This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കാത്തിബ്‌ മുഹമ്മദ്‌കുട്ടി മൗലവി (1886 - 1964)
സര്‍വ്വവിജ്ഞാനകോശം സംരംഭത്തില്‍ നിന്ന്
കാത്തിബ്‌ മുഹമ്മദ്‌കുട്ടി മൗലവി (1886 - 1964)
ഇന്ത്യന്‍ സ്വാതന്ത്യ്രസമരസേനാനിയും ഗ്രന്ഥകാരനും. കെ.എം. മൗലവി എന്ന തൂലികാനാമത്താല്‍ പ്രസിദ്ധനായ തയ്യില്‍ മുഹമ്മദ്‌കുട്ടി മൗലവി കക്കാട്‌ തയ്യില്‍ മൊയ്‌തീന്റെയും ആയിഷയുടെയും പുത്രനായി 1886 ജൂല. 4-നു ജനിച്ചു. വാഴക്കാട്‌ "തച്ചിയത്തുല്‍ ഉലൂം മദ്രസ്സ'യില്‍ ചാലിലകത്ത്‌ കുഞ്ഞഹമ്മദ്‌ ഹാജിയില്‍നിന്ന്‌ ഉന്നതവിദ്യാഭ്യാസം നേടി. കുഞ്ഞഹമ്മദ്‌ ഹാജി മണ്ണാര്‍ക്കാട്ടേക്കു പോയപ്പോള്‍ അദ്ദേഹത്തെ അനുഗമിച്ചു. കുഞ്ഞഹമ്മദ്‌ ഹാജിയുടെ മരണാനന്തരം അവിടെ അധ്യാപകനായി. കുഞ്ഞഹമ്മദ്‌ ഹാജിയുടെ ഫത്‌വകള്‍ എഴുതി തയ്യാറാക്കിയിരുന്നത്‌ ഇദ്ദേഹമായിരുന്നതുകൊണ്ട്‌ സെക്രട്ടറി എന്നും എഴുത്തുകാരനെന്നും അര്‍ഥമുള്ള "കാത്തിബ്‌' എന്ന പേര്‍ സിദ്ധിച്ചു.
മൗലവി സ്വാതന്ത്യ്രസമരത്തിന്റെ മുന്നണിപ്പോരാളിയും ഖിലാഫത്ത്‌ പ്രസ്ഥാനത്തിന്റെ വക്താവുമായിരുന്നു. ആ പ്രസ്ഥാനം പ്രചരിപ്പിച്ചുകൊണ്ട്‌ ഇദ്ദേഹം ചെയ്‌ത പ്രസംഗങ്ങള്‍ ബ്രിട്ടീഷ്‌ ഉദ്യോഗസ്ഥന്മാരെ അലോസരപ്പെടുത്തി. മലബാര്‍ ലഹള പൊട്ടിപ്പുറപ്പെട്ടപ്പോള്‍ ഇദ്ദേഹത്തിന്‌ എതിരായി അറസ്റ്റ്‌ വാറണ്ടുണ്ടായി. ഇദ്ദേഹം കൊടുങ്ങല്ലൂരില്‍ അഭയം തേടി. 1922-ല്‍ ഇദ്ദേഹം രൂപംനല്‌കിയ "നിഷ്‌പക്ഷസംഘം' ആദ്യം "കേരള മുസ്‌ലിം ഐക്യസംഘ'വും പിന്നീട്‌ "കേരള നദ്‌വത്തുല്‍ മുജാഹിദീനും' ആയിത്തീര്‍ന്നു. 1932-ല്‍ ഇദ്ദേഹത്തിനെതിരെയുള്ള ചാര്‍ജ്‌ സര്‍ക്കാര്‍ പിന്‍വലിച്ചു. 1933-ല്‍ മൗലവി തന്റെ പ്രവര്‍ത്തനകേന്ദ്രം തിരൂരങ്ങാടിയിലേക്കു മാറ്റി. 1939-ല്‍ ആരംഭിച്ച "നൂറുല്‍ ഇസ്‌ലാം മദ്രസ്സ'യുടെയും 1943-ല്‍ ആരംഭിച്ച തിരൂരങ്ങാടി "യത്തീംഖാന'യുടെയും പ്രധാന ശില്‌പി ഇദ്ദേഹമായിരുന്നു. ഇന്ത്യന്‍ നാഷണല്‍ കോണ്‍ഗ്രസ്സിനുവേണ്ടി ഒട്ടേറെ ത്യാഗങ്ങള്‍ സഹിച്ച ഇദ്ദേഹം പിന്നീടു മുസ്‌ലിം ലീഗില്‍ ചേര്‍ന്നു. മുസ്‌ലിം ഐക്യം, അല്‍ ഇര്‍ഷാദ്‌ എന്നീ മാസികകളും ധാരാളം ഫത്‌വകളും അദുത്ത ഉല്‍ ഇബാദ, അല്‍വിലായതുല്‍ കറാമ, ഖുതുബതുല്‍ ജുമുഅ, ഫാതാവല്‍ കവി, അന്നഫ്‌ ഉല്‍ അമീം, അസ്‌ലാത്‌, കൈഫിയതുല്‍ ഹര്‍ജ്‌, ഇസ്‌ലാമും സ്‌ത്രീകളും, മുസ്‌ലിം ലോകത്തോട്‌ ഒരാഹ്വാനം തുടങ്ങിയ ഒട്ടേറെ ഗ്രന്ഥങ്ങളും ഇദ്ദേഹം പ്രസിദ്ധപ്പെടുത്തി. 1964 സെപ്‌. 11-നു അന്തരിച്ചു.
(ഡോ. കെ.എം. മുഹമ്മദ്‌)
