This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ആർച്ചർ മത്സ്യം
സര്‍വ്വവിജ്ഞാനകോശം സംരംഭത്തില്‍ നിന്ന്
ആർച്ചർ മത്സ്യം
Archer Fish
വായില്‍നിന്നും വെള്ളം ശക്തിയായി ചീറ്റിപ്പായിച്ച്‌, പറന്നുനടക്കുന്ന ചെറുപ്രാണികളെ താഴെവീഴ്‌ത്തി ഭക്ഷിക്കുന്ന ഒരു മത്സ്യം. ടോക്‌സോറ്റിഡേ കുടുംബത്തിലെ അംഗമായ ഇവയില്‍ ഏറ്റവും ശ്രദ്ധേയമായ സ്‌പീഷീസ്‌ ടോക്‌സോട്ടസ്‌ ജാക്കുലേറ്റര്‍ (Toxotes jaculator) ആണ്‌. ആര്‍ച്ചര്‍ മത്സ്യങ്ങള്‍ ഫിലിപ്പീന്‍സ്‌, ഇന്തോ-ചൈന, തായ്‌ലന്‍ഡ്‌, മലയ, ബര്‍മ, ഇന്ത്യ എന്നിവിടങ്ങളില്‍ കാണപ്പെടുന്നു. ശുദ്ധജലത്തിലും ലവണജലത്തിലും ജീവിക്കാന്‍ കഴിവുള്ളവയാണ്‌ ആര്‍ച്ചര്‍ മത്സ്യങ്ങള്‍.
സാധാരണയായി 15-18 സെ.മീ.-ല്‍ കൂടുതല്‍ നീളത്തില്‍ ഇവ വളരാറില്ല; വായ്‌ഭാഗം കൂര്‍ത്തിരിക്കും; കീഴ്‌ച്ചുണ്ട്‌ വെളിയിലേക്ക്‌ അല്‌പം തള്ളിനില്‌ക്കുന്നു; വിസ്‌താരമേറിയ വായുടെ അടിത്തട്ടില്‍ ഒരു ചാലുണ്ട്‌; ചെകിളകള്‍ ബലമായി അടയ്‌ക്കുമ്പോള്‍ ഈ ചാലില്‍ വെള്ളം നിറയുന്നു; അതിനുശേഷം നീണ്ടുപരന്ന നാക്ക്‌ ചാലിന്റെ മുകളില്‍ ചേര്‍ത്തുവയ്‌ക്കുന്നു; അപ്പോള്‍ ഈ ചാല്‍ ഒരു കുഴലായി രൂപാന്തരപ്പെടും. വായുവില്‍ പറന്നു നടക്കുന്ന ഇരയുടെ നേരെ ചുണ്ട്‌ മുകള്‍പ്പരപ്പിലേക്കുയര്‍ത്തി ഉന്നംപിടിച്ച്‌ നാക്ക്‌ കീഴ്‌പോട്ട്‌ ബലമായമര്‍ത്തി അഗ്രഭാഗം സ്വതന്ത്രമാക്കുന്നു. കുഴലിനുള്ളില്‍ മര്‍ദവ്യത്യാസം സംഭവിക്കുന്നതുമൂലം വെള്ളം ഇരയുടെ നേര്‍ക്ക്‌ ചീറ്റിപ്പായുന്നു. അസാധാരണ കാഴ്‌ചശക്തിയുള്ള ആര്‍ച്ചര്‍ മത്സ്യങ്ങളുടെ ഉന്നം പ്രായേണ പിഴയ്‌ക്കാറില്ല. ഉദ്ദേശം 1.5 മീ. വരെ ഉയരത്തില്‍ വെള്ളം പായിക്കാന്‍ ഇവയ്‌ക്കു കഴിയും. സ്വാദേറിയ ഒരു ഭക്ഷ്യമത്സ്യമാണിത്‌. ടോ. ബ്ലൈത്തി (T. chatareus), ടോ. കറ്റാറിയസ്‌ (T. blythiii) െഎന്നില മറ്റു ചില സ്‌പിഷീസുകളാണ്‌.
