This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.

Reading Problems? see Enabling Malayalam

എഫേസസ്‌

സര്‍വ്വവിജ്ഞാനകോശം സംരംഭത്തില്‍ നിന്ന്

എഫേസസ്‌

Ephesus

ആര്‍ട്ടിമിസ്‌ ദേവാലയത്തിന്റെ അവശിഷ്‌ടങ്ങള്‍

ഏഷ്യാമൈനറിലെ ലിബിയയിലുണ്ടായിരുന്ന പ്രാചീന അയോണിയന്‍ നഗരം. ഏഷ്യയിലെ 12 അയോണിയന്‍ കോളനികളില്‍ ഏറ്റവും പ്രമുഖമായ ഈ നഗരം കെയ്‌സ്റ്റര്‍ നദീതീരത്തു സ്ഥിതിചെയ്‌തിരുന്നു. ബി.സി. 1000-ത്തോടടുപ്പിച്ചായിരിക്കണം ഇതു സ്ഥാപിക്കപ്പെട്ടതെന്നു അനുമാനിക്കാവുന്ന രേഖകള്‍ ലഭിച്ചിട്ടുണ്ട്‌. ഇത്‌ ബി.സി. ആറാം ശതകത്തില്‍ ലീഡിയയിലെ ക്രാസസ്സിന്റെയും പിന്നീടു പേര്‍ഷ്യയുടെ സൈറസ്സിന്റെയും രാജവാഴ്‌ചയില്‍ വര്‍ത്തിച്ചു. ബി.സി. 4-ാം ശതകത്തിന്റെ ആരംഭത്തില്‍ ഈ നഗരം ആഥന്‍സിനു കപ്പം കൊടുത്തിരുന്നതായും വീണ്ടും പേര്‍ഷ്യയുടെ അധികാരത്തില്‍ വന്നുചേര്‍ന്നതായും കാണുന്നു. മഹാനായ അലക്‌സാണ്ടര്‍ പേര്‍ഷ്യ കീഴടക്കിയതോടെ മാസിഡോണിയയുടെയും തുടര്‍ന്നു സെല്യൂസിസ്സുകളുടെയും മേല്‌ക്കോയ്‌മയ്‌ക്കു വിധേയമായി. പിന്നീട്‌ ഇത്‌ ഏഷ്യയിലെ റോമന്‍ പ്രവിശ്യയുടെ തലസ്ഥാനമായിത്തീര്‍ന്നു. ഈ നഗരത്തിന്റെ പതനം പ്രധാനമായും ഇതിലെ തുറമുഖം എക്കലടിഞ്ഞ്‌ ഉപയോഗശൂന്യമായി പരിണമിച്ചതുമൂലമായിരുന്നു.

എഫേസസ്‌ നഗരം ആര്‍ട്ടിമിസ്‌ (ഡയാന) ദേവതയുടെ ആരാധനാകേന്ദ്രം എന്ന നിലയില്‍ അതിപ്രശസ്‌തമായിത്തീര്‍ന്നു. ഇവിടെയുള്ള ആര്‍ട്ടിമിസ്‌ ദേവാലയം പ്രാചീന ലോകത്തിലെ ഏഴ്‌ അദ്‌ഭുതങ്ങളില്‍ ഒന്നായി എണ്ണപ്പെട്ടിരുന്നു. ക്രിസ്‌തുമതത്തിന്റെ അതിപ്രാചീന ആസ്ഥാനങ്ങളില്‍ ഒന്നായിരുന്ന ഈ നഗരം സെന്റ്‌ പോള്‍ മൂന്ന്‌ പ്രാവശ്യം സന്ദര്‍ശിച്ചിട്ടുള്ളതായി പറയപ്പെടുന്നു. കന്യാമറിയവും വിശുദ്ധ ലൂക്കോസും തങ്ങളുടെ അവസാന നാളുകള്‍ കഴിച്ചുകൂട്ടിയത്‌ ഇവിടെയാണെന്നു വിശ്വസിക്കപ്പെടുന്നു. പ്രസിദ്ധ ദാര്‍ശനികനായ ഹെറാക്ലിറ്റസിന്റെ ജന്മസ്ഥലം എന്ന നിലയിലും ഈ നഗരത്തിനു പ്രസിദ്ധിയുണ്ട്‌. ഒരു തിയെറ്റര്‍, ഒരു സ്റ്റേഡിയം, സംഗീത കാവ്യമത്സരങ്ങള്‍ സംഘടിപ്പിച്ചിരുന്ന വിശാലമായ ഒരു ശാല (odeum) എന്നിവയുടെയും ആര്‍ട്ടിമിസ്‌ ദേവാലയത്തിന്റെയും ഭഗ്നാവശിഷ്‌ടങ്ങള്‍ കണ്ടെടുക്കപ്പെട്ടിട്ടുണ്ട്‌. ഈ നഗരം ഉത്‌ഖനനം നടത്തിയവരില്‍ ജെ.ടി. വുഡ്‌, ഡി.ജി. ഹോഗര്‍ത്ത്‌ എന്നിവരുടെ പേരുകള്‍ പ്രത്യേക സ്‌മരണയര്‍ഹിക്കുന്നു.

"http://web-edition.sarvavijnanakosam.gov.in/index.php?title=%E0%B4%8E%E0%B4%AB%E0%B5%87%E0%B4%B8%E0%B4%B8%E0%B5%8D%E2%80%8C" എന്ന താളില്‍നിന്നു ശേഖരിച്ചത്
താളിന്റെ അനുബന്ധങ്ങള്‍
സ്വകാര്യതാളുകള്‍