This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഈഫൽ, അലക്‌സാണ്ടർ ഗുസ്‌താവ്‌ (1832 - 1923)
സര്‍വ്വവിജ്ഞാനകോശം സംരംഭത്തില്‍ നിന്ന്
ഈഫൽ, അലക്‌സാണ്ടർ ഗുസ്‌താവ്‌ (1832 - 1923)
Eiffel, Alexandre Gustave
ഫ്രഞ്ച്‌ എന്‍ജിനീയർ. 1832 ഡി. 15-ന്‌ ഡിയോനിൽ ജനിച്ചു. യൂറോപ്പിൽ അക്കാലത്തെ ഏറ്റവും വലിയ ഇരുമ്പുപാലങ്ങള്‍, വലിയ അണക്കെട്ടുകള്‍ മുതലായവ നിർമിച്ച്‌ പ്രസിദ്ധി നേടിയ ഈഫലിന്റെ ഏറ്റവും പ്രശസ്‌തമായ സൃഷ്‌ടി പാരിസിലെ ഈഫൽ ഗോപുരമാണ്‌. 1889-ൽ പാരിസ്‌ എക്‌സിബിഷനുവേണ്ടി നിർമിച്ചതാണ്‌ ഈ ഗോപുരം. 19-ാം നൂറ്റാണ്ടിലെ എന്‍ജിനീയറിങ്‌ വൈദഗ്‌ധ്യത്തിന്റെ ഒരു സ്‌മാരകമായാണ്‌ ഇതു കരുതപ്പെടുന്നത്‌. 1867, 1878, 1889 എന്നീ വർഷങ്ങളിലെ പാരിസ്‌ എക്‌സിബിഷനുകള്‍ക്കുവേണ്ടിയുള്ള കെട്ടിട നിർമാണവുമായി ബന്ധപ്പെട്ടിരുന്നുവെങ്കിലും ഇദ്ദേഹത്തിന്റെ പ്രധാന താത്‌പര്യം പാലം പണിയിലായിരുന്നു. പോർച്ചുഗലിലെ ഡ്യൂറോനദിക്കു കുറുകേ നിർമിച്ചിട്ടുള്ളതും (1877) വായുവിൽ തങ്ങിനില്‌ക്കുന്നതുപോലെ തോന്നിക്കുന്നതുമായ കമാനപ്പാലവും ഇദ്ദേഹത്തിന്റെ സൃഷ്‌ടിയാണ്‌. ഈപാലത്തിന്റെ കമാനസ്‌പാന്‍ 162 മീറ്ററും ഉയരം 61 മീറ്ററുമാണ്‌. ഈഫൽ നിർമിച്ച പാലങ്ങളിൽ ഏറ്റവും ശ്രദ്ധേമായത്‌ ദക്ഷിണഫ്രാന്‍സിലെ ഗാരാബിറ്റ്‌ വയാഡക്‌ട്‌ ആണ്‌ (1884). ഇതിന്റെ കമാനസ്‌പാന്‍, ഉയരം, നീളം എന്നിവ ക്രമത്തിൽ 168 മീ., 124 മീ., 508 മീ. ആണ്‌. ന്യൂയോർക്ക്‌ തുറമുഖത്തിലെ സ്റ്റാച്യൂ ഒഫ്‌ ലിബർട്ടി(Statue of Liberty)യുടെ ഡിസൈന്‍ തയ്യാറാക്കുന്ന പ്രവർത്തനത്തിലും (1885) ഇദ്ദേഹം പ്രധാന പങ്കുവഹിക്കുകയുണ്ടായി.
ഈഫൽ തന്റെ അവസാനകാലം ചെലവഴിച്ചത്‌ എയ്‌റോ ഡൈനാമിക്‌സ്‌ സംബന്ധമായ പഠനങ്ങള്‍ക്കും പരീക്ഷണങ്ങള്‍ക്കുമാണ്‌. ഈ ആവശ്യത്തിനുവേണ്ടി അദ്ദേഹം ഈഫൽ ഗോപുരവും ഉപയോഗപ്പെടുത്തിയിട്ടുണ്ട്‌. 1912-ൽ ഈഫൽ ഒരു വിന്‍ഡ്‌-ടണൽ നിർമിക്കുകയും ഒരു എയ്‌റോഡൈനാമിക്‌സ്‌ പരീക്ഷണശാല സ്ഥാപിക്കുകയും ചെയ്‌തു. 1923 ഡി. 23-ന്‌ പാരിസിൽ ഈഫൽ നിര്യാതനായി. നോ. ഈഫൽ ഗോപുരം
