This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഈസ്റ്റർ ദ്വീപ്‌
സര്‍വ്വവിജ്ഞാനകോശം സംരംഭത്തില്‍ നിന്ന്
ഈസ്റ്റർ ദ്വീപ്‌
Easter Island
പസിഫിക്‌ സമുദ്രത്തിൽ തെക്കേ അമേരിക്കന്‍ തീരത്തുനിന്നും 3,680 കി.മീ പടിഞ്ഞാറായി സ്ഥിതിചെയ്യുന്ന ഒരു ദ്വീപ്‌. റാപാനൂയി എന്നും പേരുണ്ട്‌. 27o 8' തെക്ക്‌; 109o 24' പടിഞ്ഞാറ്‌ 130 ച.കി.മീ. വിസ്‌തീർണമുള്ള ഈ അഗ്നിപർവത ദ്വീപ്‌ ചിലിയുടെ അധീനതയിലാണ്‌. ദ്വീപിന്റെ കടലോരങ്ങള്‍ ചെങ്കുത്തായി കാണുന്നതിന്റെ വെളിച്ചത്തിൽ സമുദ്രത്തറയിൽനിന്നു പൊങ്ങിയ ഒരു അഗ്നി പർവതത്തിന്റെ ജലോപരിതലത്തിനുപരി എഴുന്നുനില്‌ക്കുന്ന ശിഖരമാണ്‌ ഈ ദ്വീപെന്നാണ്‌ ഭൂവിജ്ഞാനികളുടെ കണ്ടെത്തൽ. ഉപോഷ്‌ണ കാലാവസ്ഥയാണ്‌ ഇവിടെ അനുഭവപ്പെടുന്നത്‌; സാമാന്യമായ തോതിൽ മഴ പെയ്യുന്നു. ലുപ്‌തങ്ങളായ അഗ്നിപർവതങ്ങളുടെ സ്‌ഫോടഗർത്തങ്ങള്‍ ജലം നിറഞ്ഞ്‌ കൂപങ്ങളായിത്തീർന്നിട്ടുള്ളതൊഴിച്ചാൽ ഈ ദ്വീപിൽ മറ്റു ജലാശയങ്ങളോ ആറുകളോ ഇല്ല.
1722-ലെ ഈസ്റ്റർദിനത്തിൽ ഡച്ച്‌ നാവികനായ റോഗെറീന്‍ ഈ ദ്വീപ്‌ കണ്ടെത്തിയതിനാൽ ഇതിന്‌ ഈസ്റ്റർ ദ്വീപ്‌ എന്ന പേരു നല്‌കപ്പെട്ടു. അതിനുമുമ്പുതന്നെ പോളിനേഷ്യന്‍ ജനതയാണ്‌ ഈ ദ്വീപിൽ അധിവസിച്ചിരുന്നത്‌. അടിമവ്യാപാരത്തിലൂടെ തദ്ദേശീയരിൽ നല്ലൊരു സംഖ്യ ദ്വീപിൽ നിന്നു കടത്തപ്പെട്ടു. ചെറുത്തുനില്‌പിൽ മൃതിയടഞ്ഞും രോഗബാധമൂലവും പോളിനേഷ്യർ ക്രമേണ വംശനാശത്തെ അഭിമുഖീകരിച്ചതായി പഠനങ്ങള്‍ സാക്ഷ്യപ്പെടുത്തുന്നു. 1872-ൽ കേവലം 175 മാത്രമായിരുന്നു ദ്വീപിലെ തദ്ദേശീയരുടെ സംഖ്യ. 1888-ൽ ചിലിയുടെ അധീനതയിലായിത്തീർന്നതോടെ സ്ഥിതിഗതികള്‍ അഭിവൃദ്ധിപ്പെട്ടു. തദ്ദേശീയജനതയുടെ സംരക്ഷണത്തിനും ഉന്നമനത്തിനുമുള്ള ബഹുവിധ സംവിധാനങ്ങളുണ്ടായി. 1960-ൽ ഈ ദ്വീപിൽ പോളിനേഷ്യരുടെ എച്ചം 860 ആയി. പോളിനേഷ്യന്‍ ഭാഷ സംസാരിക്കുന്ന ഇവരുടെ മുഖ്യ ഉപജീവനമാർഗം ആടുവളർത്തലാണ്‌. ഇവിടെ ശുദ്ധജലം ദുർലഭമാണെങ്കിലും ചെറിയ തോതിൽ ചോളം, ഗോതമ്പ്‌, ചേമ്പ്‌, ഫലവർഗങ്ങള്‍ എന്നിവ കൃഷിചെയ്‌തു വരുന്നുണ്ട്‌.
ഈസ്റ്റർ ദ്വീപിന്റെ പ്രശസ്‌തിക്കു നിദാനം സമൃദ്ധമായ പുരാവസ്‌തു ശേഖരമാണ്‌. ഇവയിൽ സ്‌തൂപങ്ങള്‍, പാത്രങ്ങള്‍, പ്രതിമകള്‍, സ്‌മാരകശിലകള്‍, ശിരോരൂപങ്ങള്‍ എന്നിവ ഉള്‍പ്പെടുന്നു. ലാവാശിലകളിൽ കൊത്തിയെടുത്തിട്ടുള്ള ഒറ്റക്കൽ ശിരോരൂപങ്ങളാണ്‌ ഇക്കൂട്ടത്തിൽ ഏറ്റവും പ്രധാന്യമർഹിക്കുന്നത്‌. 9 മീറ്ററിലേറെ ഉയരവും 508 ക്വിന്റൽ തൂക്കമുള്ള ഭീമാകാരമായ ഒറ്റക്കൽ ശില്‌പവും ഇവിടെ ഉണ്ട്‌. ലാവാഖണ്ഡങ്ങള്‍ വിദൂരസ്ഥലങ്ങളിലേക്കു നീക്കം ചെയ്‌താണ്‌ ശിരോരൂപങ്ങള്‍ കൊത്തിയുണ്ടാക്കിയിരിക്കുന്നത്‌ എന്നത്‌ ശ്രദ്ധേയമാണ്‌. ശിരോരൂപങ്ങളിൽ ഉഷ്‌ണീഷങ്ങള്‍ കൊത്തിച്ചേർത്തിരിക്കുന്നതിൽ നിന്ന് ഇവയ്‌ക്ക്‌ മതപരമായ പ്രധാന്യം ഉണ്ടായിരുന്നുവെന്ന്‌ ഊഹിക്കേണ്ടിയിരിക്കുന്നു. അതിപ്രാചീനമായ സാംസ്‌കാരികപാരമ്പര്യം സൂചിപ്പിക്കുന്നവയാണ്‌ ഈ പുരാവസ്‌തുക്കള്‍.
ചിലിയിലെ വാൽപൊറൈസോ പ്രവിശ്യയുടെ ഒരു ഭാഗമായാണ്‌ ഭരണപരമായ കാര്യങ്ങളിൽ ഈസ്റ്റർദ്വീപ്‌ ഗണിക്കപ്പെട്ടുവരുന്നത്‌. ചിലി, താഹിതി എന്നിവിടങ്ങളുമായി വ്യോമബന്ധം ഏർപ്പെടുത്തപ്പെട്ടതോടെ ഒരു ടൂറിസ്റ്റ്‌ കേന്ദ്രമെന്ന നിലയിൽ ഈസ്റ്റർ ദ്വീപ്‌ പ്രചാരം നേടിയിരിക്കുന്നു. ജനസംഖ്യ: 5761 (2012) തലസ്ഥാനം: ഹാങ്ങരോവ.
