This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ആഫ്രിക്കാനസ്‌, സെക്‌സ്‌റ്റസ്‌ ജൂലിയസ്‌
സര്‍വ്വവിജ്ഞാനകോശം സംരംഭത്തില്‍ നിന്ന്
ആഫ്രിക്കാനസ്‌, സെക്‌സ്‌റ്റസ്‌ ജൂലിയസ്‌
Africanus, Sextus Julius
എ.ഡി. രണ്ടും മൂന്നും ശ.-ങ്ങളില്‍ ജീവിച്ചിരുന്ന ചരിത്രകാരന്‍. ഈല്യകാപ്പിറ്റോലിന (ജറുസലേം)യിലാണ്‌ അദ്ദേഹം ജനിച്ചതെന്നും എമ്മാസിലാണ്‌ ജീവിതം കഴിച്ചുകൂട്ടിയതെന്നും കരുതപ്പെടുന്നു. സെപ്‌റ്റിമിയസ്‌ സെവറസ്‌ ചക്രവര്‍ത്തി (146-211)ക്കുവേണ്ടി അദ്ദേഹം ഒസ്രാനിയന്‍മാരോട്‌ (Osroenians) എതിരിട്ടു. ഏഷ്യാമൈനര്‍ മുഴുവന്‍ അദ്ദേഹം സഞ്ചരിച്ചിട്ടുണ്ട്‌ (195-240). അഞ്ചുവാല്യങ്ങളിലായി രചിച്ച ലോകചരിത്രം മൂലമാണ്‌ അദ്ദേഹം പ്രശസ്‌തനായത്‌. ജീവോത്‌പത്തിക്കും യേശുക്രിസ്‌തുവിനുമിടയ്‌ക്കുള്ള കാലഘട്ടം 5,499 വര്‍ഷങ്ങളാണെന്ന്‌ അദ്ദേഹം ഈ കൃതിയില്‍ കണക്കാക്കിയിരിക്കുന്നു. അലക്‌സാണ്ട്രിയന്‍ കാലഗണന അനുസരിച്ചാണ്‌ അദ്ദേഹം ഇങ്ങനെ കണക്കുകൂട്ടിയത്‌. അദ്ദേഹത്തിന്റെ കൃതികള്‍ ഇന്ന്‌ നിലവിലില്ല; എങ്കിലും ക്രൈസ്‌തവചരിത്രകാരനായ സിസേറിയയിലെ യൂസിബിയസ്‌ (263-340) തന്റെ ചരിത്രകൃതി (Chronica) യില്‍ ആഫ്രിക്കാനസിന്റെ കൃതിയില്‍നിന്നുള്ള ഉദ്ധരണികള്‍ കൊടുത്തിട്ടുണ്ട്‌. കൃഷി, പ്രകൃതിചരിത്രം, സൈനികശാസ്‌ത്രം തുടങ്ങിയവ പ്രതിപാദിക്കുന്ന കെസ്റ്റോയി (Kestoi) എന്ന കൃതിയും ആഫ്രിക്കാനസാണ്‌ രചിച്ചതെന്ന്‌ ചിലര്‍ കരുതുന്നു. മതപരമായ കാര്യങ്ങളിലേക്ക്‌ ആഫ്രിക്കാനസ്‌ തിരിയുന്നതിനു മുമ്പായി രചിച്ചതായിരിക്കാം ഈ ഗ്രന്ഥം എന്ന്‌ ചില ചരിത്രകാരന്മാര്‍ അഭ്യൂഹിക്കുന്നു.
