This site is not complete. The work to converting the volumes of സര്വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കിൽമർ, ആൽഫ്രഡ് ജോയ്സ്(1886 - 1918)
സര്വ്വവിജ്ഞാനകോശം സംരംഭത്തില് നിന്ന്
കിൽമർ, ആൽഫ്രഡ് ജോയ്സ്(1886 - 1918)
Kilmer, Alfred Joyce
ഒരു അമേരിക്കന് കവി. ന്യൂജേഴ്സിയിലെ ന്യൂബേണ്സ്വിക്കില് 1886 ഡി. 6-ന് ജനിച്ചു. റുട്ട്ഗര്സ്, കൊളംബിയ എന്നീ സര്വകലാശാലകളില് വിദ്യാഭ്യാസം നടത്തി. തുടര്ന്ന് ഒരു വര്ഷക്കാലം ലാറ്റിന് അധ്യാപകനായി ജോലി ചെയ്തു. പിന്നീട് സ്റ്റാന്ഡേര്ഡ് ഡിക്ഷണറിയുടെയും ചര്ച്ച്മാന് പത്രത്തിന്റെയും എഡിറ്റോറിയല് സ്റ്റാഫ് അംഗമായി പ്രവര്ത്തിച്ചു. 1913-ല് ന്യൂയോര്ക്ക് ടൈംസിന്റെ സണ്ഡേ മാഗസിനിലെ പുസ്തകനിരൂപണ വിഭാഗത്തില് സേവനമനുഷ്ഠിച്ചു.
സമ്മര് ഒഫ് ലവ് എന്ന ആദ്യ കവിതാസമാഹാരം 1911-ല് പ്രസിദ്ധീകരിച്ചു. മൗലിക പ്രതിഭയായ ഒരു കവിയെയല്ല, ഒരു അനുകര്ത്താവിനെയാണ് ഈ കൃതിയില് കണ്ടെത്തുക. യേറ്റ്സിനെപ്പോലുള്ള ഐറിഷ് കവികളുടെ മാറ്റൊലികളാണ് ഇതിലെ മിക്കവാറും കവിതകള്. കത്തോലിക്കാമതം സ്വീകരിച്ചതിനുശേഷം കില്മര് കവന്ട്രി പാറ്റ്മോറിന്റെയും 17-ാം ശതകത്തിലെ "അതിഭൗതിക കവി'കളുടെയും മാതൃക സ്വീകരിച്ചു.
1913-ല് പോയട്രി എന്ന മാസികയില് പ്രസിദ്ധീകരിച്ച "ട്രീസ്' (വൃക്ഷങ്ങള്) എന്ന കവിതയാണ് കില്മറെ വിശ്വപ്രസിദ്ധനാക്കിയത്. വികാരങ്ങള്ക്കു ദാര്ശനികമാനം നല്കി രചിച്ച ഈ കവിത ലോക്രശദ്ധ പിടിച്ചുപറ്റി. എന്നാല് ഇതേ രീതി അവലംബിച്ചെഴുതിയ "നക്ഷത്രങ്ങള്', "മേല്ക്കൂരകള്', "ഹിമമനുഷ്യന്', പനിനീര്പ്പൂക്കള്' തുടങ്ങിയ കവിതകള് പ്രസിദ്ധി നേടിയില്ല.
ഒന്നാം ലോകയുദ്ധത്തില് സൈനികസേവനമനുഷ്ഠിക്കവേ ഫ്രാന്സിലെ സെറിന്ജേ എന്ന ഗ്രാമത്തില്വച്ച് 1918 ജൂല. 30-ന് കില്മര് കൊല്ലപ്പെട്ടു. രണ്ടാം ലോകയുദ്ധകാലത്ത് സൈനികര്ക്കിടയില് കാവ്യാദര്ശപരതയുടെ പ്രതീകമായി കില്മര് അനുസ്മരിക്കപ്പെട്ടിരുന്നു.
ട്രീസ് ആന്ഡ് അദര് പോയംസ്, ദ് സര്ക്കസ് ആന്ഡ് അദര് എസ്സേസ്, മെയിന്സ്റ്റ്രീറ്റ് ആന്ഡ് അദര് പോയംസ്, ലിറ്ററേച്ചര് ഇന് ദ് മേക്കിങ് എന്നിവയാണ് കില്മറുടെ പ്രധാനകൃതികള്.