This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കുഞ്ഞന്‍ മേനോന്‍, കൂട്ടിൽ(1850 - 1928)
സര്‍വ്വവിജ്ഞാനകോശം സംരംഭത്തില്‍ നിന്ന്
കുഞ്ഞന്‍ മേനോന്‍, കൂട്ടില്‍(1850 - 1928)
കഥകളി നടന്‍. വള്ളുവനാട്ടില്‍തിരുമാന്ധാംകുന്നു ഭഗവതിക്ഷേത്രത്തിനു സമീപമുള്ള കൂട്ടില്‍ഭവനത്തില്‍കൊല്ലവര്‍ഷം 1026-ല്‍ ജനിച്ചു. വെള്ളാട്ടു കുഞ്ഞുണ്ണിപ്പണിക്കരുടെ ശിഷ്യനായ മുട്ടത്തില്‍രാമന്‍മേനോന്റെ കീഴിലാണ്‌ ഇദ്ദേഹം കച്ചകെട്ടിയത്‌. ഏഴാമത്തെ വയസ്സില്‍ത്തന്നെ അരങ്ങേറിയ ഇദ്ദേഹത്തെ അമ്പാട്ട്‌ ഈച്ചരമേനോന്‍ ആദ്യവസാനങ്ങള്‍ അഭ്യസിപ്പിച്ചു. തുടര്‍ന്ന്‌ ഈച്ചരമേനോന്റെ കഥകളിയോഗത്തില്‍ആദ്യവസാനക്കാരനായി ശോഭിച്ചു. മങ്കട കോവിലകം തമ്പുരാക്കന്മാരുടെ ആശ്രിതനായിരുന്നു ഇദ്ദേഹം. കഥകളിയഭ്യസനത്തോടൊപ്പം സംസ്‌കൃതത്തിലും അവഗാഹം നേടിയിരുന്നു.
കുളത്തൂര്‍ പെരുണ്ണിമൂപ്പില്‍വാരിയര്‍, പയ്യപ്പള്ളി ഇല്ലം, കുട്ടിത്തമ്പാനെന്ന ശ്രീ വല്ലഭരാജാവ്‌, പലയക്കോട്ട്‌ ഗോവിന്ദമേനോന്‍, പുല്ലൂര്‌ കുറ്റാനിക്കാട്ട്‌ മനമഞ്ചേരി എന്നിവരുടെ കളിയോഗങ്ങളില്‍ആദ്യവസാനക്കാരനായിരുന്ന കുഞ്ഞന്‍മേനോന്റെ കത്തിക്കു പച്ചയേക്കാള്‍ ഭംഗിയുണ്ടായിരുന്നു. ശിശുപാലന്‍, ധര്‍മപുത്രര്‍ എന്നിവയാണ്‌ ഇദ്ദേഹത്തിന്റെ പ്രസിദ്ധ വേഷങ്ങള്‍. സന്താനഗോപാലത്തിലെ ബ്രാഹ്മണന്‍, രുക്‌മിണീസ്വയംവരത്തിലെ സുന്ദരബ്രാഹ്മണന്‍, നാരദന്‍, ദുര്‍വാസാവ്‌ എന്നീ മിനുക്കുവേഷങ്ങളും ഇദ്ദേഹം രസകരമായി ആടിയിരുന്നു.
ഇദ്ദേഹത്തിന്റെ ശിഷ്യന്മാരില്‍പ്രമുഖരാണ്‌ കുറിച്ചി കുഞ്ഞന്‍പണിക്കര്‍, വണ്ടൂര്‍ കൃഷ്‌ണന്‍ നായര്‍, ശങ്കരന്‍നായര്‍, കുളത്തൂര്‍ ശൂലപാണിവാരിയര്‍ എന്നിവര്‍. ഇദ്ദേഹം 1928-ല്‍സ്വദേശത്തുവച്ച്‌ അന്തരിച്ചു.
