This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കാളീപ്രസന്ന സിന്‍ഹ (1840 - 70)
സര്‍വ്വവിജ്ഞാനകോശം സംരംഭത്തില്‍ നിന്ന്
കാളീപ്രസന്ന സിന്‍ഹ (1840 - 70)
ബംഗാളി സാഹിത്യകാരന്‍. ഒരു ജന്മികുടുംബത്തില്‍ 1840-ല്‍ ജനിച്ചു. പ്രത്യേക-അധ്യാപകര്‍ മുഖേന വീട്ടിലിരുന്ന്‌ ഇംഗ്ലീഷ്‌, ബംഗാളി, സംസ്‌കൃതം തുടങ്ങിയ ഭാഷകള്‍ വശമാക്കി. പതിമൂന്നാമത്തെ വയസ്സില്‍, ഇദ്ദേഹമാരംഭിച്ച "വിദ്യോത്‌സാഹിനി സഭ' ബംഗാളി സാഹിത്യത്തിന്‌ പുതിയ മാനങ്ങള്‍ പകരുവാന്‍ ഉപകരിച്ചു. മൈക്കല്‍ മധുസൂദനദത്തിനെപ്പോലെയുള്ള സാഹിത്യകാരന്മാര്‍ക്ക്‌ ബംഗാളിസാഹിത്യത്തില്‍ അംഗീകാരം ഉണ്ടാക്കിക്കൊടുക്കുന്നതില്‍ കാളീപ്രസന്ന വളരെയധികം യത്‌നിച്ചിട്ടുണ്ട്‌. വിദ്യോത്സാഹിനിപത്രികയുടെ എഡിറ്ററായിരുന്ന കാളീപ്രസന്ന സര്‍വതത്ത്വപ്രകാശിക, വിവിധാര്‍ഥസംഗ്രഹ്‌, പരിദര്‍ശക്‌ എന്നീ പ്രസിദ്ധീകരണങ്ങളുടെയും പത്രാധിപരായി പ്രവര്‍ത്തിച്ചിട്ടുണ്ട്‌.
സ്വതന്ത്രരചനകളും സംസ്‌കൃതത്തില്‍നിന്നുള്ള പരിഭാഷകളുമായി ഏതാനും നാടകങ്ങള്‍ ഇദ്ദേഹത്തിന്റെതായുണ്ട്‌. ബാബു (സ്വതന്ത്രം), വിക്രമോര്‍വശീയം, സാവിത്രി-സത്യവാന്‍ തുടങ്ങിയവ ഇക്കൂട്ടത്തില്‍പ്പെടുന്നു. ഹുതോംപ്യാംചാര്‍ നക്ഷ (രണ്ടു ഭാഗങ്ങള്‍-1862) എന്ന ഇദ്ദേഹത്തിന്റെ നോവല്‍ 19-ാം ശതകത്തിലെ കല്‍ക്കത്തയുടെ പൊയ്‌മുഖങ്ങളെ പരിഹാസപൂര്‍വം ചൂണ്ടിക്കാണിച്ചിരിക്കുന്നു. പുത്തന്‍ മടിശ്ശീലക്കാരുടെ സാന്മാര്‍ഗികാധഃപതനത്തെയാണ്‌ മുഖ്യമായും ഇവിടെ പ്രതിപാദ്യവിഷയമാക്കിയിരിക്കുന്നത്‌. തികച്ചും ഗ്രാമ്യമായ ഭാഷയില്‍ രചിച്ചിട്ടുള്ള ഈ നോവലില്‍ ചിലപ്പോഴെങ്കിലും കാളീപ്രസന്ന സഭ്യതയുടെ സീമകള്‍ ഉല്ലംഘിക്കുന്നതായി കാണാം. പ്രസിദ്ധീകരണരംഗത്തു തികഞ്ഞ വിജയമായിരുന്ന ഈ പുസ്‌തകത്തിനു ധാരാളം അനുകരണങ്ങള്‍ ബംഗാളിലുണ്ടായി; കാളീപ്രസന്നയുടെ ശൈലിപോലും എഴുപതുകളില്‍ ചില ബംഗാളി എഴുത്തുകാര്‍ പൂര്‍ണമായി അനുകരിക്കുകയുണ്ടായി. ബംഗേഴ്‌സ്‌ വിജയ്‌ എന്ന പേരില്‍ മറ്റൊരു നോവലും ഇദ്ദേഹത്തിന്റേതായുണ്ട്‌.
കാളീപ്രസന്ന സിന്‍ഹയുടെ ഏറ്റവും ശ്രഷ്‌ഠമായ രചന സംസ്‌കൃതത്തിലുള്ള മഹാഭാരതത്തിന്റെ ബംഗാളി വിവര്‍ത്തനമാണ്‌ (1860-66). വിദ്യാഭ്യാസത്തിന്റെയും വിജ്ഞാനത്തിന്റെയും ഒരു രക്ഷാധികാരി എന്ന നിലയില്‍ വംഗദേശത്തിന്റെ സാംസ്‌കാരികാന്തരീക്ഷത്തില്‍ അറിയപ്പെടുന്ന ഇദ്ദേഹം 1870-ല്‍ അന്തരിച്ചു.
