This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഇന്ത്യന്‍ കൗണ്‍സിൽ ഒഫ്‌ അഗ്രിക്കള്‍ച്ചറൽ റിസർച്ച്‌
സര്‍വ്വവിജ്ഞാനകോശം സംരംഭത്തില്‍ നിന്ന്
ഇന്ത്യന്‍ കൗണ്‍സില്‍ ഒഫ്‌ അഗ്രിക്കള്‍ച്ചറല്‍ റിസര്‍ച്ച്‌
കേന്ദ്ര കൃഷി മന്ത്രാലയത്തിന്റെ നിയന്ത്രണത്തില്‍ പ്രവര്‍ത്തിക്കുന്ന സ്വയംഭരണസ്ഥാപനം. കൃഷി, മൃഗസംരക്ഷണം എന്നീ വകുപ്പുകളില്‍ നടക്കുന്ന ഗവേഷണപ്രവര്‍ത്തനങ്ങളെയും ഉന്നതവിദ്യാഭ്യാസത്തെയും വികസനപദ്ധതികളെയും സമന്വയിപ്പിച്ച്‌ കൊണ്ടുപോകുകയാണ്‌ ഇതിന്റെ ലക്ഷ്യം.
1919-ല്‍ ബ്രിട്ടീഷ്‌ ഗവണ്‍മെന്റ്‌ നടപ്പാക്കിയ ഭരണപരിഷ്‌കാരങ്ങള്‍ മുഖേന അന്നുവരെ കേന്ദ്രഗവണ്‍മെന്റില്‍ നിക്ഷിപ്‌തമായിരുന്ന പല അധികാരങ്ങളും പ്രവിശ്യകള്‍ക്ക്‌ വിട്ടുകൊടുക്കുകയുണ്ടായി. ഇതനുസരിച്ച്‌ കൃഷിയും മൃഗസംരക്ഷണവും സംബന്ധിച്ച ഗവേഷണ വികസനപ്രവര്‍ത്തനങ്ങളുടെ ചുമതല അതതു പ്രവിശ്യകള്‍ക്കാണ്‌ നിശ്ചയിക്കപ്പെട്ടിരുന്നത്‌. ഇതുമൂലം പ്രസ്‌തുത പ്രവര്‍ത്തനങ്ങള്‍ക്ക്‌ ഒരു കേന്ദ്രീകൃത ഏജന്‍സി ഇല്ലാതെവരുന്നതിനാലുണ്ടാകാവുന്ന തകരാറുകളെക്കുറിച്ച്‌ അന്നത്തെ കേന്ദ്രഗവണ്‍മെന്റിന്‌ ആശങ്കയുണ്ടായിരുന്നു. ഈ പശ്ചാത്തലത്തിലാണ്‌ 1926-ല്‍ ലിന്‍ലിത്‌ഗോ പ്രഭുവിന്റെ അധ്യക്ഷതയില്‍ കൃഷിക്കുള്ള റോയല്‍ കമ്മിഷന്‍ രൂപീകരിച്ചത്‌. ഇവര്‍ സമര്‍പ്പിച്ച റിപ്പോര്‍ട്ടില്‍ കാര്‍ഷിക ഗവേഷണത്തിന്‌ ഒരു കേന്ദ്രീകൃത ഏജന്‍സി ഉണ്ടായിരിക്കേണ്ടതിന്റെ ആവശ്യകത ഊന്നി പ്രസ്‌താവിച്ചിരുന്നു. പ്രവിശ്യകളിലെ കാര്‍ഷിക ഗവേഷണപ്രവര്‍ത്തനങ്ങളെ ക്രോഡീകരിക്കാനും ആവര്‍ത്തനങ്ങള്‍ ഒഴിവാക്കാനും ഇത്തരം ഒരു സംഘടന വളരെ ആവശ്യമാണെന്നായിരുന്നു ഈ കമ്മിഷന്റെ അഭിപ്രായം. ഈ അഭിപ്രായത്തെ മാനിച്ചുകൊണ്ട്‌ ഇംപീരിയല്‍ കൗണ്‍സില്‍ ഒഫ്‌ അഗ്രിക്കള്‍ച്ചറല്‍ റിസര്‍ച്ച്‌ എന്ന സമിതി 1929-ല്‍ രജിസ്റ്റര്‍ ചെയ്യപ്പെട്ടു. ഇന്ത്യയ്‌ക്ക്‌ സ്വാതന്ത്യ്രം ലഭിച്ചതോടെ ഇതിന്റെ പേര്‌ ഇന്ത്യന്‍ കൗണ്‍സില്‍ ഒഫ്‌ അഗ്രിക്കള്‍ച്ചറല്‍ റിസര്‍ച്ച്‌ എന്നാക്കി.
ഇന്ത്യന്‍ കാര്‍ഷികമേഖലയുടെ വികസനത്തിന്‌ സഹായകമായ പ്രവര്‍ത്തനങ്ങള്‍ നടത്തുക എന്നതാണ്‌ കൗണ്‍സിലിന്റെ മുഖ്യലക്ഷ്യം. ഭക്ഷ്യ സ്വയംപര്യാപ്‌തത ലക്ഷ്യമാക്കി കാര്‍ഷികമേഖലയില്‍ സാങ്കേതിക പ്രവിധികള്‍ ആവിഷ്‌കരിച്ചതില്‍ ഐ.സി.എ.ആറിന്‌ പ്രമുഖ പങ്കാണുള്ളത്‌. വിവിധയിനം വിളകളുടെ സംരക്ഷണം, പരിപാലനം, ഉത്‌പാദനവൃദ്ധി തുടങ്ങിയവയെസംബന്ധിച്ച്‌ പരമ്പരാഗത സമ്പ്രദായങ്ങള്‍ക്കും മൂല്യങ്ങള്‍ക്കും അര്‍ഹമായ സ്ഥാനവും പ്രോത്സാഹനവും നല്‌കിക്കൊണ്ടുതന്നെ അടിസ്ഥാനപരവും പ്രയോക്തവുമായ ഗവേഷണപദ്ധതികള്‍ നടപ്പിലാക്കുന്ന നയമാണ്‌ കൗണ്‍സില്‍ സ്വീകരിച്ചിരിക്കുന്നത്‌. കാര്‍ഷികവിളകള്‍, വളര്‍ത്തുമൃഗങ്ങള്‍, മച്ചുകള്‍, കൃഷിരീതികള്‍, ജലപരിപാലനം, കാര്‍ഷിക എന്‍ജിനീയറിങ്‌ തുടങ്ങിയ വിഷയങ്ങളില്‍ കൗണ്‍സില്‍ അഖിലേന്ത്യാതലത്തിലുള്ള സംയോജിതഗവേഷണപദ്ധതികള്‍ നടപ്പിലാക്കിവരുന്നുണ്ട്‌. ദീര്‍ഘകാലവീക്ഷണത്തോടുകൂടിയ ഗവേഷണപദ്ധതികളാണിവ. സംസ്ഥാനതലത്തിലുള്ള കാര്‍ഷികഗവേഷണസ്ഥാപനങ്ങളുടെയും കാര്‍ഷിക സര്‍വകലാശാലകളുടെയും സഹകരണത്തോടെ നടത്തുന്ന ഇത്തരം സംയോജിതപരിപാടികള്‍ മുഖേന കാര്‍ഷികമേഖലയില്‍ ഒരു ദേശീയ കാഴ്‌ചപ്പാട്‌ ഉളവാക്കാന്‍ കഴിയുന്നുണ്ട്‌.
കൗണ്‍സിലിന്റെ ഗവേഷണ ശൃംഖല 45 സെന്‍ട്രല്‍ ഇന്‍സ്റ്റിറ്റ്യൂട്ട്‌, ആറ്‌ നാഷണല്‍ ബ്യൂറോ, 17 നാഷണല്‍ റിസര്‍ച്ച്‌ സെന്റര്‍, 25 പ്രോജക്‌റ്റ്‌ ഡയറക്‌ടറേറ്റ്‌, നാല്‌ കല്‌പിത സര്‍വകലാശാലകള്‍ എന്നിവയെ ഉള്‍ക്കൊള്ളുന്നു. നമീബിയ, ബള്‍ഗേറിയ തുടങ്ങിയ രാജ്യങ്ങളില്‍ സംയുക്തമായി നടത്തിപ്പോരുന്ന കൃഷിവികസന യത്‌നങ്ങളിലൂടെ കൗണ്‍സിലിന്റെ പ്രവര്‍ത്തനമേഖല ആഗോളതലത്തിലേക്ക്‌ വ്യാപിച്ചിട്ടുണ്ട്‌.
കൗണ്‍സിലിന്റെ തുടര്‍പ്രസിദ്ധീകരണങ്ങളില്‍ ഇന്ത്യന്‍ ജേര്‍ണല്‍ ഒഫ്‌ അഗ്രിക്കള്‍ച്ചറല്‍ സയന്‍സസ്‌, ദി ഇന്ത്യന്‍ ജേര്‍ണല്‍ ഒഫ്‌ അനിമല്‍ സയന്‍സസ്‌ എന്നീ ഗവേഷണ പ്രസിദ്ധീകരണങ്ങള്‍; ഇന്ത്യന്‍ ഫാമിങ്‌, ഖേതി എന്നീ മാസികകള്‍, ഇന്ത്യന്‍ ഹോര്‍ട്ടികള്‍ച്ചര്‍, ഫല്‍-ഫൂല്‍ എന്നീ ത്രൈ മാസികകള്‍ തുടങ്ങിയവ ഉള്‍പ്പെടുന്നു.
(പ്രൊഫ. എ.ജി.ജി. മേനോന്‍; സ.പ.)
