This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കുവൊ മൊജൊ (1892 - 1978)
സര്‍വ്വവിജ്ഞാനകോശം സംരംഭത്തില്‍ നിന്ന്
കുവൊ മൊജൊ (1892 - 1978)
Guo Moruo /Kuo Mo-Jo
ഒരു ചൈനീസ്‌ സാഹിത്യകാരനും ചരിത്രകാരനും. 1892-ല്‍ ചൈനയില്‍ ജനിച്ചു. ചെങ്‌ദുവിലെ വിദ്യാലയങ്ങളിലെ വിദ്യാഭ്യാസത്തിനുശേഷം 1913-ല്‍ ഇദ്ദേഹം ജപ്പാനിലെത്തി. 1914-ല്‍ ടോക്കിയോവിലെ ഫസ്റ്റ്‌ ഹയര്‍ സ്‌കൂളില്‍ വിദ്യാര്‍ഥിയായി പ്രവേശിച്ചു. 1915 മുതല്‍ 18 വരെ ഒകയാമയിലെ സിക്‌സ്‌ത്ത്‌ ഹയര്‍ സ്‌കൂളില്‍ പഠനം തുടര്‍ന്നു. 1916-ല്‍ സാടോ ടോമികോ എന്ന ജാപ്പനീസ്‌ യുവതിയെ വിവാഹം ചെയ്‌തു. 1918 മുതല്‍ 23 വരെ ഫുക്കുവൊക്കായിലെ ക്യൂഷൂ സര്‍വകലാശാലയില്‍ വൈദ്യപഠനം നടത്തി. ഇക്കാലത്ത്‌ ഇദ്ദേഹം വിദേശഭാഷകളിലും സാഹിത്യത്തിലും ഗഹനമായ പഠനങ്ങള്‍ നടത്തുകയുണ്ടായി. സ്‌പിനോസ, ഗൊയ്‌ഥെ, വാള്‍ട്ട്‌ വിറ്റ്‌മാന്‍, ടാഗൂര്‍ തുടങ്ങിയവരുടെ കൃതികളില്‍ ഇദ്ദേഹം സവിശേഷ താത്‌പര്യം പ്രകടിപ്പിച്ചു. 1921-ല്‍ നിരവധി മറ്റു ഭാഷാ രചനകളുടെ തര്‍ജുമകളും ഉള്‍പ്പെടുത്തിയ തന്റെ ആദ്യകവിതാസമാഹാരമായ നൂ-ഷെല്‍ പ്രസിദ്ധീകരിച്ചു. 1921-ല്‍ ത്തന്നെയാണ്‌ ഇദ്ദേഹം "ഛ്വാങ്‌-ഝാവൊഷെ' അഥവാ ക്രിയേഷന്‍ സൊസൈറ്റി എന്ന സാഹിത്യസംഘടന സ്ഥാപിക്കുന്നതിന്‌ മുന്‍കൈയെടുത്തത്‌. 1920-കളില്‍ ഇദ്ദേഹത്തിന്റെ രാഷ്‌ട്രീയ വീക്ഷണങ്ങളില്‍ വലിയ മാറ്റം സംഭവിച്ചു. ജനാധിപത്യ വീക്ഷണം കൈവെടിഞ്ഞ്‌ ഇദ്ദേഹം മാര്‍ക്‌സിസത്തിന്റെ അനുഭാവിയായി. അതോടെ ക്രിയേഷന്‍ സൊസൈറ്റിയുടെ പ്രവര്‍ത്തനത്തിലും മാറ്റമുണ്ടായി. അങ്ങനെ അത്‌ റൊമാന്റിസിസത്തില്‍ നിന്നു മാര്‍ക്‌സിസത്തിലേക്കുള്ള യുവചൈനീസ്‌ ബുദ്ധിജീവികളുടെ പരിവര്‍ത്തനത്തിന്റെ പ്രതിബിംബമായിത്തീര്‍ന്നു.
1927-ലെ "നന്‍ഛങ്‌' കലാപത്തില്‍ പങ്കെടുത്ത കുവൊ മൊജൊ അതിന്റെ പരാജയത്തെത്തുടര്‍ന്ന്‌ കൂമിന്‍താങ്‌ ദേശീയപാര്‍ട്ടി ഗവണ്‍മെന്റിന്റെ അറസ്റ്റില്‍ നിന്ന് രക്ഷനേടുവാന്‍ ജപ്പാനിലേക്കു പോയി. തുടര്‍ന്നു പത്തുവര്‍ഷക്കാലം സ്വതന്ത്രകൃതികളുടെ രചനയിലും പരിഭാഷയിലും വ്യാപൃതനായി ടോക്കിയോയുടെ പ്രാന്തമായ ഇച്ചിക്കാവയില്‍ താമസിച്ചു. 1937-ല്‍ ചൈനാ-ജപ്പാന്‍ യുദ്ധാരംഭത്തോടെ നാട്ടിലേക്കു മടങ്ങി ദേശസ്‌നേഹോത്തേജകമായ സാഹിത്യരചനയിലേര്‍പ്പെട്ടു. 1949-ല്‍ ജനകീയ ചൈനീസ്‌ റിപ്പബ്ലിക്‌ സ്ഥാപിതമായതോടെ ഇദ്ദേഹം അവിടത്തെ പ്രമുഖ വ്യക്തിയായിത്തീര്‍ന്നു. "ആള്‍ ചൈനാ ഫെഡറേഷന്‍ ഒഫ്‌ റൈട്ടേഴ്‌സ്‌ ആന്‍ഡ്‌ ആര്‍ട്ടിസ്റ്റ്‌സി'ന്റെ ചെയര്‍മാനായും ചൈനീസ്‌ അക്കാദമി ഒഫ്‌ സയന്‍സസിന്റെ പ്രസിഡന്റായും ഇദ്ദേഹം സേവനം അനുഷ്‌ഠിച്ചിട്ടുണ്ട്‌.
ഇദ്ദേഹത്തിന്റെ കൃതികളില്‍ ജാപ്പനീസ്‌ കഥകളുടെയും പാശ്ചാത്യ സാഹിത്യത്തിന്റെയും സ്വാധീനത തെളിഞ്ഞുകാണുന്നു. നൂ-ഷെന്‍ (1921), സിങ്കുങ്ങ്‌ (1923) എന്നീ കവിതാസമാഹാരങ്ങള്‍, കന്‍ലന്‍ (1926) എന്ന ലഘൂപന്യാസം, ലോ-യെഹ്‌ (1928) എന്ന ലഘുനോവല്‍ , ഛൂയ്യാന്‍ (1942), ത്‌സായ്‌ വെന്‍-ഛി (1959), വുത്‌സെ-ത്യന്‍ (1962), തിസിയതിസ്യാവൊ-ഷെങ്‌ തുടങ്ങിയ നാടകങ്ങളും ഗൊയ്‌ഥെയുടെ വെര്‍തേഴ്‌സ്‌ ലെയ്‌ഡന്റെ പരിഭാഷയും (1922) ഒന്‍പതു വാല്യങ്ങളിലായി പ്രസിദ്ധീകരിച്ച ആത്മകഥയുമാണ്‌ ഇദ്ദേഹത്തിന്റെ പ്രധാനകൃതികള്‍. 1978 ജൂണ്‍ 12-ന്‌ ഇദ്ദേഹം അന്തരിച്ചു.
