This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
എപ്‌സ്റ്റൈന്‍, ജേക്കബ്‌ (1880 - 1959)
സര്‍വ്വവിജ്ഞാനകോശം സംരംഭത്തില്‍ നിന്ന്
എപ്‌സ്റ്റൈന്‍, ജേക്കബ്‌ (1880 - 1959)
Epstein, Jacob
യു.എസ്‌. പ്രതിമാശില്‌പി. 1880 ന. 10-ന്‌ പോളിഷ്‌-റഷ്യന്‍ മാതാപിതാക്കളുടെ പുത്രനായി ന്യൂയോര്‍ക്കില്‍ ജനിച്ചു. 1902-ല്‍ പാരിസിലേക്കു പോയി. 1905 മുതല്‍ ഇംഗ്ലണ്ടില്‍ താമസമുറപ്പിച്ചു. 1907-ല്‍ ബ്രിട്ടീഷ്‌ മെഡിക്കല്‍ അസോസിയേഷന്‍ മന്ദിരത്തിന്റെ ആവശ്യത്തിലേക്കായി 18 പ്രതിമകള്‍ കൊത്തിയുണ്ടാക്കുവാന്‍ നിയുക്തനായി; 1908-ല്‍ അവ സ്ഥാപിക്കപ്പെട്ടു. താമ്രത്തില്‍ ഇദ്ദേഹം രചിച്ചിട്ടുള്ള ഛായാരൂപങ്ങള്‍ സ്ഥൂലാകാരങ്ങളാണ്‌. ഇവ റോഡിന്‍കൃതികളെ അനുസ്‌മരിപ്പിക്കുന്നു. റോഡിന്‍ എന്ന വിശ്രുത കലാകാരനെയാണ്‌ ഇദ്ദേഹം മാതൃകയായി സ്വീകരിക്കുകയും അനുകരിക്കുകയും ചെയ്‌തിട്ടുള്ളത്‌.
റോഡിന്‍മാതൃകയിലുള്ള ഇദ്ദേഹത്തന്റെ പല കലാസൃഷ്‌ടികളും പൊതുജനങ്ങളുടെ അഭിനന്ദനത്തിനു പാത്രമായിട്ടുണ്ട്‌. ഏറ്റവും മികച്ച ഉദാഹരണം ബ്രിട്ടീഷ്‌ പാര്‍ലമെന്റ്‌ മന്ദിരത്തിനു മുന്‍പിലുള്ള സ്‌മട്‌സിന്റെ രൂപമാണ്‌. ഇദ്ദേഹത്തിന്റെ കലാസൃഷ്‌ടികള്‍ ബര്‍ഡീന്‍, ആക്‌ലന്‍ഡ്‌, ബര്‍മിങ്‌ഹാം, ഹള്‍, ലാന്‍ഡഫ്‌കത്തീഡ്രല്‍, വെസ്റ്റ്‌മിനിസ്റ്റര്‍ ആബി, സെന്റ്‌പോള്‍സ്‌, ഇംപീരിയല്‍ വാര്‍ മ്യൂസിയം, ഹോളി ചൈല്‍ഡകോണ്‍വെന്റ്‌, മാഞ്ചസ്റ്റര്‍, ന്യൂയോര്‍ക്ക്‌, ഓക്‌സ്‌ഫഡ്‌, പാരിസ്‌ എന്നിവിടങ്ങളില്‍ സൂക്ഷിച്ചിട്ടുണ്ട്‌. ഹൈഡ്‌ പാര്‍ക്കില്‍ സ്ഥാപിച്ചിട്ടുള്ള റിമ (1925), വെസ്റ്റ്‌മിനിസ്റ്ററിലെ ലണ്ടന്‍ ട്രാന്‍സ്‌പോര്‍ട്ട്‌ മന്ദിരത്തിലെ കൊത്തുപണി (1928-1929) എന്നിവ എപ്‌സ്റ്റൈന്‍ന്റെ പ്രമുഖ രചനകളാണ്‌. 1940-ല്‍ ഇദ്ദേഹത്തിന്റെ ലെറ്റ്‌ ദേര്‍ ബി സ്‌കള്‍പ്‌ചര്‍ എന്ന ആത്മകഥ പ്രകാശിതമായി. പാരിസില്‍ ഓസ്‌കര്‍ വൈല്‍ഡിന്റെ ശവകുടീരം ഇദ്ദേഹത്തിന്റെ ശില്‌പ വൈദഗ്‌ധ്യത്തിന്റെ പ്രതീകമായി നിലകൊള്ളുന്നു. യഥാതഥമായ നിര്‍മാണ രീതിയാണ്‌ ഇദ്ദേഹിത്തന്റെ കലാസൃഷ്‌ടികളില്‍ കാണുന്നത്‌.
1954-ല്‍ ഇദ്ദേഹത്തിനു സര്‍സ്ഥാനം ലഭിച്ചു. 1959 ആഗ. 19-ന്‌ എപ്‌സ്റ്റൈന്‍ ലണ്ടനില്‍ അന്തരിച്ചു.
