This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഇവാന്‍സ്‌, മാർട്ടിന്‍ ജോണ്‍ (1941 - )
സര്‍വ്വവിജ്ഞാനകോശം സംരംഭത്തില്‍ നിന്ന്
ഇവാന്‍സ്‌, മാർട്ടിന്‍ ജോണ്‍ (1941 - )
Evans, Martin John
നോബൽസമ്മാനിതനായ (2007) ബ്രിട്ടീഷ്‌ ശാസ്‌ത്രജ്ഞന്‍. ചുണ്ടെലികളുടെ ഭ്രൂണമൂലകോശങ്ങളെ (Embryonic stem cells) പെരീക്ഷണശാലയിൽ ആദ്യമായി സംവർധനം (culture) ചെയ്‌തെടുത്ത (1981) ശാസ്‌ത്രകാരനാണിദ്ദേഹം. ഭ്രൂണമൂലകോശങ്ങള്‍ ഉപയോഗപ്പെടുത്തി ചുണ്ടെലികളിൽ ജീന്‍പരിവർത്തനം സാധ്യമാക്കിയതിന്റെയും ഇത്‌ മനുഷ്യരോഗചികിത്സയിൽ വരുത്തിത്തീർക്കാവുന്ന വിപ്ലവകരമായ മുന്നേറ്റത്തിന്റെയും അടിസ്ഥാനത്തിൽ ശരീരക്രിയാവിജ്ഞാനം അഥവാ വൈദ്യശാസ്‌ത്രത്തിനുള്ള നോബൽ പുരസ്‌കാരം മാറിയോ കപീച്ചി, ഒളിവർ സ്‌മിത്തിസ്‌ എന്നിവരുമായി ഇദ്ദേഹം പങ്കുവയ്‌ക്കുകയുണ്ടായി.
മാർട്ടിന്‍ ജോണ്‍സ്‌ ഇവാന്‍സ്‌ 1941 ജനുവരി 1-ന്‌ ഇംഗ്ലണ്ടിലെ ഗ്‌ളൗസെർസ്റ്റെർഷയറിലുള്ള സ്‌ട്രൗഡിൽ ജനിച്ചു. ബാല്യകാലം മുതൽ ശാസ്‌ത്രവിഷയങ്ങളിൽ തത്‌പരനായിരുന്ന ഇദ്ദേഹം ജീവശാസ്‌ത്രം, രസതന്ത്രം, ജൈവരസതന്ത്രം എന്നീ വിഷയങ്ങളിൽ പഠനം നടത്തുകയും 1963-ൽ ക്രസ്റ്റ്‌ കോളജിൽനിന്നും ബിരുദം കരസ്ഥമാക്കുകയും ചെയ്‌തു. ഇതിനുശേഷം ലണ്ടനിലെ യൂണിവേഴ്‌സിറ്റി കോളജിൽ ഉപരിപഠനം നടത്തുകയും 1969-ൽ പിഎച്ച്‌.ഡി. നേടുകയുമുണ്ടായി. തുടർന്ന്‌ അവിടെ അധ്യാപകവൃത്തി സ്വീകരിച്ച ഇവാന്‍സ്‌ ഗവേഷണം തുടരുകയും ചെയ്‌തു. 1978-ൽ കേംബ്രിജ്‌ സർവകലാശാലയിലെ ജനിതകശാസ്‌ത്രവിഭാഗത്തിൽച്ചേർന്നു. 1990-കളിൽ സെന്റ്‌ എഡ്‌മണ്ട്‌സ്‌ കോളജിൽ ഗവേഷകനായും പ്രവർത്തിച്ചു. 1999-ൽ കാർഡിഫ്‌ സർവകലാശാലയിലെ സസ്‌തനി ജനിതകശാസ്‌ത്ര വിഭാഗത്തിൽ പ്രാഫസറും സ്‌കൂള്‍ ഒഫ്‌ ബയോസയന്‍സ്‌ ഡയറക്‌ടറുമായി ജോലിയിൽ പ്രവേശിച്ച ഇവാന്‍സ്‌ 2007-ൽ വിരമിക്കുന്നതുവരെ അവിടെ തുടർന്നു. 2012-ൽ കാർഡിഫ്‌ സർവകലാശാലയുടെ ചാന്‍സലറായി.
ഇവാന്‍സിന്റെ ഗവേഷണമേഖല വികസനാത്മക ജീവശാസ്‌ത്രം (Developmental Biology) ആയിരുന്നു. മാത്യു കൗഫ്‌മാന്‍ (Mathew Kaufman) എന്ന സഹഗവേഷകനോടൊപ്പം ചുണ്ടെലിയുടെ എംബ്രിയോബ്‌ളാസ്റ്റ്‌ (Embryoblast) ഘട്ടത്തിലുള്ള ഭ്രൂണത്തിൽ നിന്നും ഭ്രൂണമൂലകോശങ്ങളെ വേർതിരിച്ചെടുക്കുന്നതിൽ ഇവാന്‍സ്‌ വിജയിച്ചു. ഈ ഭ്രൂണമൂലകോശങ്ങള്‍ പൂർണ വളർച്ചയെത്തിയ ചുണ്ടെലികളുടെ ഏതൊരു കോശത്തിലേക്കും വിഭേദന (differentiate) വിധേയമാകാന്‍ കെല്‌പുള്ളവയായിരുന്നു. ഈ ഭ്രൂണമൂലകോശങ്ങളെ ജനിതകപരമായി ഇവാന്‍സും കൗഫ്‌മാനും പരിവർത്തനം ചെയ്യുകയും പെണ്‍ചുണ്ടെലിയുടെ ഗർഭപാത്രത്തിൽ നിക്ഷേപിക്കുകയും ചെയ്‌തു. ഇത്‌ വളർന്ന്‌ ജനിതക പരിവർത്തനം നേടിയെടുത്ത ജീവിയായി പിറവിയെടുക്കുകയുണ്ടായി. വിപ്ലവകരമായ ഈ നേട്ടം ജീവശാസ്‌ത്രരംഗത്തെ ഒരു നാഴികക്കല്ലു തന്നെയായി മാറി. തുടർന്നും ഇവാന്‍സ്‌ ഈ രംഗത്തുനടത്തിയ ഗവേഷണപഠനങ്ങളാണ്‌ ഇദ്ദേഹത്തിന്‌ നോബൽ സമ്മാനം നേടിക്കൊടുത്തത്‌.
റോയൽ സൊസൈറ്റി ഫെലോ (1993), അക്കാദമി ഒഫ്‌ മെഡിക്കൽ സയന്‍സിന്റെ സ്ഥാപക ഫെലോ (1998), വികസനാത്മക ജീവശാസ്‌ത്രഗവേഷണമികവിനുള്ള അമേരിക്കയുടെ മാർച്ച്‌ ഒഫ്‌ ടൈംസിന്റെ വാർഷിക പുരസ്‌കാരം (1999), അടിസ്ഥാന വൈദ്യശാസ്‌ത്രഗവേഷണത്തിനുള്ള ആൽബർട്ട്‌ ലാസ്‌കർ അവാർഡ്‌ (2001), ന്യൂയോർക്ക്‌ മൗണ്ട്‌ സിനായ്‌ സ്‌കൂള്‍ ഒഫ്‌ മെഡിസിന്റെ ഓണററി ഡോക്‌ടറേറ്റ്‌ (2002), വൈദ്യശാസ്‌ത്രരംഗത്തെ സേവനങ്ങളെ ആദരിച്ച്‌ പ്രഭുപദവി (2004), ഇംഗ്ലണ്ടിലെ ബാത്ത്‌ സർവകലാശാലയുടെ ഓണററി ഡോക്‌ടറേറ്റ്‌ (2005), ലണ്ടന്‍ യൂണിവേഴ്‌സിറ്റി കോളജിന്റെ ഓണററി ഡോക്‌ടറേറ്റ്‌ (2008), റോയൽ സൊസൈറ്റി ഒഫ്‌ മെഡിസിന്റെ ഗോള്‍ഡ്‌ മെഡൽ (2009), റോയൽ സൊസൈറ്റിയുടെ കോപ്‌ലീ മെഡൽ (2009), ഫാരഡേ ഇന്‍സ്റ്റിറ്റ്യൂട്ടിന്റെ ഉപദേശകസമിതി അംഗത്വം (2009) എന്നിവ ഇവാന്‍സിനു ലഭിച്ച അംഗീകാരങ്ങളിൽ ചിലത്‌ മാത്രമാണ്‌.
(ഡോ. ആറന്മുള ഹരിഹരപുത്രന്‍)
