This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ആബെ, കോബോ (1924 - 93)
സര്‍വ്വവിജ്ഞാനകോശം സംരംഭത്തില്‍ നിന്ന്
ആബെ, കോബോ (1924 - 93)
Abe, Kobo
ജാപ്പനീസ്‌ നോവലിസ്റ്റും നാടകരചയിതാവും 1924 മാര്‍ച്ച്‌ 7-ന്‌ ടോക്കിയോയിലുള്ള കിറ്റയില്‍ ജനിച്ചു. മഞ്ചൂരിയയിലാണ്‌ വളര്‍ന്നത്‌. വൈദ്യശാസ്‌ത്രത്തില്‍ ബിരുദം നേടിയശേഷം സാഹിത്യത്തില്‍ താല്‍പര്യമുണരുകയും രചനയില്‍ വ്യാപൃതനാകുകയും ചെയ്‌തു.
ദ്‌ വാള്‍ എന്ന കൃതി അകുതാഗവാ പുരസ്‌കാരം (1951) നേടിയതിനു ശേഷമാണ്‌ ആബെ ജപ്പാന്‍ സാഹിത്യലോകത്ത്‌ ഏറെ പ്രശസ്‌തനായത്‌. യാഥാസ്ഥിതിക ജപ്പാന്‍ സാഹിത്യശൈലിയില്‍ നിന്നും മാറി അന്യാധീനത മുഖ്യപ്രമേയമാക്കിയാണ്‌ ഇദ്ദേഹത്തിന്റെ മിക്ക നോവലുകളും നാടകങ്ങളും രചിക്കപ്പെട്ടത്‌. ആദ്യകാല കൃതികള്‍ മഞ്ചൂരിയെയും യുദ്ധാനന്തര ജപ്പാനെയുംകുറിച്ചായിരുന്നു. പിന്നീടുള്ള കൃതികളില്‍ പരിഷ്‌കൃതവും വിസ്‌ഫോടകവുമായ സാമ്പത്തിക വളര്‍ച്ചയുടെ വക്കത്തെത്തിനില്‍ക്കുന്നതുമായ വ്യാവസായിക സമൂഹത്തിന്‌ ഊന്നല്‍ നല്‍കിക്കാണുന്നു.
ദായിയോന്‍ കാപിയോക്ക്‌ (1959), സുനാ നോ ഒനാ (1962), മിക്കായ്‌ (1977) മുതലായവയാണ്‌ ആബെയുടെ പ്രശസ്‌ത കൃതികള്‍. 1960-ല്‍ സംവിധായകന്‍ ഹിരോഷി തെഫിഗഹാരയുമായ്‌ ചേര്‍ന്ന്‌ ദ്‌ പിറ്റ്‌ ഫാള്‍, വുമന്‍ ഇന്‍ ദ്‌ ഡ്യൂണ്‍സ്‌, ദ്‌ ഫേസ്‌ ഒഫ്‌ അനദര്‍, ദ്‌ റൂയിന്‍ഡ്‌ മാപ്പ്‌ മുതലായവ അഭ്രപാളിയിലേയ്‌ക്ക്‌ പകര്‍ത്തി. വുമന്‍ ഇന്‍ ദ്‌ ഡ്യൂണ്‍സ്‌ കാന്‍ ഫിലിം ഫെസ്റ്റിവലില്‍ പ്രദര്‍ശിപ്പിച്ചതോടെ ഇദ്ദേഹത്തിന്റെ പ്രശസ്‌തി ആഗോളതലത്തിലേക്ക്‌ ഉയര്‍ന്നു. പലതവണ നോബല്‍ പുരസ്‌ക്കാരത്തിന്‌ ആബെയുടെ പേര്‌ നിര്‍ദേശിക്കപ്പെട്ടിരുന്നു.
1993 ജനു. 22-ന്‌ ആബെ അന്തരിച്ചു.
(നസീമ ദത്ത്‌)
