന്നുപേരു നല്കിയത്. ഇവിടത്തെ സുഖകരമായ കാലാവസ്ഥ ടൂറിസ്റ്റുകളെ ഇങ്ങോട്ടാകര്‍ഷിക്കുന്നുണ്ട്. സുലൂനേതാവായിരുന്ന ദിങ്ഗാനെതിരെ 1838-ല്‍ ഡച്ച് കുടിയേറ്റക്കാര്‍ നേടിയെടുത്ത വിജയത്തിന്റെ ഓര്‍മയ്ക്കായി ഇവിടെ ഒരു സ്മാരകം പണിതുയര്‍ത്തിയിട്ടുണ്ട്. പാര്‍ദേക്രാന്‍ മോണ്യുമെന്റ് എന്നറിയപ്പെടുന്ന ഇത് ഈ പട്ടണത്തിലെ പ്രധാനപ്പെട്ട ടൂറിസ്റ്റുകേന്ദ്രങ്ങളില്‍ ഒന്നാകുന്നു.
(എസ്. ഗോപിനാഥ്; സ.പ.)
