This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ആള്‍ട്‌ദ്യോർഫർ, ആൽബ്രഷ്‌ട്‌ (1480 - 1538)
സര്‍വ്വവിജ്ഞാനകോശം സംരംഭത്തില്‍ നിന്ന്
ആള്‍ട്‌ദ്യോര്‍ഫര്‍, ആല്‍ബ്രഷ്‌ട്‌ (1480 - 1538)
Altduuarfer,Albrecht
ജര്‍മന്‍ ചിത്രകാരനും ശില്‌പിയും. ഇദ്ദേഹത്തിന്റെ പിതാവായ ഉള്‍റിച്ചും പ്രശസ്‌തനായ ഒരു ചിത്രകാരനും ശില്‌പിയുമായിരുന്നു. ജര്‍മന്‍ നവോത്ഥാനകാലത്തിന്റെ ഡാന്യൂബിയന്‍ പ്രതിനിധിയായിരുന്നു ആള്‍ട്‌ദ്യോര്‍ഫര്‍. 1480-ല്‍ റാറ്റിസ്‌ബോണില്‍ ജനിച്ചു.
പ്രകൃതിദൃശ്യങ്ങള്‍ക്ക്‌ കൂടുതല്‍ പ്രാധാന്യം നല്‌കി എന്നതാണ്‌ ഇദ്ദേഹത്തിന്റെ ചിത്രങ്ങളുടെ പ്രത്യേകത. ആള്‍ട്‌ദ്യോര്‍ഫര്‍ 1511-ല്‍ ചിത്രണംചെയ്‌ത ആസ്റ്റ്രിയന്‍ ആല്‍പ്‌സിന്റെ ദൃശ്യം പ്രാധാന്യമര്‍ഹിക്കുന്ന ഓന്നാണ്‌. ഡാന്യൂബില്‍നിന്ന്‌ ആസ്റ്റ്രിയയിലേക്കു നടത്തിയ യാത്രയില്‍ ലഭിച്ച പ്രചോദനംനിമിത്തമാണ്‌ ഇദ്ദേഹം ആ ചിത്രം രചിച്ചത്‌. വനങ്ങള്‍, പര്‍വതങ്ങള്‍ എന്നിവ ഇദ്ദേഹത്തിന്റെ ചിത്രങ്ങള്‍ക്ക്‌ വിഷയീഭവിച്ചിട്ടുണ്ട്‌. മ്യൂണിക്കിലെ മ്യൂസിയത്തില്‍ സൂക്ഷിച്ചിട്ടുള്ള ബാറ്റില്‍ ഒഫ്‌ അര്‍ബേല എന്ന ചിത്രമാണ്‌ ഇദ്ദേഹത്തിന്റെ രചനകളില്‍ ഏറ്റവും മികച്ചതായി കരുതപ്പെട്ടുവരുന്നത്‌. ചെമ്പിലും തടിയിലും ഇദ്ദേഹം ചെയ്‌തിട്ടുള്ള ആലേഖ്യങ്ങള്‍ വളരെ പ്രശസ്‌തങ്ങളാണ്‌. ചിത്രരചനയില്‍ പ്രകാശത്തിന്റെ പ്രാധാന്യത്തെപ്പറ്റി ഇദ്ദേഹം പ്രത്യേകപഠനം നടത്തുകയുണ്ടായി. റാറ്റിസ്‌ ബോണ്‍ നഗരത്തിന്റെ ശില്‌പി ആള്‍ട്‌ദ്യോര്‍ഫര്‍ ആയിരുന്നു. ഫാമിലി ഒഫ്‌ സാറ്റിഴ്‌സ്‌ (Family of Satyrs), സെന്റ്‌ ജോര്‍ജ്‌ ഇന്‍ ദ്‌ ഫോറസ്റ്റ്‌ (St. George in the Forest), റെസ്റ്റ്‌ ഓണ്‍ ദ്‌ ഫ്‌ളൈറ്റ്‌ ഇന്റു ഈജിപ്‌ത്‌ (Rest on the Flight into Egypt), തുടങ്ങിയവ ഇദ്ദേഹത്തിന്റെ ഇതര വിഖ്യാത കലാസൃഷ്‌ടികളാണ്‌.
