This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ആൽവാ, ജോക്വിം (1907 - 1979)
സര്‍വ്വവിജ്ഞാനകോശം സംരംഭത്തില്‍ നിന്ന്
ആല്‍വാ, ജോക്വിം (1907 - 1979)
Alva, Joachim
ഇന്ത്യന്‍ ദേശീയനേതാവ്‌. കര്‍ണാടകത്തിലെ ഉഡുപ്പിയില്‍ 1907 ജനു. 21-ന്‌ ആല്‍വാ ജനിച്ചു. ബോംബേയില്‍ നിന്നും നിയമബിരുദം നേടിയശേഷം ആല്‍വാ സ്വാതന്ത്യ്രസമരത്തില്‍ സജീവമായി പങ്കെടുത്തു. 1920-കളില്‍ നിരവധിതവണ ജയില്‍ശിക്ഷ അനുഭവിച്ച ആല്‍വാ അഭിഭാഷകവൃത്തിയില്‍നിന്നു വിരമിച്ചു; സെയ്‌ന്റ്‌ സേവിയേഴ്‌സിലും ലോ കോളജിലും സഹപാഠിയായിരുന്ന വയലറ്റിനെ വിവാഹം ചെയ്‌തു (1937 ന. 20.). സോഷ്യലിസം, മാനുഷികസാഹോദര്യം എന്നിവയുടെ പ്രചാരണം ലക്ഷ്യമാക്കിക്കൊണ്ട്‌ 1943-ല്‍ ഇദ്ദേഹം ഫോറം എന്ന വാരിക ആരംഭിച്ചു. ബ്രിട്ടിഷുകാര്‍ക്കെതിരായി മുഖപ്രസംഗം എഴുതിയതിന്റെ ഫലമായി ഇദ്ദേഹത്തെ രാജ്യദ്രാഹക്കുറ്റത്തിന്‌ വിചാരണ ചെയ്‌തു ശിക്ഷിച്ചു. ബോംബേ കോണ്‍ഗ്രസ്സിന്റെ നിര്‍വാഹകസമിതിയിലും, എ.ഐ.സി.സി.യിലും അംഗമായ ആല്‍വാ 1959-ല്‍ ബോംബേയിലെ ഷെരിഫായി; 1950-52 കാലത്ത്‌ ഇദ്ദേഹം സംസ്ഥാന നിയമസഭാംഗവുമായിരുന്നിട്ടുണ്ട്‌. സൗത്ത്‌ കാനറയില്‍നിന്ന്‌ 1952-ല്‍ ലോക്‌സഭാംഗമായി തെരഞ്ഞെടുക്കപ്പെട്ടു. ആല്‍വാ 15 വര്‍ഷം ആ സ്ഥാനം വഹിച്ചു. 1969-ല്‍ ഇദ്ദേഹം രാജ്യസഭാംഗമായി തെരഞ്ഞെടുക്കപ്പെട്ടു. കോണ്‍ഗ്രസ്സിലെ യൂത്ത്‌കോണ്‍ഗ്രസ്‌ പ്രസ്ഥാനം ഉടലെടുത്തത്‌ ഇദ്ദേഹത്തിന്റെയും പത്‌നിയായ വയലറ്റ്‌ ആല്‍വായുടെയും ശ്രമഫലമായാണ്‌. ഇദ്ദേഹത്തിന്റെ കൃതികളില്‍ മെന്‍ ആന്‍ഡ്‌ സൂപര്‍മെന്‍ ഒഫ്‌ ഹിന്ദുസ്ഥാന്‍ (Men and Supermen of Hindustan) പ്രാധാന്യമര്‍ഹിക്കുന്നു. ഇദ്ദേഹത്തിന്റെ മരുമകളാണ്‌ മാര്‍ഗരറ്റ്‌ ആല്‍വ.
