This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഐസ്‌ബർഗ്‌
സര്‍വ്വവിജ്ഞാനകോശം സംരംഭത്തില്‍ നിന്ന്
ഐസ്‌ബർഗ്‌
Iceberg
സ്ഥാവരമോ ഒഴുകിനടക്കുന്നതോ ആയ ഹിമപിണ്ഡം. ഐസ്‌ബര്‍ഗിന്‌ ഒരു നിശ്ചിതരൂപമില്ല; ശുദ്ധജലസഞ്ചിതമാണ്‌. ഉയര്‍ന്ന അക്ഷാംശങ്ങളിലെ സമുദ്രഭാഗങ്ങളില്‍ മാതൃഹിമശൈലത്തില്‍നിന്ന്‌ അടര്‍ന്നുമാറി കാണപ്പെടുന്ന ഇവയുടെ 80 ശതമാനം ജലനിമഗ്നമായിരിക്കും. സാധാരണയായി 100 മീറ്ററിലധികം ഉയരവും 300 മീറ്ററിലധികം വ്യാസവുമുണ്ടാവില്ല; എന്നാല്‍ ദക്ഷിണധ്രുവത്തില്‍ 25,000 ചതുരശ്ര കിലോമീറ്ററില്‍ക്കൂടുതല്‍ വിസ്‌തൃതിയുള്ള കൂറ്റന്‍ ഐസ്‌ബര്‍ഗുകള്‍ കാണപ്പെടാറുണ്ട്‌.
ആകൃതി, വലുപ്പം എന്നിവയെ അടിസ്ഥാനമാക്കി ഇവയെ വര്‍ഗീകരിച്ചിട്ടുണ്ട്‌. ഗ്രീഷ്‌മകാലത്ത്‌ ഐസ്‌ബര്‍ഗുകള്‍ സമുദ്രജലപ്രവാഹത്തില്‍പ്പെട്ട്‌ ധാരാളമായി ഒഴുകിനീങ്ങുന്നു; 300 അക്ഷാംശങ്ങള്‍ വരെ എത്തുമ്പോഴേക്കും ഇവ ഉരുകി നാമാവശേഷമാകുന്നു.
അന്റാര്‍ട്ടിക്ക, ഗ്രീന്‍ലാന്‍ഡ്‌ എന്നിവിടങ്ങളിലും മറ്റു ദ്വീപുകളിലുമുള്ള ഹിമാനീ(glacier)മുഖങ്ങളില്‍ നിന്നും സ്ഥിരമായി ഹിമാവൃതമായിട്ടുള്ള വന്‍കരാഗ്രങ്ങളില്‍നിന്നുമാണ്‌ ഐസ്‌ബര്‍ഗ്‌ രൂപംകൊള്ളുന്നത്‌. സഹസ്രാബ്‌ദങ്ങളായി അടിഞ്ഞുകൂടിയിട്ടുള്ള നൂറുകണക്കിനു മീ. കനമുള്ള ഹിമക്കട്ടികള്‍ ക്രമേണ സമുദ്രത്തിലേക്ക്‌ ഒഴുകിയിറങ്ങുന്നു. മുഖങ്ങളിലുണ്ടാകുന്ന വിള്ളലുകള്‍ വളര്‍ന്ന്‌, മാതൃഹിമപിണ്ഡത്തില്‍നിന്നും അടര്‍ന്നുമാറിയാണിവ രൂപംകൊള്ളുന്നത്‌. ചെറിയവ കാറ്റില്‍പ്പെട്ടും ബൃഹത്തായ ഐസ്‌ബര്‍ഗുകള്‍ സമുദ്രജലപ്രവാഹത്തില്‍പ്പെട്ടും ഒഴുകി സഞ്ചരിക്കുന്നു. ഉഷ്‌ണമേഖലയിലേക്കു വഹിച്ചു നീക്കപ്പെടുന്ന ഐസ്‌ബര്‍ഗുകള്‍ ഉരുകിയുണ്ടാകുന്ന ശുദ്ധജലം മനുഷ്യോപഭോഗത്തിനുചിതമാണ്‌. അന്റാര്‍ട്ടിക്‌ മേഖലയില്‍നിന്നും ഇവ ഗുഡ്‌ഹോപ്പ്‌ മുനമ്പുവരെ ഒഴുകിയെത്താറുണ്ട്‌.
ഒരു ഘന കി.മീ. വ്യാപ്‌തിയുള്ള ഒരു ഐസ്‌ബര്‍ഗ്‌ ഉരുകുമ്പോള്‍ ഒരു ലക്ഷം പേര്‍ക്ക്‌ മൂന്നുമാസത്തേക്കു വേണ്ട ശുദ്ധജലം കിട്ടുന്നു; ഈ വസ്‌തുത അവയെ അന്റാര്‍ട്ടിക്ക്‌ മേഖലയില്‍നിന്നു കെട്ടിവലിച്ചുകൊണ്ടുവന്ന്‌ ആസ്റ്റ്രലിയ, ചിലി, ദക്ഷിണാഫ്രിക്ക തുടങ്ങിയയിടങ്ങളില്‍ ശുദ്ധജലവിതരണം നടത്താനുള്ള ശ്രമത്തിന്‌ പ്രരകമായിരിക്കുന്നു.
പൊതുവേ സരന്ധ്രങ്ങളായ ഐസ്‌ബര്‍ഗുകള്‍ക്ക്‌ സാധാരണ ഹിമത്തെക്കാള്‍ ഘനത്വം കുറവാണ്‌. ആപേക്ഷികസാന്ദ്രത 0.75-0.85 ആയതിനാല്‍ നാലിലൊന്നുമുതല്‍ ആറിലൊന്നുവരെ ഭാഗം ജലനിമഗ്നമാകാതെ കാണപ്പെടുന്നു. ഇവ ഉള്‍ക്കൊള്ളുന്ന ഉരുളന്‍കല്ലുകളും മറ്റു സൂക്ഷ്‌മവസ്‌തുക്കളും ഐസ്‌ ഉരുകുന്നതോടെ കടല്‍ത്തറയില്‍ നിക്ഷിപ്‌തമാകുന്നു. ഗ്രീന്‍ലാന്‍ഡില്‍ ട്രിഷ്യം (3H) മൂലകത്തില്‍ നിന്നും ഉദ്‌ഭൂതമായിട്ടുണ്ട്‌. ഐസ്‌ബര്‍ഗുകള്‍ ഹിമാവസ്ഥയിലെത്തിയിട്ട്‌ 50,000-ല്‍പ്പരം വര്‍ഷങ്ങള്‍ കഴിഞ്ഞുവെന്നു നിര്‍ണയിച്ചിട്ടുണ്ട്‌.
ഉത്തരാര്‍ധഗോളത്തില്‍ വര്‍ഷന്തോറും കാണപ്പെടുന്ന 16,000-ല്‍പ്പരം ഐസ്‌ബര്‍ഗുകളില്‍ 90 ശതമാനവും ഗ്രീന്‍ലാന്‍ഡില്‍ നിന്നാണ്‌ ഒഴുകിനീങ്ങുന്നത്‌. ഐസ്‌ബര്‍ഗിന്റെ സാന്നിധ്യംമൂലം സമീപാന്തരീക്ഷം തണുത്ത്‌ മൂടല്‍മഞ്ഞുണ്ടാകുന്നതിനാല്‍ അവയുടെ സ്ഥാനം നിര്‍ണയിക്കുക പ്രയാസമാണ്‌. മുന്‍കാലങ്ങളില്‍ പല കപ്പല്‍ച്ചേതങ്ങള്‍ക്കും ഇവ കാരണമായിട്ടുണ്ട്‌. "ടൈറ്റാനിക്‌' എന്ന ഭീമാകാരമായ യാത്രക്കപ്പല്‍ അത്‌ലാന്തിക്‌ തരണത്തിനിടയില്‍ 1912 ഏ. 14-ല്‍ ഐസ്‌ബര്‍ഗുമായി കൂട്ടിയിടിച്ചു തകര്‍ന്നതിന്റെ ഫലമായി 1513 പേര്‍ മുങ്ങിമരിച്ചു. ഇന്ന്‌ കപ്പലുകളിലും മറ്റുമുള്ള റഡാര്‍ തുടങ്ങിയ ആധുനിക ഉപകരണങ്ങളിലൂടെ ഇവയുടെ സാന്നിധ്യം മനസ്സിലാക്കാം; സ്‌ഫോടകവസ്‌തുക്കളുപയോഗിച്ച്‌ 2,50,000 ടണ്‍ ഭാരമുള്ള ഐസ്‌ബര്‍ഗുകളെവരെ തകര്‍ത്തുതരിപ്പണമാക്കുന്നുണ്ട്‌. ഹിമഭഞ്‌ജക-കപ്പലുകളും (ice breaker) ഇന്ന്‌ സര്‍വസാധാരണമാണ്‌. ഇ.ആര്‍.ടി.എസ്‌. (എര്‍ത്ത്‌ റിസോര്‍സ്‌ ടെക്‌നോളജി സാറ്റലൈറ്റ്‌) പേടകങ്ങളുപയോഗിച്ച്‌ ഇവയുടെ സ്ഥാനം, വലുപ്പം, വിതരണക്രമം എന്നിവ സംബന്ധിച്ച ദത്തങ്ങള്‍ ശേഖരിക്കാവുന്നതാണ്‌.
