This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഇന്റർപോള്‍
സര്‍വ്വവിജ്ഞാനകോശം സംരംഭത്തില്‍ നിന്ന്
Mksol (സംവാദം | സംഭാവനകള്‍) (പുതിയ താള്‍: == ഇന്റർപോള്‍ == == Interpol == ക്രിമിനൽകുറ്റങ്ങള്‍ തടയുന്നതിനു...) |
Mksol (സംവാദം | സംഭാവനകള്‍) (→ഇന്റർപോള്‍) |
||
| വരി 1: | വരി 1: | ||
| - | == | + | == ഇന്റര്‍പോള്‍ == |
| - | + | ||
== Interpol == | == Interpol == | ||
08:17, 10 സെപ്റ്റംബര്‍ 2014-നു നിലവിലുണ്ടായിരുന്ന രൂപം
ഇന്റര്‍പോള്‍
Interpol
ക്രിമിനൽകുറ്റങ്ങള്‍ തടയുന്നതിനും കുറ്റവാളികളെ കണ്ടുപിടിക്കുന്നതിനും അന്തർദേശീയാടിസ്ഥാനത്തിൽ പ്രവർത്തിക്കുന്ന സംഘടന. ഫ്രാന്‍സിലെ ലിയോണ്‍ ആസ്ഥാനമായി പ്രവർത്തിക്കുന്ന ഇതിന്റെ പൂർണമായ പേര്‌ "ഇന്റർനാഷണൽ ക്രിമിനൽ പൊലീസ്‌ ഓർഗനൈസേഷന്‍' (International Criminal Police Organisation)എന്നാണ്‌. അന്തർദേശീയാടിസ്ഥാനത്തിൽ പ്രവർത്തിക്കുന്ന ഏറ്റവും വലിയ പൊലീസ്‌ സംഘടനയായ ഇന്റർപോളിൽ 190-ൽപ്പരം രാജ്യങ്ങള്‍ അംഗങ്ങളായുണ്ട്‌. തീവ്രവാദം, വംശഹത്യ, യുദ്ധക്കുറ്റങ്ങള്‍, മയക്കുമരുന്ന്‌ കടത്ത്‌, സൈബർ കുറ്റകൃത്യങ്ങള്‍ തുടങ്ങിയവയുമായി ബന്ധപ്പെട്ട അനേ്വഷണമാണ്‌ ഇന്റർപോളിന്റെ പ്രധാന ചുമതല. ഇതുകൂടാതെ ബൗദ്ധികസ്വത്തവകാശവുമായി ബന്ധപ്പെട്ട കേസുകള്‍, ആഗോള മരുന്നു വിപണിയിലെ ക്രമക്കേടുകള്‍ എന്നീ രംഗത്തും ഇന്റർപോളിന്റെ സേവനം ലോകരാജ്യങ്ങള്‍ക്ക്‌ ഒഴിച്ചുകൂടാന്‍ കഴിയാത്തതാണ്‌. മോഷ്‌ടിക്കപ്പെട്ട അമൂല്യ കലാസൃഷ്‌ടികള്‍, വാഹനങ്ങള്‍ എന്നിവയുമായി ബന്ധപ്പെട്ട പ്രത്യേകതരം കേസുകളും ഇന്റർപോള്‍ കൈകാര്യം ചെയ്യുന്നുണ്ട്‌.
ഒന്നാം ലോകയുദ്ധത്തിനുശേഷമാണ്‌ ഇത്തരത്തിലൊരു സംഘടന രൂപവത്‌കരിക്കേണ്ടതിന്റെ ആവശ്യകത ലോകരാഷ്‌ട്രങ്ങള്‍ക്കു ബോധ്യപ്പെട്ടത്‌. വ്യോമസഞ്ചാരം സുഗമമായതോടെ ഒരു രാജ്യത്ത്‌ ഏതെങ്കിലും കുറ്റകൃത്യം നടത്തിയശേഷം മണിക്കൂറുകള്‍ക്കകം ആ കുറ്റവാളിക്ക്‌ മറ്റു രാജ്യങ്ങളിലേക്കു ചെന്നെത്താമെന്നായത്‌ ഇന്റർപോള്‍ പോലുള്ള സംഘടന ഉണ്ടാകേണ്ടതിന്റെ ആവശ്യം വളരെ വർധിപ്പിച്ചു. ഇത്തരം ബുദ്ധിമുട്ടുകള്‍ കൂടുതൽ അനുഭവിച്ചുവന്ന ആസ്റ്റ്രിയയാണ്‌ ഇന്റർപോള്‍ സ്ഥാപിക്കാന്‍ മുന്നോട്ടുവന്നത്‌. 1923-ൽ വിയന്നാ പൊലീസ്‌ പ്രസിഡന്റ്‌ യൊഹാന്‍ ഷോബർ മറ്റു രാജ്യങ്ങളിലെ പ്രതിനിധികളെ വിളിച്ചുകൂട്ടുന്നതിന്‌ ആസ്റ്റ്രിയന്‍ ഗവണ്‍മെന്റിന്റെ അനുമതി നേടുകയും 20 രാഷ്‌ട്രങ്ങളിലെ പ്രതിനിധികള്‍ പങ്കെടുത്ത യോഗത്തിൽ "ഇന്റർനാഷണൽ ക്രിമിനൽ പൊലീസ്‌ കമ്മിഷന്‍' രൂപവത്‌കരിക്കുകയും ചെയ്‌തു. വിയന്ന ആസ്ഥാനമാക്കി പ്രവർത്തിച്ച സംഘടനയുടെ ആദ്യപ്രസിഡന്റ്‌ ഷോബർ തന്നെയായിരുന്നു. 1938-ൽ നാസികള്‍ ആസ്‌ട്രിയ പിടിച്ചടക്കിയതോടെ ഇന്റർപോളിന്റെ പ്രവർത്തനങ്ങള്‍ നിലച്ചു. രണ്ടാം ലോകയുദ്ധത്തിനുശേഷം ഈ സംഘടന പുനരുദ്ധരിക്കേണ്ടത്‌ ആവശ്യമായിത്തീർന്നു; ഇന്റർപോളിന്റെ ആസ്ഥാനം വിയന്നയിൽനിന്ന്‌ പാരിസിലേക്കു മാറ്റി. ജനറൽ സെക്രട്ടേറിയറ്റിനാവശ്യമായ ഉദ്യോഗസ്ഥന്മാരെയും ഫ്രഞ്ച്‌ ഗവണ്‍മെന്റ്‌ നല്‌കി. ബെൽജിയന്‍ നിയമമന്ത്രികാര്യാലയത്തിലെ പൊലീസ്‌ ഇന്‍സ്‌പെക്‌ടർ ജനറലായ ഫ്‌ളോറന്റ്‌ ലൂവേജ്‌ ഇന്റർപോള്‍ പ്രസിഡന്റായി. 1955-ൽ ഇന്റർപോള്‍ വികസിപ്പിച്ചു; അംഗസംഖ്യ 55 ആയി ഉയർന്നു. 1956-ൽ ഒരു പുതിയ ഭരണഘടന എഴുതിയുണ്ടാക്കുകയും സംഘടനയുടെ പേര്‌ "ഇന്റർനാഷണൽ ക്രിമിനൽ പൊലീസ്‌ ഓർഗനൈസേഷന്‍'എന്നാക്കി മാറ്റുകയും ചെയ്‌തു.
ജനറൽ അസംബ്ലി, എക്‌സിക്യൂട്ടീവ്‌ കമ്മിറ്റി, ജനറൽ സെക്രട്ടേറിയറ്റ്‌, നാഷണൽ സെന്‍ട്രൽ ബ്യൂറോകള്‍, കമ്മിഷണ്‍ ഫോർ ദ്‌ കണ്‍ട്രാള്‍ ഒഫ്‌ ഇന്റർപോള്‍സ്‌ ഫൈൽസ്‌ (CCF) എന്നിവ ചേർന്നതാണ്‌ ഇന്റർപോള്‍. ജനറൽ അസംബ്ലിയിലെ അംഗങ്ങള്‍ ഓരോ മെമ്പർ രാജ്യത്തെയും പ്രതിനിധി ആയിരിക്കും. ഇന്റർപോളിന്റെ പരമോന്നത ഭരണനിർവഹണസമിതിയായ ജനറൽ അസംബ്ലി എല്ലാ വർഷവും യോഗം ചേരുകയും സുപ്രധാന തീരുമാനങ്ങള്‍ എടുക്കുകയും ചെയ്യുന്നു. ഇപ്രകാരം എടുക്കുന്ന തീരുമാനങ്ങള്‍ നടപ്പിലാക്കുന്നത്‌ എക്‌സിക്യൂട്ടീവ്‌ കമ്മിറ്റിയാണ്‌. ഈ കമ്മിറ്റിയിൽ ഓരോ ഇന്റർപോള്‍ റീജിയനെയും പ്രതിനിധീകരിച്ച്‌ ആകെ പതിമൂന്ന്‌ അംഗങ്ങള്‍ ഉണ്ട്‌. ഇതിൽ ഒരു പ്രസിഡന്റും മൂന്ന്‌ വൈസ്‌ പ്രസിഡന്റുമാരും ഒന്‍പത്‌ പ്രതിനിധികളും ഉള്‍പ്പെടും.
ഇന്റർപോളിന്റെ കേന്ദ്രസ്ഥാപനമായ ജനറൽ സെക്രട്ടേറിയറ്റിൽ സെക്രട്ടറി ജനറലും സ്റ്റാഫുകളും ഉള്‍പ്പെടുന്നു. ഓരോ അംഗരാജ്യത്തിനും നാഷണൽ സെന്‍ട്രൽ ബ്യൂറോ (NCB) എന്നു പേരുള്ള ഒരു ക്ലിയറിങ്‌ ഹൗസുണ്ട്‌. ഈ ബ്യൂറോ വഴിയാണ്‌ അംഗരാഷ്‌ട്രങ്ങള്‍ ജനറൽ സെക്രട്ടേറിയറ്റുമായും പരസ്‌പരവും സമ്പർക്കം പുലർത്തുന്നത്‌. വ്യക്തികളെ തിരിച്ചറിയാനുള്ള കൈരേഖകള്‍, ഡി.എന്‍.എ. വിവരങ്ങള്‍, ഫോട്ടോകള്‍ തുടങ്ങിയ ബൃഹദ്‌വിവരങ്ങള്‍ കൈകാര്യം ചെയ്യുക എന്നതാണ്‌ സി.സി.എഫിന്റെ ധർമം. കുറ്റവാളികള്‍, ദുരന്തങ്ങളിൽ ജീവഹാനി സംഭവിക്കുന്ന അജ്ഞാതർ എന്നിവരെ സംബന്ധിക്കുന്ന വിവരങ്ങള്‍ ഇതിൽപ്പെടും. അബിദ്‌ജന്‍, ബ്യൂണസ്‌ അയേഴ്‌സ്‌, ഹാരാരെ, നെയ്‌റോബി, ബാങ്കോക്ക്‌, കാമറൂണ്‍, സാന്‍ സാൽവദോർ എന്നിവിടങ്ങളിലായി ഇന്റർപോളിന്റെ ഏഴ്‌ തദ്ദേശീയ ബ്യൂറോകള്‍ പ്രവർത്തിക്കുന്നു. ഇതുകൂടാതെ യു.എന്‍. ആസ്ഥാനത്തും യൂറോപ്യന്‍ യൂണിയന്‍ ആസ്ഥാനത്തും ഓരോ പ്രതിനിധി ഓഫീസും പ്രവർത്തിക്കുന്നുണ്ട്‌.
ഇന്റർപോളിന്റെ പ്രധാന ഓപ്പറേഷന്‍ കേന്ദ്രം കമാന്‍ഡ്‌ ആന്‍ഡ്‌ കോർഡിനേഷന്‍ സെന്റർ എന്നറിയപ്പെടുന്നു. 24 മണിക്കൂറും പ്രവർത്തനസജ്ജമായ ഇവിടെ അന്വേഷണ ഏജന്‍സികള്‍ക്കാവശ്യമായ വിവരങ്ങള്‍ ദ്രുതഗതിയിൽ ലഭ്യമാകുന്നു. അനവധി ഭാഷകള്‍ കൈകാര്യം ചെയ്യാന്‍ കഴിവുള്ള വിദഗ്‌ധരായ ഉദ്യോഗസ്ഥരാണ്‌ ഇവിടെ സേവനമനുഷ്‌ഠിക്കുന്നത്‌. ഫ്രാന്‍സിലെ ലിയോണ്‍, അർജന്റീനയിലെ ബ്യൂണസ്‌ അയേഴ്‌സ്‌ എന്നിവിടങ്ങളിലാണ്‌ നിലവിൽ കമാന്‍ഡ്‌ ആന്‍ഡ്‌ കോർഡിനേഷന്റെ സെന്ററുകളുള്ളത്‌.
അംഗരാഷ്‌ട്രങ്ങളിലെ പൊലീസ്‌ അധികാരികള്‍ തങ്ങളുടെ രാഷ്‌ട്രങ്ങളിലെ നിയമങ്ങള്‍ക്കു വിധേയമായി പരസ്‌പരം സഹകരിക്കുകയും കുറ്റങ്ങള്‍ തടയാനും കണ്ടുപിടിക്കാനും ഉതകുന്നതരത്തിലുള്ള സംവിധാനങ്ങള്‍ ഉണ്ടാക്കുകയും ചെയ്യുന്നു. രാഷ്‌ട്രീയമോ മതപരമോ വർഗവിവേചനപരമോ സൈനികമോ ആയ പ്രവർത്തനങ്ങള്‍ ഏറ്റെടുക്കുന്നതിന്‌ ഈ സംഘടനയ്‌ക്ക്‌ അധികാരമില്ല. ഒന്നിലധികം രാഷ്‌ട്രങ്ങളിൽ കള്ളക്കടത്തുപ്രവർത്തനങ്ങളിൽ ഏർപ്പെടുന്നവർ, വിദേശനാണ്യങ്ങള്‍ വ്യാജമായി അച്ചടിച്ചു പ്രചരിപ്പിക്കുന്നവർ, ഒരു രാജ്യത്ത്‌ കുറ്റകൃത്യം നടത്തിയശേഷം അന്യരാജ്യങ്ങളിൽ പോയി രക്ഷപ്പെടുന്നവർ എന്നിവരാണ്‌ ഇന്റർപോളിന്റെ പ്രവർത്തനപരിധിയിൽപ്പെടുന്ന പ്രധാന കുറ്റവാളികള്‍. അന്തർദേശീയാടിസ്ഥാനത്തിൽ പ്രവർത്തിക്കുന്ന കുറ്റവാളികളുടെ വിവരങ്ങള്‍ ശേഖരിക്കുന്നതിനുള്ള മികച്ച സംവിധാനങ്ങള്‍ ഇന്റർപോള്‍ കേന്ദ്രങ്ങളിലുണ്ട്‌. കുറ്റകൃത്യവുമായി ബന്ധപ്പെട്ട രേഖകളും കേസ്‌ഫയലുകളും മറ്റും ദീർഘകാലം സൂക്ഷിക്കുന്ന പതിവുമുണ്ട്‌.
അംഗരാജ്യങ്ങള്‍ക്കിടയിൽ സുപ്രധാന വിവരങ്ങള്‍ കൈമാറുന്നതിനുവേണ്ടി I24/7 എന്ന ഒരു പ്രത്യേക പൊലീസ്‌ കമ്യൂണിക്കേഷന്‍ സിസ്റ്റം ഇന്റർപോള്‍ ഉപയോഗിക്കുന്നു. ഇതിന്റെ സഹായത്തോടെ ഓരോ അംഗരാജ്യത്തിലെയും നാഷണൽ സെന്‍ട്രൽ ബ്യൂറോയ്‌ക്ക്‌ നിമിഷങ്ങള്‍ക്കകം വിവരം തെരഞ്ഞെടുക്കുന്നതിനും കൈമാറുന്നതിനും സാധിക്കുന്നു. ഓരോ രാജ്യവും അവരുടേതായ ക്രിമിനൽ ഡേറ്റാബേസ്‌ സൂക്ഷിക്കുകയും ക24/7 വഴി മറ്റു രാഷ്‌ട്രങ്ങളുമായി പങ്കുവയ്‌ക്കുകയും ചെയ്യുന്നു. ഇന്ത്യ ഇന്റർപോളിലെ അംഗമാണ്‌. ഇന്റർപോളുമായി ബന്ധപ്പെടുന്നതിനും വിവരങ്ങള്‍ കൈമാറുന്നതിനുമുള്ള ചുമതല ഇന്ത്യയിൽ സി.ബി.ഐക്കാണ്‌.
അംഗരാജ്യങ്ങളിലെ അന്വേഷണ ഏജന്‍സികളുടെ അഭ്യർഥനയനുസരിച്ച്‌ പ്രത്യേക ടീമുകളെ ഇന്റർപോള്‍ അയയ്‌ക്കുന്നു. വിദഗ്‌ധരായ പൊലീസുദ്യോഗസ്ഥർ, അവരുടെ സഹായികള്‍ എന്നിവർ ഇത്തരം ടീമുകളിലുണ്ടാകും. പ്രകൃതിദുരന്തങ്ങള്‍, ബോംബ്‌ സ്‌ഫോടനങ്ങള്‍, അപകടങ്ങള്‍ എന്നിവ നടക്കുന്നിടത്തെല്ലാം അംഗരാജ്യങ്ങള്‍ ഇന്റർപോളിന്റെ സേവനം തേടാറുണ്ട്‌.
സുപ്രധാന കുറ്റങ്ങള്‍ സംബന്ധിച്ച വിവരങ്ങള്‍ അംഗരാജ്യങ്ങള്‍ക്കിടയിൽ കൈമാറുന്നതിന്‌ ഇന്റർപോള്‍ പ്രത്യേകതരം നോട്ടീസുകള്‍ ഉപയോഗിക്കുന്നു.
1. ചുവപ്പ്‌ നോട്ടീസ്‌. കുറ്റവാളികള്‍ക്കെതിരെ അറസ്റ്റ്‌ വാറണ്ട്‌ പുറപ്പെടുവിക്കുന്നതിനുവേണ്ടി. 2. മഞ്ഞ നോട്ടീസ്‌. കാണാതായവരെ കണ്ടെത്തുന്നതിന്‌ സഹായമഭ്യർഥിക്കുന്നതിനുവേണ്ടി. പ്രത്യേകിച്ച്‌ കുട്ടികളെയും ഓർമ നഷ്‌ടപ്പെട്ടവരെയും കണ്ടെത്തുന്നതിനുവേണ്ടി. 3. നീല നോട്ടീസ്‌. കുറ്റവാളിയെക്കുറിച്ചും അയാളുടെ വാസസ്ഥലം, പ്രവൃത്തികള്‍ എന്നിവയെക്കുറിച്ചും കൂടുതൽ വിവരം ലഭിക്കുന്നതിന്‌ 4. കറുപ്പ്‌ നോട്ടീസ്‌. തിരിച്ചറിയാന്‍ പറ്റാത്ത ശവശീരങ്ങളെക്കുറിച്ചുള്ള വിവരങ്ങള്‍ ആരായുന്നതിന്‌. 5. പച്ച നോട്ടീസ്‌. കുറ്റം ചെയ്‌ത വ്യക്തികളെക്കുറിച്ചും മറ്റുരാജ്യങ്ങളിൽ കുറ്റം ആവർത്തിക്കാനുള്ള സാധ്യതകളെക്കുറിച്ചും മുന്നറിയിപ്പ്‌ നൽകുന്നതിനായി ഉപയോഗിക്കുന്നു. 6. പർപ്പിള്‍ നോട്ടീസ്‌. ഒളിച്ചു വച്ചിരിക്കുന്ന ആയുധങ്ങള്‍, പാഴ്‌സൽ ബോംബുകള്‍ തുടങ്ങിയ മാരകമായ വസ്‌തുക്കളെക്കുറിച്ച്‌ പൊലീസിനും മറ്റ്‌ അന്താരാഷ്‌ട്ര ഏജന്‍സികള്‍ക്കും വിവരം നൽകുന്നതിനുവേണ്ടി. 7. ഓറഞ്ച്‌ നോട്ടീസ്‌. വ്യക്തിക്കോ സ്വത്തിനോ ഭീഷണി ഉയർത്തുന്ന വ്യക്തി/സംഭവം/വസ്‌തു/പ്രക്രിയ എന്നിവയെക്കുറിച്ചുള്ള മുന്നറിയിപ്പു നൽകുന്നതിന്‌.
