This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.

Reading Problems? see Enabling Malayalam

എന്‍ജിനീയറിങ്‌

സര്‍വ്വവിജ്ഞാനകോശം സംരംഭത്തില്‍ നിന്ന്

എന്‍ജിനീയറിങ്‌

Engineering

കെട്ടിടം, പാലം, അണക്കെട്ട്‌ മുതലായ സംരചനകള്‍ (structures), യന്ത്രങ്ങള്‍ (machines), ഉപകരണങ്ങള്‍ (apparatus), നിര്‍മാണപ്രക്രമങ്ങള്‍ (manufacturing processes) മുതലായവ ഡിസൈന്‍ ചെയ്യുന്നതിനോ, വികസിപ്പിക്കുന്നതിനോ, പ്രതേ്യക പ്രവര്‍ത്തനാവസ്ഥകളില്‍ ഇവയുടെ സവിശേഷസ്വഭാവങ്ങള്‍ മുന്‍കൂട്ടി കണ്ടുപിടിക്കുന്നതിനോ, ക്രിയാത്മകമായും, പ്രായോഗികമായും ശാസ്‌ത്രതത്ത്വങ്ങള്‍ ഉപയോഗിക്കുന്ന സമ്പ്രദായം.

ആദ്യകാലത്ത്‌ യുദ്ധോപകരണങ്ങളുടെ നിര്‍മാണവും സൈനികാവശ്യങ്ങള്‍ക്കുള്ള മറ്റു നിര്‍മാണ പ്രവര്‍ത്തനങ്ങളും മാത്രമാണ്‌ എന്‍ജിനീയറിങ്‌ എന്ന വാക്കിന്റെ പരിധിയില്‍പ്പെട്ടിരുന്നത്‌. മിലിട്ടറി എന്‍ജീനിയറെ മാത്രമാണ്‌ എന്‍ജിനീയര്‍ എന്നു വ്യവഹരിച്ചിരുന്നത്‌. 18-ാം നൂറ്റാണ്ടിന്റെ മധ്യത്തോടെ ഒരു പുതിയ വിഭാഗം എന്‍ജിനീയര്‍മാര്‍ രംഗത്തുവന്നു. പൂര്‍ണമായി സൈനികാവശ്യത്തിനെന്നു പറയാന്‍ നിര്‍വാഹമല്ലാത്ത റോഡുനിര്‍മാണം പോലുള്ള പ്രവര്‍ത്തനങ്ങളിലേര്‍പ്പെട്ടവരായിരുന്നു അവര്‍. ഈ പുതിയ വിഭാഗത്തെ, സൈനിക എന്‍ജിനീയര്‍മാരില്‍ നിന്നു തിരിച്ചറിയുന്നതിന്‌ സിവില്‍ എന്‍ജിനീയര്‍മാര്‍ എന്നു വിളിക്കാനും ആരംഭിച്ചു. സിവില്‍ എന്‍ജിനീയറിങ്ങിന്റെ ലക്ഷ്യം, പ്രവര്‍ത്തനമേഖല എന്നിവയെക്കുറിച്ച്‌ ഇന്‍സ്റ്റിറ്റ്യൂഷന്‍ ഒഫ്‌ സിവില്‍ എന്‍ജിനീയേഴ്‌സി(ലണ്ടന്‍)ന്റെ ചാര്‍ട്ടര്‍ (1828) പ്രകാരം, മനുഷ്യന്റെ സൗകര്യവര്‍ധനവിനും ഉപയോഗത്തിനും വേണ്ടിയുള്ള ഉത്‌പാദനാവശ്യങ്ങള്‍ക്കായി പ്രകൃതിയിലെ ശക്തിസ്രാതസ്സുകള്‍ ഉപയോഗപ്പെടുത്തുകയും, വ്യാപാരവികസനത്തിനും ഗതാഗതവികസനത്തിനും വേണ്ടി റോഡുകള്‍, പാലങ്ങള്‍, അക്വിഡക്‌റ്ററുകള്‍, കനാലുകള്‍, തുറമുഖങ്ങള്‍, ബ്രക്ക്‌ വാട്ടറുകള്‍, ദീപസ്‌തംഭങ്ങള്‍, വിവിധതരം യന്ത്രങ്ങള്‍, മലിനവസ്‌തുക്കളുടെ നിര്‍മാര്‍ജന സംവിധാനങ്ങള്‍, കെട്ടിടങ്ങള്‍ മുതലായവ നിര്‍മിക്കുകയും ചെയ്യുന്ന വിദ്യയാണ്‌ സിവില്‍ എന്‍ജിനീയറിങ്‌. ഇതില്‍ നിന്ന്‌ അന്ന്‌ നിലവിലുണ്ടായിരുന്ന എല്ലാ സൈനികേതര എന്‍ജിനീയറിങ്‌ പ്രവര്‍ത്തനങ്ങളും സിവില്‍ എന്‍ജിനീയറിങ്ങിന്റെ പരിധിയിലാണ്‌ ഉള്‍പ്പെടുത്തിയിരുന്നതെന്നു കാണാം.

കാലക്രമേണ എന്‍ജിനീയറിങ്ങില്‍ കൂടുതല്‍ പ്രതേ്യകവത്‌കൃതശാഖകള്‍ ഉരുത്തിരിഞ്ഞുവന്നു. സിവില്‍ എന്‍ജിനിയറിങ്ങില്‍ നിന്നു വേറിട്ട്‌ തനതായ വ്യക്തിത്വം ആദ്യം സ്ഥാപിച്ച എന്‍ജിനീയറിങ്‌ ശാഖ മെക്കാനിക്കല്‍ എന്‍ജിനീയറിങ്ങാണ്‌. യന്ത്രങ്ങള്‍, യന്ത്രാപകരണങ്ങള്‍ (machine tools), സ്വയംചാലിതയന്ത്രാവലി മുതലായവയാണ്‌ മെക്കാനിക്കല്‍ എന്‍ജിനിയറിങ്ങിന്റെ പ്രവര്‍ത്തന പരിധിയില്‍പ്പെടുന്നത്‌. കല്‍ക്കരി, ലോഹഅയിരുകള്‍ തുടങ്ങിയവയുടെ ഖനനവുമായി ബന്ധപ്പെട്ട ഖനന എന്‍ജിനീയറിങ്‌ (mining engineering) എന്ന ശാഖ പിന്നീട്‌ രൂപം കൊണ്ടു.

ഇലക്‌ട്രിക്കല്‍ എന്നും ഇലക്‌ട്രിക്‌ ആന്‍ഡ്‌ ഇലക്‌ട്രാണിക്‌സ്‌ എന്‍ജിനീയറിങ്‌ എന്നും അറിയപ്പെടുന്ന എന്‍ജിനീയറിങ്‌ വിഭാഗത്തില്‍ ഇലക്‌ട്രിസിറ്റി ഇലക്‌ട്രാണിക്‌സ്‌ ഇലക്‌ട്രാമാഗ്നറ്റിസം എന്നിവ ഉള്‍പ്പെടുന്നു. മര്‍ദ്ദം, പ്രവാഹം, താപം എന്നീ ഭൗതിക മാറ്റങ്ങള്‍ അളക്കുന്നതിനുള്ള ഉപകരണങ്ങള്‍ ഡിസൈന്‍ ചെയ്യുന്നതിനുള്ള വിഭാഗമാണ്‌ ഇന്‍സ്‌ട്രുമെന്റേഷന്‍ എന്‍ജിനീയറിങ്‌. മെഡിക്കല്‍ മേഖലയ്‌ക്കാവശ്യമായ ഉപകരണങ്ങള്‍ ഡിസൈന്‍ ചെയ്യാന്‍ വേണ്ടിയുള്ള ഒരു എന്‍ജിനീയറിങ്‌ വിഭാഗമാണ്‌ ബയോമെഡിക്കല്‍ എന്‍ജിനീയറിങ്‌. ഭൗതിക ശാസ്‌ത്രത്തിന്റെയും രസതന്ത്രത്തിന്റെയും ഗണിതശാസ്‌ത്രത്തിന്റെയും പ്രയോഗംവഴി അസംസ്‌കൃതപദാര്‍ഥത്തെയോ രാസവസ്‌തുക്കളെയോ പരിവര്‍ത്തനം ചെയ്‌ത്‌ കൂടുതല്‍ ഉപയോഗപ്രദവും വിലപിടിപ്പുമുള്ള രൂപത്തിലാക്കുന്ന വിഭാഗമാണ്‌ കെമിക്കല്‍ എന്‍ജിനീയറിങ്‌. ലോഹസംബന്ധമായ എല്ലാവിധ വിഷയങ്ങളും കൈകാര്യം ചെയ്യുന്ന വിശാലമായ ഒരു എന്‍ജിനീയറിങ്‌ വിഭാഗമാണ്‌ മെറ്റലര്‍ജിക്കല്‍ എന്‍ജിനീയറിങ്‌. ഇതില്‍ ഫിസിക്കല്‍ മെറ്റലര്‍ജി, എക്‌സ്‌ട്രാക്‌റ്റീവ്‌ മെറ്റലര്‍ജി, മിനറല്‍ പ്രാസസിങ് എന്നീ മൂന്നു വിഭാഗങ്ങളുണ്ട്‌. കാര്‍ഷിക ഉത്‌പാദനത്തിനും സംസ്‌കരണത്തിനും വേണ്ടിയാണ്‌ കാര്‍ഷിക എന്‍ജിനിയറിങ്ങിനെ ഉപയോഗപ്പെടുത്തുന്നത്‌. പ്രകൃതിവിഭവങ്ങളുടെ മാനേജുമെന്റും ഈ വിഭാഗത്തിലുള്‍പ്പെടുന്നു. കപ്പലുകള്‍ക്കാവശ്യമായ ഉപകരണങ്ങളുടെ രൂപകല്‌പനാ നിര്‍മാണം എന്നിവയുമായി ബന്ധപ്പെട്ടു കിടക്കുന്ന എന്‍ജിനീയറിങ്‌ വിഭാഗമാണ്‌ മറൈന്‍ എന്‍ജിനീയറിങ്‌. വിമാനങ്ങള്‍ ബഹിരാകാശ വാഹനങ്ങള്‍ മറ്റ്‌ അനുബന്ധവിഷയങ്ങള്‍ എന്നിവയാണ്‌ എയ്‌റോസ്‌പേഡ്‌ എന്‍ജിനിയറിങ്ങില്‍ ഉള്‍പ്പെടുത്തിയിട്ടുള്ളത്‌. മുമ്പ്‌ എയ്‌റോനോട്ടിക്കല്‍ എന്‍ജിനീയറിങ്‌ എന്നാണ്‌ ഇതറിയപ്പെട്ടിരുന്നത്‌. ഇലക്‌ട്രിക്കല്‍ എന്‍ജിനീയറിങ്ങിന്റെയും കംപ്യൂട്ടര്‍ സയന്‍സിന്റെയും ഘടകങ്ങള്‍ ഉള്‍ക്കൊള്ളിച്ച്‌ രൂപപ്പെടുത്തിയ വിഭാഗമാണ്‌ കംപ്യൂട്ടര്‍ എന്‍ജിനീയറിങ്‌. സോഫ്‌ട്‌വെയര്‍ വികസനം ഹാര്‍ഡ്‌വെയര്‍ സമാകലനം, സര്‍ക്യൂട്ട്‌ ഡിസൈന്‍, സിസ്റ്റം ലെവല്‍ രൂപകല്‌പനയും സമാകലനവും എന്നിവയാണ്‌ ഈ മേഖലയില്‍ ഉള്‍പ്പെടുന്നത്‌. ഇന്‍ഫര്‍മേഷന്‍ ടെക്‌നോളജിയില്‍ കംപ്യൂട്ടര്‍ ഉപയോഗിച്ചുള്ള വിവരവ്യൂഹങ്ങളുടെ, പ്രതേ്യകിച്ച്‌ സോഫ്‌റ്റ്‌വെയര്‍, ഹാര്‍ഡ്‌വെയര്‍ എന്നിവയുടെ പഠനം, ഡിസൈന്‍, വികസനം, ഇംപ്ലിമെന്റേഷന്‍ തുടങ്ങിയവ ഉള്‍പ്പെടുന്നു.

മേല്‌പറഞ്ഞ ഓരോ ശാഖയ്‌ക്കും ഒട്ടേറെ ഉപശാഖകളുമുണ്ട്‌. സാനിട്ടറി, സ്‌ട്രക്‌ചറല്‍, ഡ്രയിനേജ്‌, ഹൈവേ, ട്രാഫിക്‌, റയില്‍വേ, ആവിശക്തി, ആന്തരദഹനം (internal combustion), വെല്‍ഡിങ്‌, ഉത്‌പാദനം (production), പെട്രാളിയം, അഗ്നിപ്രതിരോധം (fire protection), ആര്‍ക്കി ടെക്‌ചറല്‍, ന്യൂക്ലിയര്‍, മാനേജ്‌മെന്റ്‌ മതുലായ എന്‍ജിനിയറിങ്‌ ഉപശാഖകള്‍ ഉദാഹരണങ്ങളാണ്‌. എന്‍ജിനീയറിങ്ങില്‍ "നാനോ ടെക്‌നോളജി' എന്ന പുതിയ വിഭാഗവും ആവിര്‍ഭവിച്ചിട്ടുണ്ട്‌. നോ. ആര്‍ക്കിടെക്‌ചറല്‍ എന്‍ജിനീയറിങ്‌; ഇലക്‌ട്രിക്കല്‍ എന്‍ജിനീയറിങ്‌; ഇലക്‌ട്രാണിക വാര്‍ത്താവിനിമയം; ഇന്‍ഡസ്‌ട്രിയല്‍ എന്‍ജിനീയറിങ്‌; ഉത്‌പാദന എന്‍ജിനീയറിങ്‌; എയ്‌റോസ്‌പേസ്‌ എന്‍ജിനീയറിങ്‌; എന്‍ജിനീയറിങ്‌ വിദ്യാഭ്യാസം; ഓട്ടോമേഷന്‍; ഓട്ടോമൊബൈല്‍ എന്‍ജിനീയറിങ്‌; കാര്‍ഷിക എന്‍ജിനീയറിങ്‌; കെമിക്കല്‍ എന്‍ജിനീയറിങ്‌; ന്യൂക്ലിയര്‍ എന്‍ജിനീയറിങ്‌; മറൈന്‍ എന്‍ജിനീയറിങ്‌; മെക്കാനിക്കല്‍ എന്‍ജിനീയറിങ്‌; സിവില്‍ എന്‍ജിനീയറിങ്‌; സൈനിക എന്‍ജിനീയര്‍മാര്‍, കംപ്യൂട്ടര്‍ എന്‍ജിനീയറിങ്‌, ഇന്‍ഫര്‍മേഷന്‍ ടെക്‌നോളജി, കാര്‍ഷിക എന്‍ജിനീയറിങ്‌, നാനോടെക്‌നോളജി

താളിന്റെ അനുബന്ധങ്ങള്‍
സ്വകാര്യതാളുകള്‍