This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ആർഎന്‍എ ലോകം
സര്‍വ്വവിജ്ഞാനകോശം സംരംഭത്തില്‍ നിന്ന്
ആർഎന്‍എ ലോകം
The RNA World
ജനിതക വിവരങ്ങള്‍ സംഭരിക്കുക, ജൈവരാസിക പ്രതിപ്രവർത്തനങ്ങളുടെ ത്വരകമായി പ്രവർത്തിക്കുക തുടങ്ങി, ഇന്ന്‌ ഡിഎന്‍എയും പ്രാട്ടീനുകളും നിർവഹിക്കുന്ന ധർമങ്ങള്‍ ആർഎന്‍എ തന്മാത്രകള്‍ നിർവഹിച്ചിരുന്ന പരിണാമ ഘട്ടം. ഇത്തരമൊരു പരിണാമഘട്ടത്തെക്കുറിച്ചുള്ള ആശയങ്ങള്‍ 1960-കളിൽത്തന്നെ അലക്‌സാണ്ടർ റിച്ച്‌ (1963), കാള്‍ വോസെ (1968) തുടങ്ങിയ ജീവശാസ്‌ത്രജ്ഞർ അവതരിപ്പിച്ചിരുന്നെങ്കിലും "ആർഎന്‍എ ലോകം'എന്ന പദം ആദ്യമായി ഉപയോഗിച്ചത്‌ 1986-ൽ അമേരിക്കന്‍ ഭൗതിക ശാസ്‌ത്രജ്ഞനും ജൈവരസന്ത്രജ്ഞനും തന്മാത്രാജീവശാസ്‌ത്രത്തിലെ അഗ്രഗാമിയുമായ വാള്‍ട്ടർ ഗിൽബെർട്ട്‌ ആണ്‌. ആർഎന്‍എയുടെ ഉത്‌പ്രരക സ്വഭാവത്തെയും ആർഎന്‍എ എന്‍സൈമുകളായ റൈബോസൈമുക(ribozyme)ളെയും സംബന്ധിച്ച കണ്ടെത്തലുകളുടെ വിശകലനത്തിലാണ്‌ (Thomas Cech, 1982) അദ്ദേഹം ഈ പദം പ്രയോഗിച്ചത്‌. ഫോസ്‌ഫോഡൈഎസ്റ്റർ ബോണ്ടുകള്‍ പിളർക്കാനും ബന്ധിക്കാനും ആർഎന്‍എയ്‌ക്കു സാധിക്കും എന്ന കണ്ടെത്തലാണ്‌ "ആർഎന്‍എ ലോകം' എന്ന പരികല്‌പനയിലേക്ക്‌ നയിച്ചത്‌. സ്വയം പകർത്തലിലൂടെ നിലനിന്നിരുന്ന പ്രാകൃത ജീവവ്യവസ്ഥകളിൽ (Primitive living systems) ആർഎന്‍എ ഒരു ത്വരകമായി പ്രവർത്തിച്ചിരുന്നതിനാൽത്തന്നെ ഡിഎന്‍എയുടെയോ പ്രാട്ടീനുകളുടെയോ ആവശ്യമില്ലായിരുന്നുവെന്ന്‌ ഗിൽബെർട്ട്‌ ചൂണ്ടിക്കാണിച്ചു. ഫോസ്‌ഫോഡൈഎസ്റ്റർ ബോണ്ടുകള്‍ പിളർക്കാനും ബന്ധിക്കാനും ആർഎന്‍എയ്‌ക്കു സാധിക്കുമെന്നതിന്റെ കൂടുതൽ ദൃഷ്‌ടാന്തങ്ങള്‍ കണ്ടെത്തിയതും ബാക്‌റ്റീരിയയുടെ 50 ട റൈബോസോമീയ ഉപഘടകത്തിലെ പെപ്‌റ്റിഡൈൽ ട്രാന്‍സ്‌ഫറേസ്‌ കേന്ദ്ര(Peptidyl transferase centre)ത്തിൽ പ്രോട്ടീനുകള്‍ക്ക്‌ പകരം ആർഎന്‍എ ആണ്‌ ഉള്ളത്‌ എന്ന കണ്ടെത്തലും ഇതിന്‌ ഉപോദ്‌ബലകമായി. ആർഎന്‍എക്കു നിരവധി വ്യത്യസ്‌ത ഉത്‌പ്രരക പ്രവർത്തനങ്ങള്‍ നിർവഹിക്കാനാകുമെന്ന്‌ ആധുനിക പഠനങ്ങള്‍ സൂചിപ്പിക്കുന്നു.
ജീവോത്‌പത്തിയുടെ പ്രാരംഭഘട്ടങ്ങളിലെ ആർഎന്‍എയ്‌ക്കു ഇന്നത്തെ ആർഎന്‍എയുടെ രാസഘടനയായിരിക്കുവാന്‍ സാധ്യതയില്ല എന്നാണ്‌ ശാസ്‌ത്രജ്ഞർ വിലയിരുത്തുന്നത്‌. ആദിമഭൂമിയിലെ അതികഠിന സാഹചര്യങ്ങളിൽ നിലനിൽക്കുവാന്‍ പര്യാപ്‌തമായ രാസഘടനയുള്ള ആർഎന്‍എ ആയിരിക്കാം അന്നുണ്ടായിരുന്നത്‌. അത്തരം ആർഎന്‍എ, ജനിതക-ഉത്‌പ്രരക ധർമങ്ങള്‍ നിർവഹിച്ചിരുന്ന ഒരു ഘട്ടം ജൈവപരിണാമത്തിൽ ഉണ്ടായിരുന്നു എന്ന്‌ ഏറെക്കുറെ അംഗീകരിക്കപ്പെട്ടിട്ടുണ്ട്‌.
പരിണാമത്തിന്റെ തുടർന്നുള്ള ഘട്ടങ്ങളിൽ കൂടുതൽ സങ്കീർണമായ കോശസംവിധാനങ്ങളോടുകൂടിയ ജീവികള്‍ രൂപംകൊണ്ടു. ആർഎന്‍എയുടെ ഘടനയിൽ ന്യൂക്ലിയോറ്റൈഡുകളുടെ ഒരിഴമാത്രമേ ഉള്ളു എന്നതിനാൽ മ്യൂട്ടേഷനുകള്‍ വളരെ വേഗം സംഭവിക്കുകയും ജീവികളിൽ നിരന്തരം മാറ്റങ്ങളുണ്ടാവുകയും ചെയ്യും. ഇത്‌ ചെറുക്കാനും താരതമ്യേന കൂടുതൽ സ്ഥിരത കൈവരിക്കുവാനും ഇരട്ട ഇഴയുള്ള ഡിഎന്‍എ ഉത്‌പാദിപ്പിക്കപ്പെട്ടതോടെ സാധ്യമായി. അതിനാലായിരിക്കാം ക്രമേണ ഡിഎന്‍എ പ്രധാന ജനിതക പദാർഥമായി മാറിയത്‌.
