This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കുലശേഖരവർമന്‍
സര്‍വ്വവിജ്ഞാനകോശം സംരംഭത്തില്‍ നിന്ന്
കുലശേഖരവർമന്‍
സംസ്‌കൃത സാഹിത്യകാരനായ ഒരു കേരള രാജാവ്‌. കുലശേഖരന്‍ എന്നത്‌ അഭിഷേകകാലത്ത്‌ സ്വീകരിച്ചിരുന്ന സ്ഥാനപ്പേരാണെന്ന്‌ ഉള്ളൂർ പറയുന്നു. ഇദ്ദേഹത്തിന്റെ യഥാർഥ നാമധേയം അജ്ഞാതമാണ്‌. ഇദ്ദേഹം മൂന്നു നാടകങ്ങള്‍ നിർമിച്ചിട്ടുള്ളതായി കേള്‍വിയുണ്ട്‌. അവയിൽ തപതീസംവരണവും സുഭദ്രാധനഞ്‌ജയവും മാത്രമേ കിട്ടിയിട്ടുള്ളൂ. മൂന്നാമത്തേതിന്റെ പേർ വിച്ഛിന്നാഭിഷേകമെന്നാണ്‌. പ്രസ്‌തുത കൃതികളിൽ നിന്ന് ഇദ്ദേഹം മഹോദയപുരത്ത്‌ (തിരുവഞ്ചിക്കുളത്ത്‌) രാജ്യഭാരം ചെയ്‌തിരുന്ന ഒരു കേരളരാജാവായിരുന്നു എന്നും ഇദ്ദേഹത്തിന്‌ സംഗീതത്തിലും സാഹിത്യത്തിലും അസാമാന്യമായ പാടവവും മഹാവിഷ്‌ണുവിൽ അപരിമേയമായ ഭക്തിയും കാളിദാസനെപ്പറ്റി അപാരമായ ആദരവും മഹാഭാരതത്തിൽ അന്യാദൃശമായ പ്രതിപത്തിയും ഉണ്ടായിരുന്നു എന്നും സ്‌പഷ്‌ടമാകുന്നു. ധനഞ്‌ജയന്റെ വ്യംഗ്യവ്യാഖ്യയിലും ഇദ്ദേഹത്തെപ്പറ്റി പരാമർശമുണ്ട്‌. തപതീസംവരണവും സുഭദ്രാധനഞ്‌ജയവും രണ്ടു രത്‌നങ്ങളാണെന്നാണ്‌ ഉള്ളൂർ അഭിപ്രായപ്പെട്ടിട്ടുള്ളത്‌. അവയുടെ ഇതിവൃത്തം പുരാണ പ്രസിദ്ധങ്ങളാണ്‌. കുലശേഖരവർമന്‍ ഈ നാടകങ്ങള്‍ക്കു പുറമേ ആശ്ചര്യമഞ്‌ജരി എന്നൊരു ഗദ്യകാവ്യവും രചിച്ചിട്ടുണ്ട്‌. കുലശേഖരവർമനും കുലശേഖര ആഴ്‌വാരും ഒരാളാണെന്ന്‌ ചില പണ്ഡിതന്മാർക്ക്‌ അഭിപ്രായമുണ്ട്‌.
(വി.ആർ. പരമേശ്വരന്‍ പിള്ള)
