This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
എസ്‌കിമോ
സര്‍വ്വവിജ്ഞാനകോശം സംരംഭത്തില്‍ നിന്ന്
എസ്‌കിമോ
Eskimo
അമേരിക്കന്‍ ഭൂഖണ്ഡത്തിന്റെ വടക്കേയറ്റത്ത്‌ (ഉത്തര ധ്രുവപ്രദേശങ്ങളില്‍) ചിതറിക്കിടക്കുന്ന ഒരു ജനവര്‍ഗം. ഗ്രീന്‍ലാന്‍ഡ്‌, ലാബ്രഡോര്‍, ഹഡ്‌സണ്‍ ഉള്‍ക്കടലിന്റെ സമീപപ്രദേശങ്ങള്‍, അലാസ്‌ക, അലൂഷ്യന്‍ ദ്വീപുകള്‍ തുടങ്ങിയ പ്രദേശങ്ങളില്‍ എസ്‌കിമോകള്‍ നിവസിക്കുന്നു. ഇരുപത്തിയൊന്നാം ശതകത്തിന്റെ ആദ്യ ദശകത്തില്‍ ഇവരുടെ ജനസംഖ്യ 1,35,000 ആണ്‌. ഇവരില്‍ 85,000 പേര് വടക്കേ അമേരിക്കയിലും 50,000 പേര് ഗ്രീന്‍ലാന്‍ഡിലും ശേഷിക്കുന്നവര്‍ സൈബീരിയയിലുമാണ്‌. യുപിക്‌, ഇനൂട്ട്‌ എന്നീ വിഭാഗങ്ങളിലായി ഇവരെ തരംതിരിച്ചിട്ടുണ്ട്‌. അനൂട്ട്‌ എന്ന ഒരു അവാന്തരവിഭാഗവുമുണ്ട്‌. വര്‍ഷത്തില്‍ ഒന്‍പത്‌ മാസവും കട്ടിയായ മഞ്ഞുമൂടിക്കിടക്കുന്ന പ്രദേശങ്ങളില്‍ ജീവിക്കുന്ന ഇവരുടെ സംഖ്യ കുറഞ്ഞുകൊണ്ടിരിക്കുകയാണ്‌. ഏകദേശം 2000 വര്‍ഷങ്ങള്‍ക്കുമുന്‍പ്‌ എസ്‌കിമോകള്‍ വടക്കേഅമേരിക്കന്‍ ഭൂഖണ്ഡത്തില്‍ എത്തിയെന്നാണ്‌ പുരാവസ്‌തു ഗവേഷകര്‍ അഭ്യൂഹിക്കുന്നത്‌. എസ്‌കിമോകള്‍ക്കും മറ്റു സൈബീരിയന്‍ ആദിവാസിവര്‍ഗങ്ങള്‍ക്കും പരസ്‌പര ഗോത്രബന്ധമുണ്ടായിരുന്നുവെന്നും അവര്‍ സമര്‍ഥിക്കുന്നു. എസ്‌കിമോകളുടെ ഉദ്‌ഭവം മംഗോളിയന്‍ വംശത്തില്‍ നിന്നാണെന്നും അമേരിന്ത്യന്‍ വര്‍ഗത്തില്‍നിന്നാണെന്നും രണ്ടഭിപ്രായങ്ങള്‍ ഉണ്ട്‌. ഒന്നാമത്തെ അഭിപ്രായത്തിനാണ്‌ കൂടുതല്‍ പ്രാബല്യം സിദ്ധിച്ചിട്ടുള്ളത്‌. മംഗോളിയന്‍ വംശലക്ഷണങ്ങളായ ഇളം മഞ്ഞത്തൊലി, കറുത്ത പരുക്കന്‍ തലമുടി, കറുത്തുചരിഞ്ഞ കണ്ണുകള്‍, ബലിഷ്‌ഠമായ ശരീരം, വിരിഞ്ഞ മാര്‍വിടം, വലിയ ഗണ്ഡാസ്ഥികളോടു കൂടിയ വിസ്‌തൃതമായ പരന്നമുഖം, ചെറിയ കൈകാലുകള്‍ എന്നിവയെല്ലാം എസ്‌കിമോകളിലും കാണപ്പെടുന്നു. നീണ്ട മൂക്കെല്ലും ഉയരമുള്ള തലയോട്ടിയും ഇവര്‍ക്കുണ്ട്‌. എന്നാല്‍ അമേരിന്ത്യരും യൂറോപ്യരുമായുള്ള സങ്കരണം നിമിത്തം യഥാര്‍ഥ എസ്‌കിമോകള്‍ എണ്ണത്തില്‍ കുറഞ്ഞുവരികയാണ്‌. 155 സെ.മീ. മുതല്‍ 165 സെ.മീ. വരെ ഉയരമുള്ള ഇവര്‍ പ്രതിദിനം ഏകദേശം രണ്ട്‌ മുതല്‍ നാല്‌ വരെ കിലോഗ്രാം തൂക്കം പച്ചമാംസം ഭക്ഷിക്കുന്നു. എസ്‌കിമോ എന്ന വാക്കിന്റെ അര്‍ഥം തന്നെ പച്ചമാംസം ഭക്ഷിക്കുന്നവന്‍ എന്നാണ്‌. ഇവര്‍ സസ്യാഹാരം കഴിക്കാറില്ല. ഒരു ജീവിയെ കിട്ടിയാല്‍ അതിന്റെ തോലും അസ്ഥിയും ഒഴികെ സര്‍വവും ഇവര്‍ ഭക്ഷിക്കുന്നു; അതിന്റെ രക്തംപോലും കുടിക്കുക സാധാരണമാണ്‌.
മത്സ്യബന്ധനവും വേട്ടയാടലും ആണ്‌ എസ്‌കിമോകളുടെ പ്രധാന ഉപജീവനമാര്‍ഗം. അത്യന്തം ശൈത്യമുള്ള ഉത്തരധ്രുവപ്രദേശങ്ങളില്‍ യാതൊരുവിധ കൃഷിയും സാധ്യമല്ല. തീരപ്രദേശങ്ങളില്‍ മഞ്ഞിനടിയില്‍ കാണപ്പെടുന്ന സീല്‍ എന്ന ജന്തുവിന്റെ ഇറച്ചി ഭക്ഷണത്തിനും കൊഴുപ്പ്‌ വിളക്കുകത്തിക്കുന്നതിനും തുകല്‍ വസ്‌ത്രങ്ങള്‍ ഉണ്ടാക്കുന്നതിനും കുടലുകള്‍ നൂലുണ്ടാക്കുന്നതിനും ഉപയോഗിക്കുന്നു. തിമിംഗലം, വാല്‍റസ്‌ തുടങ്ങിയവയും ബെലുഗാ എന്ന ഒരുതരം കടല്‍പ്പന്നിയും ഇവര്‍ക്ക്‌ സുലഭമായി ലഭിക്കുന്നു. കനേഡിയന്‍ എസ്‌കിമോകളുടെ ഇര കരിബൂ എന്ന ജീവിയാണ്‌. ഒരാള്‍ക്കുമാത്രം സഞ്ചരിക്കാവുന്നവിധത്തില്‍ പ്രതേ്യകം തയ്യാറാക്കിയ ചര്‍മനിര്‍മിതങ്ങളായ ചെറിയ ബോട്ടുകള്‍ (കായക്‌) എസ്‌കിമോകള്‍ ഉപയോഗിക്കുന്നു. തിരമാലകളില്‍നിന്നു രക്ഷപ്പെടത്തക്കവിധത്തിലാണ്‌ കായക്കുകള്‍ സംവിധാനം ചെയ്‌തിരിക്കുന്നത്‌.
എസ്‌കിമോകള്‍ ഒരു സ്ഥലത്തും സ്ഥിരമായി താമസിക്കുന്ന സ്വഭാവക്കാരല്ല. വസന്തകാലത്ത്‌ മീന്‍പിടിച്ചും വേനല്‍ക്കാലത്ത്‌ കടല്‍ ജീവികളെയും മഴക്കാലത്ത്‌ കരപ്രദേശങ്ങളിലെ മൃഗങ്ങളെയും വേട്ടയാടിയും ശീതകാലത്ത്‌ സീലിനെ പിടിച്ചും ഇവര്‍ കാലയാപനം ചെയ്യുന്നു. ഇവര്‍ രണ്ട്‌ തരത്തിലുള്ള വീടുകള്‍ നിര്‍മിക്കാറുണ്ട്‌. ഭൂമിക്കടിയില്‍ കുഴിച്ചുണ്ടാക്കിയിരിക്കുന്ന സ്ഥിരമായ വീടുകള്‍ക്ക്‌ 60 സെ.മീ. വീതിയിലുള്ള വാതിലുകള്‍ ഉണ്ടായിരിക്കും. മൃഗങ്ങളുടെയും മത്സ്യങ്ങളുടെയും അസ്ഥികള്‍കൊണ്ടാണ്‌ വീടുകള്‍ ഉറപ്പിച്ചുനിര്‍ത്തിയിരിക്കുന്നത്‌. വീടിനടകത്ത്‌ ചൂടും വെളിച്ചവും ലഭിക്കുന്നതിനുവേണ്ടി സീല്‍ നെയ്യ്‌ ഉപയോഗിച്ചു വിളക്ക്‌ കത്തിക്കുന്നു. മഞ്ഞുക്കട്ടകള്‍ കൊണ്ടുണ്ടാക്കുന്ന താത്‌കാലികവീടുകള്‍ "ഇഗ്ലൂ' എന്ന പേരില്‍ അറിയപ്പെടുന്നു. ഇരതേടി നടക്കുമ്പോള്‍ ഉപയോഗിക്കുന്നതിനുവേണ്ടിയുള്ളതാണ്‌ ഇവ. കനേഡിയന്‍ എസ്‌കിമോകളുടെ ഇടയില്‍ "ഇഗ്ലൂ' സര്‍വസാധാരണമാണ്‌; ചിലപ്പോള്‍ "ഇഗ്ലൂ' സ്ഥിരവാസകേന്ദ്രമായും ഉപയോഗിക്കാറുണ്ട്‌. വേനല്‍ക്കാലത്ത്‌ എസ്‌കിമോകള്‍ കൂടാരങ്ങളിലാണ്‌ താമസിക്കുന്നത്‌.
എസ്‌കിമോ സ്‌ത്രീകള്‍ സാധാരണമായി വസ്‌ത്രനിര്‍മാണത്തിലും തുന്നല്‍പ്പണികളിലും ഏര്‍പ്പെട്ട്‌ വീട്ടിനുള്ളില്‍ത്തന്നെ കഴിയുന്നു. മത്സ്യങ്ങളുടെയും മറ്റു ജന്തുക്കളുടെയും തുകല്‍ ഉപയോഗിച്ചാണ്‌ അവര്‍ വസ്‌ത്രങ്ങള്‍ നിര്‍മിക്കുന്നത്‌. സ്‌ത്രീകളുടെയും പുരുഷന്മാരുടെയും വസ്‌ത്രധാരണം ഒരേ രീതിയിലാണ്‌. സ്‌ത്രീകളുടെ കോട്ടിന്റെ പിറകില്‍ കുട്ടികളെ സൂക്ഷിക്കുന്നതിനായി ഒരു സഞ്ചി ഉണ്ടായിരിക്കും. തണുപ്പില്‍നിന്ന്‌ രക്ഷനേടുന്നതിനായി എസ്‌കിമോകള്‍ പല അടുക്ക്‌ വസ്‌ത്രങ്ങള്‍ ധരിക്കുന്നു. പാദങ്ങളില്‍ സീല്‍ ചര്‍മം കൊണ്ടുണ്ടാക്കിയ ബൂട്ടുകളാണ്‌ ധരിക്കുന്നത്‌. ഹിമാന്ധത (snow blindness) ബാധിക്കാതിരിക്കുന്നതിനുവേണ്ടി ഇവര്‍ നായാട്ടിനുപോകുമ്പോള്‍ അസ്ഥിയും ചര്‍മവും കൊണ്ടുണ്ടാക്കിയ കണ്ണട ധരിക്കുന്നു. നായാട്ടില്‍ സഹായിക്കുന്നതിന്‌ നായ്‌ക്കളെയും ഉപയോഗിക്കുന്നുണ്ട്‌.
സാധാരണയായി ആറോ ഏഴോ വീടുകള്‍ ചേര്‍ന്നതാണ്‌ എസ്‌കിമോ ഗ്രാമങ്ങള്‍. നാല്‌പതോ അന്‍പതോ ആളുകളേ ഒരു ഗ്രാമത്തില്‍ കാണുകയുള്ളൂ. ഓരോ ഗ്രാമത്തിലും ഓരോ തലവന്‍ ഉണ്ടായിരിക്കും; ഏറ്റവും നല്ല വേട്ടക്കാരനായിരിക്കും തലവന്‍. എസ്‌കിമോകളുടെ കുടുംബജീവിതം വളരെ സൗഹാര്‍ദപരമാണ്‌. നിയന്ത്രണങ്ങള്‍ ഇല്ലെന്നുതന്നെ പറയാം. ഇവര്‍ കുട്ടികളെ അപൂര്‍വമായേ ശിക്ഷിക്കാറുള്ളൂ. അതിനു രണ്ട്‌ കാരണങ്ങളുണ്ട്‌: ഒന്നാമത്‌, പല കുട്ടികളും വളരെനാള്‍ ജീവിക്കാറില്ല. രണ്ടാമത്‌ ഏതെങ്കിലും ബന്ധു മരിക്കുമ്പോള്‍ അതിനുശേഷം ജനിക്കുന്ന കുട്ടികള്‍ക്ക്‌ അയാളുടെ പേര് നല്‌കുകയും മരിച്ചയാളിന്റെ ആത്മാവ്‌ ഈ കുട്ടിയിലുണ്ടെന്ന്‌ വിശ്വസിക്കുകയും ചെയ്യുന്നു. എസ്‌കിമോകള്‍ സദാചാരനിഷ്‌ഠരല്ലെന്നുതന്നെ പറയാം. പെണ്‍കുട്ടികള്‍ ഋതുവാകുന്നതിനോടനുബന്ധിച്ച്‌ യാതൊരാചാരവും ഇവരുടെ ഇടയിലില്ല. വിവാഹത്തിന്‌ മുന്‍പ്‌ ലൈംഗികബന്ധത്തിലേര്‍പ്പെടുക സാധാരണമാണ്‌. വിവാഹച്ചടങ്ങുകള്‍ക്ക്‌ ആര്‍ഭാടങ്ങളില്ല. ധാരാളം കുട്ടികള്‍ ജനിക്കാറുണ്ട്‌. എസ്‌കിമോകളില്‍ ചിലര്‍ ക്ഷാമകാലത്ത്‌ ജനിക്കുന്ന കുട്ടികളെ കൊന്നുകളയുന്നു. അതിഥിസത്‌കാരപ്രിയരായ ഇക്കൂട്ടര്‍ സുഹൃത്തുക്കളെ സത്‌കരിക്കുന്നതിനായി ഭാര്യമാരെ നല്‌കുന്നില്‍ വിമുഖരല്ല; അന്ധവിശ്വാസങ്ങളിലധിഷ്‌ഠിതമാണ്‌ എസ്‌കിമോ മതം. പ്രതാരാധനയിലും നിര്‍ജീവവസ്‌തുക്കളിലെ ജീവത്വകല്‌പനയിലും ഇവര്‍ വിശ്വസിച്ചിരുന്നു. ഇക്കൂട്ടര്‍ ക്രിസ്‌തുമതാനുയായികളായതോടെ, ആചാരാനുഷ്‌ഠാനങ്ങളില്‍ ഗണ്യമായ വ്യത്യാസങ്ങളുണ്ടായിട്ടുണ്ട്‌.
18-ാം ശതകത്തില്‍, യൂറോപ്യരുടെ ആഗമനത്തോടുകൂടി എസ്‌കിമോകളുടെ ജീവിതരീതികളില്‍ സമൂലപരിവര്‍ത്തനം വന്നുതുടങ്ങി. അവരിലൂടെ കടന്നുവന്ന മാരകരോഗങ്ങള്‍ എസ്‌കിമോകളെ ഭയപ്പെടുത്തി. അവരുടെ ഉപജീവനമാര്‍ഗമായിരുന്ന മീന്‍പിടിത്തം യൂറോപ്യന്മാര്‍ ഏറ്റെടുത്തതോടെ അവരുടെ നിലനില്‌പുതന്നെ അപകടത്തിലായി. ഗ്രീന്‍ലാന്‍ഡിന്റെ ഉടമസ്ഥരായിരുന്ന ഡാനിഷ്‌ ഗവണ്‍മെന്റ്‌ 19-ാം ശതകത്തില്‍ ആ പ്രദേശം എസ്‌കിമോകള്‍ക്കുവേണ്ടി നീക്കിവച്ചതുകൊണ്ട്‌ അവിടത്തുകാര്‍മാത്രം നല്ല നിലയില്‍ കഴിഞ്ഞുപോന്നു. എന്നാല്‍ രണ്ടാം ലോകയുദ്ധത്തോടുകൂടി ഈ സ്ഥിതിമാറി; ഗ്രീന്‍ലാന്‍ഡ്‌ ഒരു പ്രധാന നാവികത്താവളമായി രൂപാന്തരപ്പെട്ടു. ഗ്രീന്‍ലാന്‍ഡിലെ എസ്‌കിമോകള്‍ക്കും വ്യോമ-നാവികമേഖലകളില്‍ പരിശീലനം നല്‌കുകയും അതില്‍ അവര്‍ വൈദഗ്‌ധ്യം നേടുകയും ചെയ്‌തു. ഡാനിഷ്‌ ഗവണ്‍മെന്റ്‌ അവരെ വിദ്യാസമ്പന്നരാക്കുകയും അവര്‍ക്കു രാഷ്‌ട്രീയ പ്രാതിനിധ്യം കൊടുക്കുകയും ചെയ്‌തു. ഇപ്പോള്‍ അവര്‍ക്ക്‌ ഡാനിഷ്‌ഭാഷയും വശമാണ്‌.
കാനഡയിലും എസ്‌കിമോകളെ പുനരുദ്ധരിക്കുന്നതിനും സംസ്‌കാരസമ്പന്നരാക്കുന്നതിനുംവേണ്ടിയുള്ള ശ്രമങ്ങള്‍ നടക്കുന്നുണ്ട്‌. 20,000-ത്തോളം എസ്‌കിമോകള്‍ ഉള്ള അലാസ്‌കയില്‍ പട്ടണങ്ങളുടെയും കാനിങ്‌ വ്യവസായത്തിന്റെയും വളര്‍ച്ചയോടുകൂടി എസ്‌കിമോകളുടെ ജീവിതത്തിന്റെ മുഖച്ഛായതന്നെ മാറിപ്പോയി. ഫാക്‌ടറികളില്‍ ജോലിയെടുക്കുകയും വെള്ളക്കാരെപ്പോലെ ജീവിതം നയിക്കുകയും ചെയ്യുന്ന ഇവര്‍ ഇപ്പോള്‍ യു.എസ്സിലെ വോട്ടവകാശമുള്ള പൗരന്മാരാണ്‌. വടക്കേഅമേരിക്കന്‍ എസ്‌കിമോകള്‍ എല്ലാവരുംതന്നെ ഇപ്പോള്‍ ഇംഗ്ലീഷ്‌ ഭാഷ സംസാരിക്കുകയും വിദ്യാഭ്യാസം നേടുകയും ചെയ്യുന്നതുകൊണ്ട്‌ എല്ലാത്തുറകളിലും അവര്‍ മുന്നേറിക്കൊണ്ടിരിക്കുന്നു. നിര്‍ഭാഗ്യവശാല്‍ അമേരിന്ത്യരെപ്പോലെ എസ്‌കിമോകളും വെള്ളക്കാരില്‍നിന്ന്‌ വര്‍ണവിദേ്വഷം അനുഭവിക്കുന്നവരാണ്‌.
