This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കലൈക്കളഞ്ചിയം
സര്‍വ്വവിജ്ഞാനകോശം സംരംഭത്തില്‍ നിന്ന്
കലൈക്കളഞ്ചിയം
തമിഴ്‌ഭാഷയിലെ വിജ്ഞാനകോശം. കലൈ (കല), കളഞ്ചിയം (സാധനങ്ങളുടെ സമാഹാരം) എന്നീ രണ്ടു പദങ്ങള്‍ സമാസിച്ചുണ്ടായ ഈ പദം അക്ഷരമാലാക്രമത്തില്‍ വിജ്ഞാനശകലങ്ങള്‍ അടുക്കിവച്ചത്‌ (വിജ്ഞാനകോശം, എന്‍സൈക്ലോപീഡിയ) എന്ന അര്‍ഥത്തെയാണ്‌ ഇന്ന്‌ കുറിക്കുന്നത്‌.
ചിങ്കാരവേലു മുതലിയാര്‍ തയ്യാറാക്കി പ്രസിദ്ധീകരിച്ച അപിതാനചിന്താമണി (1910)യാണ്‌ തമിഴിലെ ആദ്യത്തെ വിജ്ഞാനകോശം. സാഹിത്യവിഭവങ്ങള്‍, ഔഷധങ്ങള്‍, ജ്യോതിഷം, കവികള്‍, രാജാക്കന്മാര്‍ തുടങ്ങിയ നിരവധി വിഷയങ്ങളെക്കുറിച്ചുള്ള വിവരങ്ങള്‍ ഇതില്‍ ഉള്‍ക്കൊള്ളിച്ചിരിക്കുന്നു.
"തമിഴ്‌ വളര്‍ച്ചിക്കഴക'ത്തിന്റെ പ്രസിഡന്റായിരുന്ന അവിനാശലിംഗം ചെട്ടിയാരാണ്‌ കലൈക്കളഞ്ചിയത്തിന്റെ നിര്‍മാണത്തിനു നേതൃത്വം കൊടുത്തത്‌. തമിഴില്‍ ഒരു വിജ്ഞാനകോശം നിര്‍മിക്കേണ്ടതിന്റെ ആവശ്യകതയെക്കുറിച്ച്‌ ഉദ്‌ബോധിപ്പിച്ചുകൊണ്ടും അതിനായി സഹകരണങ്ങള്‍ അഭ്യര്‍ഥിച്ചുകൊണ്ടും 1947 ആഗ. 15ന്‌ ഇദ്ദേഹം തമിഴ്‌ ജനതയോടായി ഒരു പ്രസ്‌താവന പുറപ്പെടുവിച്ചു. അതേത്തുടര്‍ന്ന്‌ നിരവധി കലാകാരന്മാരും എഴുത്തുകാരും ശാസ്‌ത്രകാരന്മാരും ഈ സംരംഭവുമായി സഹകരിക്കാന്‍ മുന്നോട്ടു വന്നു. 1947 ഒ.ല്‍ ഇതിന്റെ പ്രവര്‍ത്തനം ഔപചാരികമായി ആരംഭിച്ചു. തമിഴ്‌ പണ്ഡിതനായ എം.പി. പെരിയസ്വാമി തൂരന്‍ ഇതിന്റെ ചീഫ്‌ എഡിറ്ററായി നിയമിക്കപ്പെട്ടു. നിരവധി പേരുടെ കഠിനാധ്വാനത്തിന്റെ ഫലമായി 1954 ഏ.ല്‍ കലൈക്കളഞ്ചിയത്തിന്റെ ഒന്നാംവാല്യം പ്രസിദ്ധീകരിക്കാന്‍ കഴിഞ്ഞു. അതിനുശേഷം ഒരു വര്‍ഷം ഒരു വാല്യം എന്ന കണക്കിന്‌ തുടര്‍ന്നുള്ള ഒന്‍പതു വാല്യങ്ങളും പ്രസിദ്ധീകരിക്കുകയുണ്ടായി. 10-ാം വാല്യം ആദ്യ വാല്യങ്ങളുടെ ഒരു അനുബന്ധമാണ്‌. ഒന്‍പതു വാല്യങ്ങളുടെയും സൂചികയും മുന്‍വാല്യങ്ങളിലെ ചില ലേഖനങ്ങളെ സംബന്ധിച്ച കൂടുതല്‍ വിവരങ്ങളും ഈ വാല്യത്തില്‍ ചേര്‍ത്തിട്ടുണ്ട്‌.
ക്രൗണ്‍ നാലിലൊന്നു വലുപ്പത്തില്‍ 10 വാല്യങ്ങളിലും കൂടി 7,500 പേജുകളാണുള്ളത്‌. അക്ഷരമാലാ ക്രമത്തില്‍ സംവിധാനം ചെയ്‌തിട്ടുള്ള ഈ വിജ്ഞാനകോശത്തില്‍ ആകെ 20,000 ശീര്‍ഷകങ്ങളും 5,000ലധികം പ്രതിസൂചനകളുമുണ്ട്‌. കൂടാതെ വര്‍ണചിത്രങ്ങള്‍ ഉള്‍പ്പെടെ നിരവധി ചിത്രങ്ങളും ചേര്‍ത്തിട്ടുണ്ട്‌. ലേഖനങ്ങള്‍ക്കു പൊതുവേ ദൈര്‍ഘ്യം കുറവാണ്‌. തമിഴ്‌ വളര്‍ച്ചിക്കഴകത്തിന്റെ ആഭിമുഖ്യത്തില്‍ കുട്ടികള്‍ക്കു വേണ്ടിയുള്ള ഒരു കലൈക്കളഞ്ചിയവും പ്രസിദ്ധീകരിക്കുകയുണ്ടായി. ഈ രണ്ടു ഗ്രന്ഥങ്ങളുടെയും പ്രസിദ്ധീകരണത്തില്‍ തമിഴ്‌നാട്‌ ഗവണ്‍മെന്റിന്റെയും കേന്ദ്രഗവണ്‍മെന്റിന്റെയും സഹകരണങ്ങള്‍ ലഭിക്കുകയുണ്ടായി.
(പ്രാഫ. ആര്‍. ഹരിഹരസുബ്രഹ്മണി; സ.പ.)
