This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഐവി
സര്‍വ്വവിജ്ഞാനകോശം സംരംഭത്തില്‍ നിന്ന്
ഐവി
Ivy
പടര്‍ന്നുകയറുന്ന വിവിധയിനം വള്ളിച്ചെടികളുടെ പൊതുവായ പേര്‌. എന്നാല്‍ ഹെഡേറ (Hedera)ജീനസ്സില്‍പ്പെട്ട ചെടികളെയാണ്‌ മുഖ്യമായി ഈ പേരുകൊണ്ടുദ്ദേശിക്കുന്നത്‌. ഇംഗ്ലീഷ്‌ ഐവി എന്ന്‌ സാധാരണ അറിയപ്പെടുന്ന ഹെഡേറ ഹെലിക്‌സ്‌ (Hedera helix) യൂറോപ്പില്‍ സര്‍വസാധാരണമാണ്‌. പുരാതന ഗ്രീക്കുകാരുടെയും റോമാക്കാരുടെയും കാലംമുതല്‍ തന്നെ ഇത്‌ ഒരു അലങ്കാരസസ്യമെന്ന നിലയില്‍ വളരെയധികം വിലമതിക്കപ്പെട്ടിരുന്നു. ഇപ്പോള്‍ ഇത്‌ ഭിത്തികളുടെയും പാറകളുടെയും മറ്റും ആവരണമെന്ന നിലയില്‍ യു.എസ്സില്‍ ധാരാളമായി വളര്‍ത്തപ്പെടുന്നു. ഒരു നിത്യഹരിതസസ്യമായ ഇതിന്റെ തണ്ടില്‍, ചെടി ചെറുതായിരിക്കുമ്പോള്‍, പറ്റിപ്പിടിച്ചുകയറാന്‍ സഹായകമായ വായവ (aerial) വേരുകള്‍ സമൃദ്ധമായുണ്ട്‌. എന്നാല്‍ വളര്‍ച്ചയെത്തിയ ഐവിക്ക്‌ കുറ്റിച്ചെടിയുടെ ഘടനയാണുള്ളത്‌. വായവവേരുകള്‍ ഇതില്‍ കാണുകയില്ല. പച്ചനിറത്തിലുള്ള ധാരാളം ചെറിയ പൂക്കള്‍ ചേര്‍ന്ന്‌ കുടയുടെ ആകൃതിയിലുള്ള പൂങ്കുലയായിത്തീരുന്നു. ശരത്‌കാലത്താണ്‌ പൂവിടല്‍. തുടര്‍ന്ന്‌ വസന്തമാവുമ്പോഴേക്ക്‌ കറുത്തപഴങ്ങള്‍ ജന്മമെടുക്കുന്നു.
ഇംഗ്ലീഷ്‌ ഐവിയില്‍ത്തന്നെ വിവിധയിനങ്ങളുണ്ട്‌. വെള്ള, മഞ്ഞ, കടുംനിറങ്ങള്‍ എന്നിവ ചേര്‍ന്നു കാണപ്പെടുന്ന ഇലകളാണ്‌ ഇവയുടേത്‌. മതിലുകള്‍, തോട്ടങ്ങള്‍, തൂക്കിയിടുന്ന ചട്ടികള്‍, ഗ്രീന്‍ഹൗസുകള്‍ എന്നിവയിലെല്ലാം ഇംഗ്ലീഷ്‌ ഐവിയുടെ വിവിധയിനങ്ങള്‍ നട്ടുവളര്‍ത്തപ്പെടുന്നു. തണലുള്ളയിടങ്ങളില്‍ തറയിലും ഇത്‌ പടര്‍ത്താറുണ്ട്‌. അതിശൈത്യത്തെ അതിജീവിക്കാന്‍ ഇവയില്‍ പലതിനും കഴിവില്ല.
ബോസ്റ്റണ്‍ അഥവാ ജാപ്പനീസ്‌ ഐവി(Parthenocissus tricuspidata) ചൈനയിലും ജപ്പാനിലുമാണ്‌ കാണപ്പെട്ടിരുന്നത്‌. ഇതിന്‌ രണ്ടുതരം ഇലകളുണ്ട്‌: സാധാരണ കാണപ്പെടുന്ന മൂന്ന്‌ ഇതളുകളുള്ളവയും, ശരത്‌കാലമാവുന്നതോടെ തിളങ്ങുന്ന ചുവപ്പായി മാറുന്നവയും. വടക്കേഅമേരിക്കയില്‍ കെട്ടിടങ്ങളിലും മതിലുകളിലും പടര്‍ത്താനായി വളര്‍ത്തുന്ന ഏറ്റവും സാധാരണയിനമാണ്‌ ഇത്‌.
ജര്‍മന്‍ ഐവി (Herniaria globra), ഗ്രൗണ്ട്‌ ഐവി(Nepeta glechoma) കെനില്‍വര്‍ത്‌ ഐവി (Linaria cymbalaria), പോയ്‌സണ്‍ ഐവി (Rhus toxicodendron) തുടങ്ങിയവ ഹെഡേറയുമായി ബന്ധവുമില്ലാത്ത ഇനങ്ങളാകുന്നു; ഇവയെല്ലാം തന്നെ പരസ്‌പരബന്ധമില്ലാത്ത സസ്യകുടുംബങ്ങളില്‍പ്പെടുന്നവയാണുതാനും
