This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ആന്റിഫൈബ്രിലേറ്ററി ഔഷധങ്ങള്‍
സര്‍വ്വവിജ്ഞാനകോശം സംരംഭത്തില്‍ നിന്ന്
ആന്റിഫൈബ്രിലേറ്ററി ഔഷധങ്ങള്‍
Antifibrillatory Drugs
ഫൈബ്രിലേഷന്‍ അഥവാ വികമ്പനം തടയുന്നതിനുള്ള ഔഷധങ്ങള്‍. ഫൈബ്രിലേഷന്‍ എന്നത്‌ പല അര്‍ഥത്തിലും വ്യാഖ്യാനിക്കപ്പെടാമെങ്കിലും ഹൃദയത്തിന്റെ ആറിക്കിളില്‍(auricle) ഉണ്ടാകുന്ന വികമ്പനത്തെയാണ്‌ ഇവിടെ പ്രത്യേകമായി വിവക്ഷിച്ചിട്ടുള്ളത്‌. ഈ വികമ്പനാവസ്ഥയില്‍ ആറിക്കിളിലൂടെ 400-നും 600-നും ഇടയ്‌ക്ക്‌ സ്‌പന്ദനങ്ങള്‍ താളം (rhythm)ഇല്ലാതെ കടന്നു പോകുന്നു. ഈ വൈഷമ്യം പരിഹരിക്കുന്നതിന്‌ വിനിയോഗിക്കുന്ന ഔഷധങ്ങളില്‍ പ്രധാനമായ ചിലതാണ്‌ ക്വിനിഡിന്‍, പ്രൊക്കേന്‍ അമൈഡ്‌, ലിഡൊക്കേന്‍, പ്രൊപ്രാനൊലോള്‍, ഡൈഫിനൈല്‍ ഹിഡന്റോയിന്‍ എന്നിവ.
സിങ്കോണ മരത്തിന്റെ തൊലിയില്‍ അടങ്ങിയിട്ടുള്ള അനേകം ആല്‍ക്കലോയ്‌ഡുകളിലൊന്നാണ്‌ ക്വിനിഡിന്‍. കൊയിന (ക്വിനൈന്‍) എന്ന പ്രസിദ്ധമായ മലേറിയാ പ്രത്യൗഷധത്തിന്റെ ഒരു ഐസോമര്‍ ആയ ഇത്‌ ഒരു വികമ്പന പ്രത്യൗഷധമാണെന്ന വസ്‌തുത 1917-ല്‍ ആണ്‌ തെളിഞ്ഞത്‌. വികമ്പനം (ആറിക്കിള്‍-വികമ്പനം) അനുഭവിക്കുന്ന മലമ്പനിക്കാര്‍ക്ക്‌ ക്വിനൈന്‍-ചികിത്സ നടത്തിയപ്പോള്‍ പനിയോടൊപ്പം വികമ്പനവും ശമിച്ചതായി കണ്ടെത്തുകയുണ്ടായി. ഇതേത്തുടര്‍ന്ന്‌ ക്വിനിഡിന്‍ എന്ന ആല്‍ക്കലോയ്‌ഡ്‌ വേര്‍തിരിക്കപ്പടുകയും വികമ്പനത്തെ തടയുന്നതിന്‌ ഇതിനു കൂടുതല്‍ ശക്തിയുണ്ടെന്നു തെളിയിക്കപ്പെടുകയും ചെയ്‌തു. ഹൃദയപേശികളുടെ ഉപാപചയ പ്രക്രിയകളില്‍ ഇടപെട്ടുകൊണ്ടാണ്‌ ഈ രാസപദാര്‍ഥം പ്രവര്‍ത്തിക്കുന്നത്‌. അതിസാദകത്വം (depression) എന്ന സവിശേഷഗുണധര്‍മം ഉള്ള ഈ മരുന്ന്‌ പേശികളുടെ അവിധേയതാകാലം (refractory period) ദീര്‍ഘിപ്പിക്കുകയും അങ്ങനെ വികമ്പനത്തെ തടയുകയും ചെയ്യുന്നു. ക്വിനിഡിന്‍ മറ്റു പല ഉപഫലങ്ങള്‍ക്കും കാരണമാകയാല്‍ പ്രത്യേകം ശ്രദ്ധയോടെ കൈകാര്യം ചെയ്യേണ്ട ഒരു മരുന്നാണ്‌.
പ്രൊക്കേന്‍ അമൈഡ്‌ എന്ന രാസപദാര്‍ഥം ക്വിനിഡിന്‍ പോലെതന്നെ വികമ്പനഹരമായ ഔഷധമാണ്‌. ഏതാണ്ട്‌ ഇതിനോടു സദൃശമായ മറ്റൊരു ഔഷധമാണ്‌ ലിഡൊക്കേന്‍ (lidocane). ലിഡൊക്കേനിന്റെ പ്രാഥമിക പ്രവര്‍ത്തനം സ്ഥാനീയനിശ്ചേതകമായിട്ടാണ്‌ (local anaesthetic). പ്രൊക്കേന്‍ അമൈഡിന്‌ ക്വിനിഡിന്റേതു പോലുള്ള ഉപഫലങ്ങള്‍ ഉണ്ടാക്കുവാന്‍ കഴിയും. ഡൈഫിനൈല്‍ ഹിഡന്റോയിന്‍, മെപാക്രിന്‍, സിന്‍ട്രാപാന്‍, പെഥിഡിന്‍, ഡൈലാന്റിന്‍ സോഡിയം മുതലായ വേറെയും പല രാസവസ്‌തുക്കള്‍ ആന്റിഫൈബ്രിലേറ്ററികളായി സന്ദര്‍ഭമനുസരിച്ച്‌ ഉപയോഗിച്ചു വരുന്നു. നോ: അതാളത
