This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കിർമാനി, എസ്‌.എം.എച്ച്‌. (1949 - )
സര്‍വ്വവിജ്ഞാനകോശം സംരംഭത്തില്‍ നിന്ന്
കിര്‍മാനി, എസ്‌.എം.എച്ച്‌. (1949 - )
ക്രിക്കറ്റ്‌താരം. എസ്‌.എഫ്‌.എച്ച്‌. കിര്‍മാനിയുടെയും സലേഹയുടെയും പുത്രനായി 1949 ഡി. 29-ന്‌ മദ്രാസില്‍ ജനിച്ചു. സ്‌കൂള്‍ വിദ്യാഭ്യാസകാലത്തുതന്നെ ക്രിക്കറ്റ്‌ കളിയോട്‌ ആഭിമുഖ്യമുണ്ടായിരുന്ന കിര്‍മാനിക്ക്‌ 15-ാമത്തെ വയസ്സില്‍ ഇന്ത്യന്‍ സ്‌കൂള്‍ ബോയ്‌സ്‌ ക്രിക്കറ്റ്‌ ടീമിന്റെ വൈസ്‌ക്യാപ്‌റ്റനായി ഉയരാന്‍ കഴിഞ്ഞു. 1967-ല്‍ ഇംഗ്ലണ്ടില്‍ വച്ചു നടന്ന മത്സരത്തില്‍ തന്റെ പ്രാഗല്‌ഭ്യം പ്രകടമാക്കിയതോടെ ദേശീയതലത്തിലുള്ള ക്രിക്കറ്റ്‌ മത്സരങ്ങളില്‍ പങ്കെടുക്കാനും കിര്‍മാനിക്ക്‌ അവസരം ലഭിച്ചു. 1976 മുതല്‍ "വിക്കറ്റ്‌ കീപ്പര്‍' എന്ന നിലയിലാണ്‌ ഇദ്ദേഹം പ്രശസ്‌തിയാര്‍ജിച്ചത്‌. ന്യൂസിലന്‍ഡ്‌, വെസ്റ്റ്‌ഇന്‍ഡീസ്‌, ഇംഗ്ലണ്ട്‌, ആസ്റ്റ്രലിയ, പാകിസ്‌താന്‍ എന്നീ പ്രശസ്‌ത ക്രിക്കറ്റ്‌ ടീമുകള്‍ക്കെതിരായുള്ള ടെസ്റ്റ്‌ പരമ്പരകളില്‍ വിക്കറ്റ്‌ കീപ്പര്‍, ബാറ്റ്‌സ്‌മാന്‍ എന്നീ നിലകളില്‍ ഇദ്ദേഹം ഇന്ത്യക്കുവേണ്ടി സേവനം അനുഷ്‌ഠിച്ചിട്ടുണ്ട്‌. ന്യൂസിലന്‍ഡിനെതിരായുള്ള ടെസ്റ്റ്‌ മത്സരത്തില്‍ ഒരു ഇന്നിങ്‌സില്‍ ആറുപേരെ കിര്‍മാനി പുറത്താക്കി. അങ്ങനെ ഒറ്റ ഇന്നിങ്‌സില്‍ ഏറ്റവും കൂടുതല്‍ ബാറ്റ്‌സ്‌മാന്മാരെ പുറത്താക്കി ലോകറെക്കോര്‍ഡ്‌ കരസ്ഥമാക്കിയ വിക്കറ്റ്‌ കീപ്പര്‍മാരുടെ നിരയിലേക്ക്‌ ഇദ്ദേഹം ഉയര്‍ന്നു. വിക്കറ്റ്‌ കീപ്പര്‍ എന്ന നിലയില്‍ പ്രശസ്‌തിയാര്‍ജിച്ച കിര്‍മാനി മികച്ച ബാറ്റ്‌സ്‌മാന്‍ കൂടിയായിരുന്നു. 1979-80ല്‍ ആസ്റ്റ്രലിയയ്‌ക്ക്‌ എതിരായി നടന്ന ടെസ്റ്റ്‌ മത്സരങ്ങളില്‍ പുറത്താകാതെ 101 റണ്‍സ്‌ നേടിയത്‌ ഇദ്ദേഹത്തിന്റെ മികച്ച ബാറ്റിങ്‌ പ്രകടനത്തിന്‌ ഉദാഹരണമാണ്‌. "ലോകത്തിലെ ഏറ്റവും മികച്ച വിക്കറ്റ്‌ കീപ്പര്‍' എന്ന ബഹുമതി കരസ്ഥമാക്കിയ കിര്‍മാനിക്ക്‌ 1980-81 ല്‍ അര്‍ജുന അവാര്‍ഡും 1982-ല്‍ പദ്‌മശ്രീ ബഹുമതിയും ലഭിച്ചു. 1983-ല്‍ ഇംഗ്ലണ്ടില്‍ വച്ചു നടന്ന വേള്‍ഡ്‌കപ്പ്‌ പ്രൂഡന്‍ഷ്യല്‍ മത്സരങ്ങളില്‍ ക്രിക്കറ്റ്‌ രംഗത്തെ അതികായരെ പരാജയപ്പെടുത്തി ഇന്ത്യ വിജയിച്ചതിന്റെ പിന്നില്‍ കിര്‍മാനി വഹിച്ച പങ്ക്‌ നിസ്സീമമാണ്‌. കിര്‍മാനി ബി.സി.സി.ഐ. (Board of Control for Cricket in India) ചെയര്‍മാന്‍ സ്ഥാനവും വഹിച്ചിട്ടുണ്ട്‌ (2003).
