This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
എറ്റി, വില്യം (1787 - 1849)
സര്‍വ്വവിജ്ഞാനകോശം സംരംഭത്തില്‍ നിന്ന്
എറ്റി, വില്യം (1787 - 1849)
Etty William
പുരാണ കഥാപാത്രങ്ങളുടെ നഗ്നചിത്രങ്ങള്‍ വരയ്‌ക്കുന്നതിൽ പ്രശസ്‌തി നേടിയ ബ്രിട്ടീഷ്‌ ചിത്രകാരന്‍. 1787 മാ. 10-ന്‌ യോർക്കിൽ ജനിച്ചു. ഹള്ളിലുള്ള ഒരു അച്ചടിശാലയിൽ തൊഴിൽ ജീവിതം ആരംഭിച്ചു. 1805-ൽ ലണ്ടനിലെത്തി. 1807-ൽ റോയൽ അക്കാദമി സ്‌കൂളിൽ സർ തോമസ്‌ ലോറന്‍സിന്റെ കീഴിൽ ചിത്രരചന അഭ്യസിച്ചു. 1815-ൽ ഇദ്ദേഹം ഫ്രാന്‍സിലേക്കു പോയി. 1816-ൽ ഇറ്റലി സന്ദർശിച്ചു. തിരിച്ചുവരുംവഴി പാരിസിൽവച്ച്‌ ഷീന്‍ ബാപ്‌തിസ്‌ത്‌ റെജിനാള്‍ഡ്‌ (1754-1829) എന്ന ചിത്രകാരനുമായി പരിചയപ്പെടുന്നതിനിടയായി. രണ്ടാഴ്‌ചക്കാലം മാത്രമേ ഇവർ ഒന്നിച്ചു കഴിഞ്ഞുള്ളൂവെങ്കിലും എറ്റി പിന്നീട്‌ രചിച്ച പല പ്രശസ്‌ത ചിത്രങ്ങളിലും ഷീന്‍ ബാപ്‌തിസ്‌തിന്റെ സ്വാധീനത തെളിഞ്ഞുകാണാം. ലേഡിലെവന്‍ ആർട്ട്‌ ഗ്യാലറിയിൽ സൂക്ഷിച്ചിട്ടുള്ള "ക്ലിയോപാട്രാസ്‌ അറൈവൽ ഇന്‍ സിലിഷ്യാ' (Cleopatra's Arrival in Cilicia) എന്ന ചിത്രം ഇതിന്‌ ഉദാഹരണമാണ്‌. 1821-23 വർഷങ്ങളിൽ ഇദ്ദേഹം ഫ്രാന്‍സും ഇറ്റലിയും വീണ്ടും സന്ദർശിച്ചു. ഈ സന്ദർശനവേളയിൽ ഇദ്ദേഹത്തിന്‌ റൂബെന്‍സ്‌, ടിഷ്യന്‍, വാന്‍ഡൈക്‌, ഗ്വിലിയോ റൊമാനോ തുടങ്ങി പ്രശസ്‌തരായ പല ചിത്രകാരന്മാരുമായി പരിചയപ്പെടാന്‍ അവസരം ലഭിച്ചു. ഇവരുടെ സ്വാധീനത കുറച്ചുകാലത്തേക്കു മാത്രമേ ഇദ്ദേഹത്തിൽ നിലനിന്നുള്ളൂ.
ലൈംഗികാസക്തി ജനിപ്പിക്കുന്ന വികാരജന്യങ്ങളായ ചിത്രങ്ങളാണ്‌ എറ്റി അധികവും രചിച്ചിട്ടുള്ളത്‌. എന്നാൽ കാല്‌പനിക സ്വഭാവമുള്ള രസകരങ്ങളായ മറ്റു വിഷയങ്ങള്‍ ചിത്രീകരിക്കുന്നതിലും വില്യം എറ്റി പ്രശസ്‌തിനേടിയിരുന്നു. എങ്കിലും ഇദ്ദേഹം വരച്ചിട്ടുള്ള നഗ്നചിത്രങ്ങള്‍ക്കാണ്‌ കൂടുതൽ പ്രശംസ ലഭിച്ചിട്ടുള്ളത്‌. വീനസ്സിന്റെ ഛായയിൽ വരച്ചിട്ടുള്ള നഗ്ന സ്‌ത്രീയുടെ ചിത്രം ഇതിനുദാഹരണമാണ്‌. റൂബെന്‍സും വെനീഷ്യസും എറ്റിയുടെ ശൈലി അനുകരിച്ചവരാണ്‌. യോർക്ക്‌ ആർട്ട്‌ ഗ്യാലറിയിൽ വില്യം എറ്റി രചിച്ച അനേകം ചിത്രങ്ങള്‍ സൂക്ഷിച്ചിട്ടുണ്ട്‌. 1849 ന. 13-ന്‌ വില്യം എറ്റി അന്തരിച്ചു.
