This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കുഡ്‌വാ, വി.എസ്‌. (1899 - 1967)
സര്‍വ്വവിജ്ഞാനകോശം സംരംഭത്തില്‍ നിന്ന്
കുഡ്‌വാ, വി.എസ്‌. (1899 - 1967)
കര്‍ണാടകത്തിലെ ഒരു വ്യവസായിപ്രമുഖനും സാഹിത്യ-സമുദായ പ്രവര്‍ത്തകനും. ശ്രീനിവാസ രാമചന്ദ്ര കുഡ്‌വായുടെ പുത്രനായി ദക്ഷിണ കര്‍ണാടകത്തിലെ മുല്‍ ക്കിയില്‍ 1899 ജൂണ്‍ 9-നു ജനിച്ചു. വിദ്യാഭ്യാസാനന്തരം അച്ഛനുമൊത്ത്‌ ഇരുമ്പു വ്യാപാരവും ഒരു എന്‍ജിനീയറിങ്‌ തൊഴില്‍ ശാലയും തുടങ്ങി. സുസജ്ജമായ ഒരു തൊഴില്‍ ശാല ജില്ലയില്‍ അത്തരത്തില്‍ ആദ്യത്തേതായിരുന്നു. വി. ശ്രീനിവാസക്കമ്മത്ത്‌ ആരംഭിച്ച കനറ പബ്ലിക്‌ കണ്‍വേയന്‍സ്‌ കമ്പനിയില്‍ 1926-ല്‍ കുഡ്‌വാ ചേര്‍ന്നു. 1932-ല്‍ ജനറല്‍ മാനേജരും 39-ല്‍ മാനേജിങ്‌ ഡയറക്‌ടറുമായി. അക്കാലത്ത്‌ യാത്രയ്‌ക്കും ചരക്കുകൈമാറ്റത്തിനും ഉപയുക്തമായ ഒരു സ്ഥാപനമാക്കി ഇദ്ദേഹം അതിനെ മാറ്റി. പിന്നീട്‌ യാത്രാവാഹനങ്ങള്‍ പ്രത്യേകം വിഭാഗമാക്കി. പോപ്പുലര്‍ മോട്ടോര്‍ സര്‍വീസ്‌, ദ ആദികാവേരി ബസ്‌ സര്‍വീസ്‌, കേന്ദ്ര കര്‍ണാടക മോട്ടോര്‍ സര്‍വീസ്‌ തുടങ്ങിയ യാത്രാവാഹന ശൃംഖലകൊണ്ട്‌ കുടക്‌, മൈസൂര്‍, മലബാര്‍, ദക്ഷിണകര്‍ണാടകം, ചിക്ക്‌മഗ്‌ലൂര്‍ എന്നീ പ്രദേശങ്ങളെ ബന്ധിപ്പിച്ചു. ബസ്‌ ഉടമകളെയെല്ലാം ഏകോപിപ്പിച്ച്‌ യാത്രക്കാര്‍ക്ക്‌ പരമാവധി സൗകര്യം നല്‌കുന്നതിന്‌ ഇദ്ദേഹം ശ്രദ്ധിച്ചു.
1939-ല്‍ കനറ സെയില്‍ സ്‌ കോര്‍പ്പറേഷന്‍ തുടങ്ങി. അതുവരെ ബോംബെയിലെയും മദ്രാസിലെയും വ്യാപാരകേന്ദ്രങ്ങളെ ആശ്രയിച്ചിരുന്ന തദ്ദേശീയര്‍ക്ക്‌ അതോടെ ഗുണമേന്മയുള്ള വാഹനയന്ത്രങ്ങളും യന്ത്രഭാഗങ്ങളും ന്യായവിലയ്‌ക്ക്‌ കിട്ടുമെന്നായി. 1947-ല്‍ മരപ്പണിയുള്‍പ്പെടെ ബസുകള്‍ മുഴുവന്‍ നിര്‍മിക്കുന്നതിനു പറ്റിയ കനറ വര്‍ക്ക്‌ഷോപ്‌സ്‌ ആരംഭിച്ചു. പിന്നീട്‌ അവിടെ യന്ത്രഭാഗങ്ങള്‍ നിര്‍മിക്കാനും തുടങ്ങി. ഇതു സംബന്ധിച്ചുള്ള വിദഗ്‌ധ പ്രവര്‍ത്തനങ്ങള്‍ നേരില്‍ ക്കണ്ടു മനസ്സിലാക്കാന്‍ 1951-ല്‍ കുഡ്‌വാ ഒരു ലോകപര്യടനം നടത്തുകയുണ്ടായി. തിരിച്ചുവന്ന ഇദ്ദേഹം സ്ഥാപിച്ച സങ്കരസ്റ്റീല്‍ പ്ലാന്റ്‌ ഇന്ത്യയില്‍ ത്തന്നെ അത്തരത്തില്‍ ആദ്യത്തേതായിരുന്നു.
കനറ മോട്ടോര്‍ ആന്‍ഡ്‌ ജനറല്‍ ഇന്‍ഷുറന്‍സ്‌ കമ്പനി, ജില്ലയില്‍ ആദ്യത്തെ ടയര്‍ റീട്രഡിങ്‌ കമ്പനിയായ കനറ ടയര്‍ ആന്‍ഡ്‌ റബ്ബര്‍ വര്‍ക്‌സ്‌-ഇവ രണ്ടും കുഡ്‌വായുടെ പരിശ്രമഫലമാണ്‌. ഈ സ്ഥാപനങ്ങളിലേക്ക്‌ പരിശീലനം നേടിയ തൊഴിലാളികള്‍ വേണ്ടിയിരുന്നതുകൊണ്ട്‌, ഉദ്യോഗാര്‍ഥികള്‍ക്ക്‌ തൊഴില്‍ പരിശീലനം നല്‌കി കര്‍ശനമായ പരീക്ഷയ്‌ക്കുശേഷം പ്രമാണപത്രം നല്‌കാന്‍ വേണ്ട ഏര്‍പ്പാടും 1940-ല്‍ ത്തന്നെ ഇദ്ദേഹം ചെയ്‌തിരുന്നു. സര്‍ക്കാര്‍ അപ്രന്റിസ്‌ഷിപ്പ്‌ ആക്‌റ്റ്‌ ഏര്‍പ്പെടുത്തുന്നതിനും വളരെ മുമ്പാണിത്‌ എന്നതും ശ്രദ്ധേയമാണ്‌. യന്ത്രവത്‌കരണംമൂലം രാഷ്‌ട്രത്തിന്‌ ആ വിഷയത്തില്‍ വിദഗ്‌ധ പരിശീലനം നേടിയവരെ അധികമധികം ആവശ്യമായിവരുമെന്നതിനാല്‍ വിദേശത്തു പോയി വിദഗ്‌ധ പരിശീലനം നേടുന്നതിന്‌ അര്‍ഹരായവര്‍ക്ക്‌ ലോണ്‍ സ്‌കോളര്‍ഷിപ്പ്‌ നല്‌കുന്നതിനുള്ള ഒരു നിധിയും കനറാ ഫോറിന്‍ സ്റ്റഡീസ്‌ ലോണ്‍ സ്‌കോളര്‍ഷിപ്പ്‌ ആന്‍ഡ്‌ എഡ്യൂക്കേഷന്‍ ഫണ്ട്‌ എന്ന പേരില്‍ 1957-ല്‍ ഇദ്ദേഹം ഏര്‍പ്പെടുത്തി.
ചെറുപ്പത്തില്‍ ത്തന്നെ കുഡ്‌വാ സാഹിത്യതത്‌പരനായിരുന്നു. ഇംഗ്ലീഷിലും കന്നഡയിലും കവിതയും ലേഖനവും എഴുതിത്തുടങ്ങി. 1922-ല്‍ തുടങ്ങിയ സത്യഗ്രഹി എന്ന കന്നഡവാരിക ദേശീയതയുടെ ഉദയത്തെ പ്രതിഫലിപ്പിച്ചു. 1923-34 കാലത്തു സ്വദേശാഭിമാനി എന്ന കന്നഡ വാരികയുടെ പത്രാധിപരായിരുന്നു. 1938-ല്‍ സ്വതന്ത്രഭാരതിയുടെ പ്രസിദ്ധീകരണവുമായി ബന്ധപ്പെട്ടിരുന്നു. സാരസ്വത്‌ എന്ന കൊങ്കണിവാരികയുടെ പത്രാധിപരും പ്രസാധകനും ആയിരുന്ന ഇദ്ദേഹം 1941-ല്‍ നവഭാരത്‌ (കന്നഡദിനപത്രം) തുടങ്ങി.
പ്രവര്‍ത്തിക്കുന്ന മണ്ഡലങ്ങള്‍ എത്രയോ വിപുലമായിരുന്നിട്ടും ഓരോന്നിന്റെയും വിശദാംശങ്ങള്‍പോലും അറിഞ്ഞിരിക്കുവാന്‍ ഇദ്ദേഹം ശ്രദ്ധിച്ചു. മംഗലാപുരം വിമാനത്താവളം, സുരത്‌കല്‍ കര്‍ണാടക റീജിയണല്‍ എന്‍ജിനീയറിങ്‌ കോളജ്‌ എന്നിവ സ്ഥാപിക്കുന്നതിനുവേണ്ടി യു. ശ്രീനിവാസ മല്ലയ്യയോടൊപ്പം ഇദ്ദേഹം പ്രവര്‍ത്തിച്ചു. 1967 ജൂണ്‍ 30-ന്‌ കുഡ്‌വാ അന്തരിച്ചു.
(എന്‍.എന്‍. ആനന്ദന്‍)
