This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കീർത്തന്‍ നൃത്തം
സര്‍വ്വവിജ്ഞാനകോശം സംരംഭത്തില്‍ നിന്ന്
കീര്‍ത്തന്‍ നൃത്തം
ബംഗാളിലെ ഒരു നാടോടിനൃത്തം. വൈഷ്‌ണവഭക്തി പ്രസ്ഥാനത്തിന്റെ ആവിര്‍ഭാവത്തോടെ പ്രചാരത്തില്‍ വന്ന ഈ നൃത്തരൂപം ബംഗാളികളുടെ സമൂഹനൃത്തങ്ങളില്‍ പ്രധാനപ്പെട്ട ഒന്നാണ്‌.
വൈഷ്‌ണവ മതാചാര്യനായിരുന്ന ചൈതന്യനാണ്‌ ഈ നൃത്തം ബംഗാളില്‍ പ്രചരിപ്പിച്ചത്‌ എന്നും വൈഷ്‌ണവരുടെ സംഭാവനകളില്‍ ഒന്നാണിതെന്നും വിശ്വസിക്കപ്പെടുന്നു. ജാതിമതവര്‍ഗഭേദമെന്യേ യുവാക്കളും വൃദ്ധരും ധനികരും ദരിദ്രരും ഉള്‍പ്പെടെ ബംഗാളിലെ സകല വ്യക്തികളും ഈ നൃത്തത്തില്‍ പങ്കെടുക്കാറുണ്ട്‌.
നാടന്‍ നൃത്തങ്ങളുടെ സവിശേഷതകള്‍ ഉള്‍ക്കൊണ്ട ഈ നൃത്തത്തിന്റെ ചുവടുവയ്‌പ്‌ ലളിതവും താളനിബദ്ധവുമാണ്‌. സംഘംചേര്‍ന്നവതരിപ്പിക്കുന്ന ഈ നൃത്തത്തില്‍ നര്‍ത്തകര്‍ തങ്ങളുടെ ഒരു കൈയോ, രണ്ടു കൈകളോ തലയ്‌ക്കുമീതെ പൊക്കിപ്പിടിച്ചുകൊണ്ട്‌ വാദ്യോപകരണങ്ങളുടെ താളത്തിനും മേളത്തിനുമൊപ്പിച്ച്‌ ആവേശഭരിതരായി നൃത്തംചെയ്യുന്നു. ഡോല്‍ (ഒരു അവനദ്ധവാദ്യം), ഏക്താര (ഒരു കമ്പിയുള്ള വീണ), കൈത്താളം തുടങ്ങിയവയാണ്‌ വാദ്യോപകരണങ്ങള്‍.
മതപരവും ആധ്യാത്മിക പ്രാധാന്യമുള്ളവയുമായ ഗാനങ്ങളാണ്‌ കീര്‍ത്തന്‍നൃത്തത്തില്‍ ആലപിക്കാറുള്ളത്‌. ഈ നൃത്തംതന്നെ തെരുവീഥികളില്‍ സഞ്ചരിച്ചുകൊണ്ട്‌ അവതരിപ്പിക്കുമ്പോള്‍ അതിനെ നഗരകീര്‍ത്തനം എന്നു പറയുന്നു.
