This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കുഞ്ഞിത്തേയി
സര്‍വ്വവിജ്ഞാനകോശം സംരംഭത്തില്‍ നിന്ന്
കുഞ്ഞിത്തേയി
വടക്കന്‍പാട്ടുകളിലെ ഒരു നായിക. കതിരൂര്‍ നാട്ടില്‍ ജനിച്ചുവളര്‍ന്ന സുന്ദരിയുമായ കുഞ്ഞിത്തേയി, മതിലൂര്‍ ഗുരുക്കളുടെ മാനസറാണിയായിരുന്നു. അല്ലലും അലട്ടുമറിയാതെ കഴിഞ്ഞുകൂടുന്ന കാലത്താണ്‌ തച്ചോളി ഒതേനന്‍ അവളെ കണ്ടുമുട്ടുവാനിടവന്നത്‌. ഒരു പുള്ളുവത്തിയുടെ സഹായത്തോടെ ഒതേനന്‍ അവളെ കടത്തനാട്ടിലേക്കു കടത്തുകയും സ്വന്തം വെപ്പാട്ടിയാക്കി വയ്‌ക്കുകയും ചെയ്‌തു.
ഒതേനനും മതിലൂര്‍ ഗുരുക്കളും തമ്മിലുള്ള ശത്രുത ഇതോടെ പാരമ്യത്തിലെത്തിയെങ്കിലും പരസ്‌പരം ഒരു ഏറ്റുമുട്ടല്‍ പെട്ടെന്ന്‌ ഉണ്ടാവാതിരുന്നത്‌ കുറേക്കൂടി തയ്യാറെടുപ്പുകള്‍ വേണ്ടിയിരുന്നതുകൊണ്ടുമാത്രമായിരുന്നു. ഒളവണ്ണൂര്‍ക്കാവില്‍ വച്ചുണ്ടായ ഒരു നിസാരവഴക്കിനെത്തുടര്‍ന്ന്‌ അവര്‍തമ്മില്‍ പടകുറിച്ചു. ഒതേനന്റെ ഏറ്റവും വലിയ ശക്തി അദ്ദേഹം ശരീരത്തില്‍ ധരിച്ചിരിക്കുന്ന "ഉറുക്കും തണ്ടും' ആണെന്ന്‌ വിശ്വസിച്ചിരുന്ന ഗുരുക്കള്‍ അത്‌ തട്ടിയെടുക്കുവാന്‍ തന്റെ പ്രിയപ്പെട്ടവളായിരുന്ന തേയിയോട്‌ ആവശ്യപ്പെട്ടു. മോചനദിനവും സ്വപ്‌നം കണ്ട്‌ കഴിയുന്ന കുഞ്ഞിത്തേയി, തന്റെ കിടക്കയില്‍ മതികെട്ടുറങ്ങുന്ന ഒതേനനില്‍ നിന്ന് ആ മാന്ത്രികരക്ഷകള്‍ കവര്‍ന്നെടുത്തു.
പക്ഷേ, പൊന്നിയം പടനിലത്തില്‍ വച്ചുണ്ടായ പോരില്‍ മതിലൂര്‍ ഗുരുക്കള്‍ ഒതേനന്റെ കൈയാല്‍ കൊല്ലപ്പെടുകയാണുണ്ടായത്‌. ഒതേനനില്‍ നിന്ന് ഉണ്ടാവാനിടയുള്ള ശിക്ഷയില്‍ നിന്ന് രക്ഷപ്പെടുവാന്‍ കുഞ്ഞിത്തേയിക്ക്‌ പിന്നീട്‌ ആത്മഹത്യയല്ലാതെ മറ്റു പോംവഴിയില്ലാതായിത്തീരുകയാല്‍ അവള്‍ നദിയില്‍ ച്ചാടി ജീവിതമവസാനിപ്പിച്ചു.
(പയ്യന്നൂര്‍ ബാലകൃഷ്‌ണന്‍)
