This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.

Reading Problems? see Enabling Malayalam

എപ്പിഡെർമിസ്‌

സര്‍വ്വവിജ്ഞാനകോശം സംരംഭത്തില്‍ നിന്ന്

എപ്പിഡെര്‍മിസ്‌

Epidermis

ത്വക്കിന്റെ ഏറ്റവും ഉപരിതലത്തിലുള്ള ആവരണമാണ്‌ എപ്പിഡെര്‍മിസ്‌. ഇതിന്‌ ബേസല്‍ എന്നും സുപ്രാബേസല്‍ എന്നും പേരുള്ള രണ്ടുപാളികളുണ്ട്‌. അടിയിലുള്ള പാളിക്കാണ്‌ ബേസല്‍.എന്നു പറയുന്നത്‌. ഉപരിതല പാളിയാണ്‌ സുപ്രാബേസല്‍. ശരീരത്തിനുള്ള സുരക്ഷാകവചമാണ്‌ എപ്പിഡെര്‍മിസ്‌ എന്നു പറയാം. മനുഷ്യരില്‍ എപ്പിഡെര്‍മിസ്‌ ഏറ്റവും ലോലമായി കാണുന്നത്‌ കണ്‍പോളകളിലാണ്‌. എന്നാല്‍ കൈപ്പത്തിക്കുള്ളിലും കാല്‌പാദങ്ങളിലും ഈ സ്‌തരത്തിന്‌ കട്ടി കൂടുതലാണ്‌. എപ്പിഡെര്‍മിസിന്റെ രണ്ടുപ്രധാനഭാഗങ്ങളില്‍ നിരവധി ആന്തരികപടലങ്ങളുണ്ട്‌. കോര്‍ണിഫൈഡ്‌ പടലം, ട്രാന്‍സ്‌ലൂസന്റ്‌ പടലം, ഗ്രാനുലാര്‍ പടലം, സ്‌പൈനസ്‌ പടലം, ജേര്‍മിനല്‍ പടലം എന്നിവയാണ്‌ ഈ ആന്തരികപാളികള്‍.

ബേസല്‍ പാളിയില്‍ നടക്കുന്ന കോശവിഭജനത്തിന്റെ ഫലമായാണ്‌ സ്‌ക്വാമസ്‌ എപ്പിത്തീലിയം സംരക്ഷിക്കപ്പെടുന്നത്‌. ബേസല്‍ പാളിയില്‍ നിന്ന്‌ വേര്‍തിരിയുന്ന കോശങ്ങളാണ്‌ എപ്പിഡെര്‍മിസിന്റെ ബാഹ്യാവരണമായി പരിണമിക്കുന്നത്‌. ഒരു പ്രത്യേക സമയപരിധി കഴിയുമ്പോള്‍ ഈ കോശങ്ങളുടെ ന്യൂക്ലിയസ്‌ നഷ്‌ടപ്പെട്ടുപോവുകയും തുടര്‍ന്ന്‌ കോശപാളി കൊഴിഞ്ഞുപോകുകയും ചെയ്യുന്നു. സാധാരണ ആരോഗ്യമുള്ള ത്വക്കില്‍, ബേസല്‍ പാളിയില്‍ നിന്നു ഉപരിതലത്തിലേക്കു വരുന്ന കോശങ്ങളുടെ എണ്ണത്തിനു തുല്യമായിരിക്കും പൊഴിഞ്ഞുപോകുന്ന കോശങ്ങളുടെ എണ്ണം. ബേസല്‍കോശപാളിയില്‍നിന്നും ഗ്രാനുലാര്‍ കോശപാളിയിലേക്ക്‌ എത്താന്‍ രണ്ടാഴ്‌ചയും അവിടെനിന്നും സ്‌ട്രാറ്റം കോര്‍നിയത്തില്‍ എത്താന്‍ നാലാഴ്‌ചയും വേണ്ടിവരും. ഒരു എപ്പിഡെര്‍മിസ്‌ പാളി നൂതനമായ മറ്റൊന്നായി മാറാനുള്ള കാലഘട്ടം 48 ദിവസമാണ്‌.

എപ്പിഡെര്‍മിസില്‍ രക്തക്കുഴലുകള്‍ ഉണ്ടാവില്ല. ഡെര്‍മിസില്‍ നിന്നും ഡിഫ്യൂഷന്‍ അഥവാ വ്യാപനപ്രക്രിയ വഴിയാണ്‌ പോഷകങ്ങള്‍ എപ്പിഡെര്‍മിസില്‍ എത്തുന്നത്‌. കെരറ്റിനോസൈറ്റുകള്‍, മെലനോസൈറ്റുകള്‍, ലാംഗര്‍ഹാന്‍ കോശങ്ങള്‍, മെര്‍ക്കര്‍കോശം, ഇന്‍ഫ്‌ളമേറ്ററി കോശങ്ങള്‍ എന്നിവയാണ്‌ എപ്പിഡെര്‍മിസില്‍ ഉള്ളത്‌.

മെലാനിന്‍ എന്ന വര്‍ണവസ്‌തുവിന്റെ ഏറ്റക്കുറച്ചില്‍ അനുസരിച്ചാണ്‌ ത്വക്കിന്റെ നിറം വ്യത്യാസപ്പെടുന്നത്‌. മെലനോസൈറ്റുകളിലാണ്‌ ഈ വര്‍ണവസ്‌തു ഉള്ളത്‌. മെലാനിന്‍ കൂടുന്നതിനനുസരിച്ച്‌ എപ്പിഡെര്‍മിസ്‌ എന്ന ബാഹ്യാവരണത്തിന്റെ കറുപ്പുനിറം കൂടുന്നു. കെരറ്റിനോസൈറ്റുകള്‍ എന്ന കോശങ്ങളിലെ മെലനോസോമുകള്‍, അള്‍ട്രാവയലറ്റ്‌ റേഡിയേഷനുമായി സമ്പര്‍ക്കമുണ്ടാകുമ്പോള്‍ കൂടുന്നു.

(സുരേന്ദ്രന്‍ ചുനക്കര)

താളിന്റെ അനുബന്ധങ്ങള്‍
സ്വകാര്യതാളുകള്‍