This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കരണ്ടിക്കൊക്കന്‍
സര്‍വ്വവിജ്ഞാനകോശം സംരംഭത്തില്‍ നിന്ന്
കരണ്ടിക്കൊക്കന്‍
ഓസ്‌റ്റിയിക്‌തീസ്‌ വര്‍ഗത്തിലെ കോണ്‍ഡ്രാസ്‌റ്റീ ഗോത്രത്തിലുള്ള പോളിയോഡോണ്ടിഡേ കുടുംബത്തില്‍പ്പെടുന്നതും സ്രാവുകളോട്‌ സാദൃശ്യമുള്ളതുമായ മത്സ്യങ്ങള്‍. "പാഡല്‍ ഫിഷസ്‌' എന്ന്‌ സാധാരണ അറിയപ്പെടുന്ന ഈ മത്സ്യങ്ങള്‍ ഓസ്‌റ്റിയിക്‌തീസ്‌ വിഭാഗത്തിലാണ്‌ ചേര്‍ക്കപ്പെട്ടിട്ടുള്ളതെങ്കിലും തരുണാസ്ഥിമത്സ്യങ്ങളുടെയും അസ്ഥിമത്സ്യങ്ങളുടെയും വിചിത്രമായ ഒരു ഘടനാസംയോജനമാണ്‌ ഇവയില്‍ കാണാന്‍ കഴിയുക. മത്സ്യത്തിന്റെ ആകെ വലുപ്പത്തിന്റെ ഏതാണ്ട്‌ മൂന്നിലൊന്നില്‍ കൂടുതല്‍ വലുപ്പം വരുന്ന ഒരു "തുഴ' നാസാഗ്രത്തോട്‌ ബന്ധപ്പെട്ടു കാണുന്നതിനാലാണ്‌ ഈ മത്സ്യങ്ങള്‍ക്ക്‌ "പാഡല്‍ ഫിഷ്‌' എന്ന പേരു ലഭിച്ചത്‌. സ്‌റ്റര്‍ജനുകളുടെ (അസിപെന്‍സര്‍) "അവശിഷ്ട'മായി കരുതപ്പെടുന്ന ചെറു"മുള്ളു'കള്‍ (barbels)ഈ തുഴയ്‌ക്കടിയിലായി കാണപ്പെടുന്നു. അതിവേഗം വളര്‍ന്ന്‌ വികാസം പ്രാപിക്കുന്നവയാണ്‌ ഈ മത്സ്യങ്ങള്‍. പൂര്‍ണവളര്‍ച്ചയെത്തിയ ഒരു മത്സ്യത്തിന്റെ ശരീരത്തിന്‌ 2 മീ. വരെ നീളമുണ്ടായിരിക്കും; 75 മീ. നീളവും 10 സെ.മീ. വീതിയുമുള്ള ഒരു "തുഴ' വേറെയും. ക്രസ്‌റ്റേഷ്യകളും മറ്റു പ്ലവജീവികളുമാണ്‌ ഇവയുടെ പ്രധാനാഹാരം. വായ്‌ മലര്‍ക്കെത്തുറന്നുവച്ചു കൊണ്ട്‌ വെള്ളത്തിലൂടെ അതിവേഗം നീന്തിയാണ്‌ ആഹാരസമ്പാദനം നടത്തുന്നത്‌.
രണ്ടുതരം പാഡല്‍ മത്സ്യങ്ങളാണ്‌ പഠനവിധേയമാക്കപ്പെട്ടിട്ടുള്ളത്‌: യാങ്‌സീ നദീതടങ്ങളില്‍ കാണപ്പെടുന്ന സെഫ്യൂറസ്‌ ഗ്‌ളാഡിയസ്‌; മിസ്സിസ്സിപ്പി തടങ്ങളില്‍ കാണപ്പെടുന്ന പോളിയോഡന്‍ സ്‌പാതുല. രണ്ടാമത്തെയിനം ഒരു "ഭക്ഷ്യമത്സ്യ'മായി സ്വീകരിക്കപ്പെട്ടിട്ടുണ്ട്‌. "സ്‌പൂണ്‍ബില്‍', "സ്‌പൂണ്‍ബീക്‌ഡ്‌ സ്‌റ്റര്‍ജന്‍', "സ്‌പൂണ്‍ബില്‍ഡ്‌ കാറ്റ്‌ഫിഷ്‌', "സ്‌പൂണര്‍' എന്നീ പേരുകളിലാണ്‌ ഇത്‌ യു.എസ്സില്‍ അറിയപ്പെടുന്നത്‌.
