This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കുടക്‌
സര്‍വ്വവിജ്ഞാനകോശം സംരംഭത്തില്‍ നിന്ന്
കുടക്‌
കർണാടക സംസ്ഥാനത്തിലെ ഏറ്റവും ചെറിയ ഒരു ജില്ല. കൊടക്‌, കൂർഗ്‌ എന്നീ പേരുകളിലും അറിയപ്പെടുന്നു. വടക്ക്‌ അക്ഷാംശം 11º 56¢-þ12º 50¢ കിഴക്ക്‌ രേഖാംശം 75º 22¢-þ76º12¢. മലമ്പ്രദേശം എന്നർഥമുള്ള "കുടു' എന്ന വാക്കിൽ നിന്നാണ്‌ കുടക്‌ പദത്തിന്റെ നിഷ്‌പത്തി. കുടകന്‍ എന്ന രാജാവ്‌ വാണിരുന്ന ദേശമായതിനാലാണ്‌ ഇതിനു കുടക്‌ എന്നപേര്‌ സിദ്ധിച്ചതെന്നും ഒരു പക്ഷമുണ്ട്‌. കുടക്‌ എന്ന പദത്തിന്‌ പടിഞ്ഞാറു ദിക്കിലുള്ള നാട്‌ എന്നും അർഥമുണ്ട്‌; ഈ ജില്ല കർണാടകത്തിന്റെ പടിഞ്ഞാറെ അറ്റത്താണ്‌ സ്ഥിതിചെയ്യുന്നതും. വിസ്‌തൃതി: 4,102 ച.കി.മീ.; ജനസംഖ്യ: 5,48,561 (2001). ഈ ജില്ലയിലെ പരമാവധി നീളം (തെക്കുവടക്ക്‌) 96 കി.മീ., വീതി (കിഴക്കുപടിഞ്ഞാറ്‌) 64 കി.മീ. മെർക്കാറാ, വീരരാജ്‌പെട്ട്‌, സോംവർപെട്ട്‌ എന്നീ മൂന്നു താലൂക്കുകള്‍ ഇതിൽ ഉള്‍പ്പെടുന്നു. മെർക്കാറാ പട്ടണമാണ്‌ (മടികേരി) ജില്ലാ തലസ്ഥാനം.
പ്രകൃതിമനോഹരവും പർവതനിബിഡവുമായ ഈ ജില്ലയിൽ മഴ ധാരാളം കിട്ടുന്നു. കാലാവസ്ഥ ഹിതകരമാണ്‌. ഏപ്രിൽ-മേയ് മാസങ്ങളിൽ ഏറ്റവും കൂടുതൽ ചൂട്‌ അനുഭവപ്പെടുന്നു. ജനുവരിയിൽ താരതമ്യേന ചൂട്‌ കുറവാണ്‌. വർഷത്തിൽ ഏതാണ്ട്‌ 118 ദിവസം വരെ മഴ ലഭിക്കുന്നതായി രേഖപ്പെടുത്തിയിട്ടുണ്ട്‌. ജില്ലയുടെ കിഴക്കേ അതിരായ കുശാല നഗരത്തിൽ ശരാശരി വർഷപാതം 122 സെ.മീ., ജില്ലയിലൊട്ടാകെയുള്ള ശരാശരി വർഷപാതം 349 സെ.മീ. ആണ്‌. മലകളുടെ അടിവാരത്തിൽ നെല്ലും കൂവരകും ചരിവുകളിൽ കാപ്പിയും കൃഷിചെയ്യുന്നു. കാവേരിയാണ്‌ പ്രധാന നദി. ബ്രഹ്മഗിരിയിൽ നിന്നാണിതിന്റെ ഉദ്‌ഭവം. കന്യക, കക്കബ, കാടനൂറ്‌, മുത്താരുമുടി, ഹാരംഗി എന്നീ പോഷകനദികള്‍ കുടക്‌ പ്രദേശത്തുവച്ച്‌ കാവേരിയോടു ചേരുന്നു. 17-ാം ശ. വരെയുള്ള കുടക്‌ ചരിത്രം അപൂർണവും അവ്യക്തവുമാണ്‌. 9-ാം ശതകത്തിൽ കുടകിന്റെ ചില ഭാഗങ്ങള്‍ "ചങ്ങള്‍വാ' രാജാക്കന്മാരും 11-ാം ശതകത്തിൽ മറ്റു ചില ഭാഗങ്ങള്‍ "കൊങ്കൽവാ' രാജാക്കന്മാരും കൈവശം വച്ചിരുന്നു.
12-ാം ശതകത്തിൽ പടിഞ്ഞാറെ മൈസൂറിൽ അധികാരത്തിൽ വന്ന ഹോയ്‌സാലന്മാരുടെ മേൽക്കോയ്‌മ സമ്മതിച്ചുകൊടുക്കാന്‍ "ചങ്ങള്‍വാ' രാജാക്കന്മാർ വിസമ്മതിക്കയാൽ അവർ തമ്മിൽ പലപ്പോഴും യുദ്ധം ഉണ്ടായി. ഒടുവിൽ ജയിച്ചത്‌ ഹോയ്‌സാലന്മാരാണ്‌. എന്നാൽ 14-ാം ശതകത്തിൽ അവരെ വിജയനഗരസേന കീഴടക്കി. 16-ാം ശതകത്തിന്റെ ഉത്തരാർധത്തിൽ, വിജയനഗര സാമ്രാജ്യത്തിന്റെ ശക്തി അസ്‌തമിച്ചപ്പോള്‍ നായ്‌ക്കന്മാർ അധികാരത്തിൽ വന്നു. 1780-ൽ ഈ പ്രദേശം ഹൈദരാലി കൈവശപ്പെടുത്തി. അതിൽ അസംതൃപ്‌തരായ ജനങ്ങള്‍ കലാപം ഉണ്ടാക്കി. ഹൈദരുടെ പിന്‍ഗാമിയായ ടിപ്പു ജനങ്ങളെ അടിച്ചമർത്താന്‍ ശ്രമിച്ചു. കുടകിലെ ഭരണാധികാരി ഇംഗ്ലീഷുകാരുമായി സഖ്യം ചെയ്‌ത്‌ അവരുടെ സഹായത്തോടെ 1799-ൽ ടിപ്പുവിനെ തോല്‌പിച്ചു. അചിരേണ ഈ പ്രദേശം ബ്രിട്ടീഷ്‌ ആധിപത്യത്തിലായി. സ്വാതന്ത്യ്രലബ്‌ധിക്കുശേഷം നടന്ന സംസ്ഥാന പുനഃസംഘടന (1956)യോടെ ഈ ജില്ല ഇന്നത്തെ കർണാടക സംസ്ഥാനത്തിന്റെ ഭാഗമായി.
ജനങ്ങള്‍ പൊതുവേ നല്ല പൊക്കവും ശരീരദാർഢ്യവുമുള്ളവരാണ്‌. നാല്‌പതോളം ജാതികളും ഗോത്രങ്ങളും കുടകിലുണ്ട്‌. കൊബത്തി, അടിയാ, പലേയാ, പൊലെയാ, മാടിഗ മുതലായ കൂട്ടർ അയിത്തജാതിക്കാരായി ഗണിക്കപ്പെട്ടിരുന്നു. ബ്രിട്ടീഷ്‌ ഭരണത്തിനു മുമ്പ്‌ അടിമത്തം അവിടെ നിലനിന്നിരുന്നു.
കൃഷിഭൂമിയോടു ചേർത്ത്‌ മുളകൊണ്ടു കൂരകെട്ടി വയ്‌ക്കോൽ മേഞ്ഞ പരമ്പരാഗത ഭവനങ്ങളിൽ കലവറയും ജോലിക്കാർക്ക്‌ പാർക്കാന്‍ മുറിയും നാലുവശത്തും മുറ്റവും ഉണ്ടായിരിക്കും. മരിച്ചവരെ കുഴിച്ചിടുന്നതു പൊതുശ്‌മശാനത്തിലാണ്‌. പ്രധാനപ്പെട്ട വ്യക്തികളെ കുഴിച്ചിടുന്ന സ്ഥലത്ത്‌ സ്‌തൂപങ്ങള്‍ കെട്ടാറുണ്ട്‌.
വിശേഷരീതിയിൽ വേഷം ധരിക്കുന്നവരാണ്‌ കുടകർ. പുരുഷന്മാർ ഷർട്ടിനു പുറത്തു നീണ്ട കോട്ടു ധരിക്കുന്നു. അരയിൽ കടുംചുവപ്പോ കടുംനീലയോ നിറത്തിൽ വീതികുറഞ്ഞു നീളം കൂടിയ ഒരു തുണി ചുറ്റുക പതിവാണ്‌. അരയുടെ വലതുവശത്തായി ഒരു കത്തി തിരുകിവയ്‌ക്കുകയും ചെയ്യാറുണ്ട്‌. ഭംഗിയുള്ള ഒരു തലപ്പാവ്‌ വേഷവിധാനത്തിലെ പ്രധാനപ്പെട്ട ഒരു ഇനമാണ്‌. പാവാടയും ജാക്കറ്റുമാണ്‌ സ്‌ത്രീകള്‍ ധരിക്കുന്നത്‌. നല്ല നിറമുള്ള തുണികൊണ്ട്‌ അവർ തല മറച്ചിരിക്കും. വിലപിടിപ്പുള്ള ആഭരണങ്ങള്‍ അണിയുന്നത്‌ ഒരു അന്തസ്സായി ഇവർ കരുതിപ്പോരുന്നു. സ്വർണവും വെള്ളിയും കൊണ്ടുള്ള വളകളും പവിഴവും സ്വർണവും കൊണ്ടുള്ള മാലകളും ഇവർ ധരിക്കുന്നു. മൂക്കുത്തിയും കമ്മലും കൈകാൽവിരലുകളിൽ മോതിരങ്ങളും ഇവരുടെ പ്രധാന ആഭരണങ്ങളാണ്‌.
കുടകന്മാർ കൂട്ടുകുടുംബ സമ്പ്രദായത്തിൽ ജീവിക്കുന്നവരും മക്കത്തായികളുമാണ്‌. ഒരേ ഗോത്രത്തിൽപ്പെട്ടവർക്കു തമ്മിൽ വിവാഹബന്ധം പാടില്ല. കുടുംബങ്ങളിലെ മുതിർന്നവരാണ്‌ വിവാഹം ആലോചിച്ചുറപ്പിക്കുന്നത്‌. വിവാഹദിവസം വരനും പാർട്ടിയും വാദ്യഘോഷത്തോടുകൂടി വധൂഗൃഹത്തിലേക്ക്‌ യാത്രയാകുന്നു. കുതിരപ്പുറത്തായിരിക്കും വരന്റെ യാത്ര. വധൂഗൃഹത്തിനടുത്തെത്തുമ്പോള്‍ അയാള്‍ കുതിരപ്പുറത്തു നിന്നിറങ്ങി തന്റെ കത്തികൊണ്ട്‌ ഒരു വാഴ ഒറ്റവെട്ടിനു രണ്ടായി മുറിക്കണമെന്നു വ്യവസ്ഥയുണ്ട്‌. അതു കഴിഞ്ഞാൽ വധുവിന്റെ ബന്ധുമിത്രാദികള്‍ ഇറങ്ങിവന്ന്‌ എതിരേറ്റ്‌ വരനെയും സംഘത്തെയും അകത്തേക്കു കൂട്ടിക്കൊണ്ടു പോകുന്നു. വരന്റെ ബന്ധുക്കള്‍ വധുവിനെ ധാന്യം ചൊരിഞ്ഞ്‌ ആശീർവദിക്കുന്നു. മുന്‍കാലങ്ങളിൽ "പുടകൊട' വിവാഹവും നിലവിലുണ്ടായിരുന്നു. ബഹുഭാര്യാത്വം കുടകരുടെ ഇടയിൽ ചുരുക്കമായുണ്ടെങ്കിലും ബഹുഭർത്തൃത്വം ഇല്ലെന്നു തന്നെ പറയാം.
കൃഷിയാണ്‌ കുടകരുടെ മുഖ്യതൊഴിൽ. ഇവിടെ ഏറ്റവും കൂടുതൽ കൃഷി ചെയ്യപ്പെടുന്നത്‌ കാപ്പിയാണ്‌. നെൽക്കൃഷിയും പ്രധാനമാണ്‌. ഏപ്രിൽ-മേയ് മാസങ്ങളിൽ നിലം ഉഴുതുതുടങ്ങുന്നു. ഒരു നല്ല ദിവസം നിശ്ചയിച്ച്‌ സൂര്യന്‍ ഉദിക്കുന്നതിനുമുമ്പ്‌ ഒരു വിളക്കു കൊളുത്തിവച്ച്‌ കുടുംബാംഗങ്ങള്‍ അതിനുചുറ്റുംകൂടി, പൂർവികന്മാരുടെയും കാവേരിയമ്മയുടെയും അനുഗ്രഹത്തിനുവേണ്ടി പ്രാർഥിക്കുന്നു. അതിനുശേഷം ചെറുപ്പക്കാർ ഒരു ജോഡി കാളകളെ മുതിർന്നവരുടെ അനുവാദത്തോടുകൂടി വയലിലിറക്കുന്നു. ജൂലായ്‌-ആഗസ്റ്റ്‌ മാസങ്ങളിൽ ഞാറു പറിച്ചുനടുന്നു. പുഷ്‌ടിപ്പെടുന്ന നെൽച്ചെടികള്‍ക്കു "ദൃഷ്‌ടിദോഷം' ഉണ്ടാകാതിരിക്കാന്‍ രണ്ട്‌ മീ. നീളത്തിൽ മുളകള്‍ പകുതി വേവിച്ച്‌ വയലിൽ വരിവരിയായി നാട്ടി നിർത്താറുണ്ട്‌. നവംബർ-ഡിസംബർ മാസങ്ങളിൽ കൊയ്‌ത്ത്‌ ആഘോഷപൂർവം നടത്തുന്നു. നെല്ലു കഴിഞ്ഞാൽ കൃഷി ചെയ്യപ്പെടുന്ന അടുത്ത പ്രധാന ധാന്യം കൂവരകാണ്‌. ഏലം, വാഴ, ഓറഞ്ച്‌, കൈതച്ചക്ക എന്നിവയും ധാരാളമായി കൃഷി ചെയ്യപ്പെടുന്നു.
തേനും മെഴുകും സംഭരിക്കുന്നതിലും പക്ഷികളെയും മൃഗങ്ങളെയും വേട്ടയാടിപ്പിടിക്കുന്നതിലും കൗതുകമുള്ളവരാണ്‌ കുടകർ. വേട്ടയാടൽ ഇവർക്ക്‌ ഒരു വിനോദവും മാംസാഹാര സമ്പാദനത്തിനുള്ള ഒരു ഉപായവുമാണ്‌.
പിതൃക്കളെയും ഭൂതങ്ങളെയും ആരാധിക്കുന്നതിൽ കുടകർ ഏറെ നിഷ്‌കർഷയുള്ളവരാണ്‌. ഓരോ കുടുംബത്തിലും ഒരു മരച്ചുവട്ടിൽ കല്ലിൽ കൊത്തിയ മനുഷ്യരൂപങ്ങള്‍ പ്രതിഷ്‌ഠിച്ചിട്ടുള്ള ഒരു കൊച്ചുപുരയുണ്ടായിരിക്കും. "കൈമാറ്റ' എന്നാണതിന്റെ പേര്‌. ശിലാവിഗ്രഹങ്ങള്‍ പിതൃക്കളുടെ പ്രതിരൂപങ്ങളാണെന്നാണ്‌ സങ്കല്‌പം. കോഴിയെയും പന്നിയെയും അറുത്ത്‌ അവയ്‌ക്കു ബലി കൊടുക്കുന്നു.
ചാമുണ്ഡി, കല്ലുഗുട്ടി, പഞ്ചൂർലി, ഗുളികന്‍, ഗോരകന്‍ എന്നീ ഭൂതങ്ങള്‍ക്കുവേണ്ടിയും പൂജകള്‍ നടത്താറുണ്ട്‌. പൂജാക്രമം പിതൃപൂജയിലേതുപോലെതന്നെയാണ്‌. മാരിയമ്മ, ദുർഗ, ഭദ്രകാളി മുതലായ ഗ്രാമദേവതകളെ പ്രീണിപ്പിക്കുന്നതിന്‌ ഒരു കാലത്ത്‌ നരബലിയും നടത്തിയിരുന്നു. ഈ ദേവതകള്‍ക്കുവേണ്ടി വാർഷികപൂജ ഇപ്പോഴും നടത്താറുണ്ട്‌. നാഗാരാധകന്മാർ കൂടിയായ കുടകർക്ക്‌ സർപ്പക്കാവുകള്‍ പുണ്യസ്ഥലങ്ങളാണ്‌. നവംബർ മാസത്തിൽ കാവുകളിൽ വിളക്കു കൊളുത്താറുണ്ട്‌. കുഞ്ഞുങ്ങളെ ഉപദ്രവിക്കുന്ന ഒരു കൂട്ടം ചുടലഭൂതങ്ങളെ തൃപ്‌തിപ്പെടുത്താന്‍ നെല്ല്‌, പാല്‌ മുതലായ വസ്‌തുക്കള്‍ അർപ്പിക്കുന്ന പതിവും ഉണ്ട്‌.
സാമൂഹികമായ പല അധികാരങ്ങളുമുള്ള ഒരു കാരണവസഭ കുടകിൽ പ്രവർത്തിച്ചിരുന്നു. "താക്കാമുഖ്യസ്ഥം' എന്നാണ്‌ അതിന്റെ പേര്‌. ധർമകാര്യങ്ങളിൽ വീഴ്‌ച വരുത്തുന്നവരെയും പൊതുകാര്യങ്ങളിൽ പങ്കെടുക്കാത്തവരെയും കുറ്റകൃത്യങ്ങള്‍ ചെയ്യുന്നവരെയും ഈ സഭ ശിക്ഷിക്കും. കുറ്റക്കാരന്‍ ഗ്രാമത്തലവന്മാരുടെ മുമ്പാകെ സമാധാനം ബോധിപ്പിക്കണമെന്നാണു നിയമം. ഈ തലവന്മാരിൽ മുഖ്യന്‍ ആണ്‌ ശിക്ഷ വിധിക്കുന്നത്‌. ശിക്ഷയ്‌ക്കു വഴങ്ങാത്ത ആളിനു സമുദായം ഭ്രഷ്‌ട്‌ കല്‌പിക്കും. എന്നാൽ ഇന്ന്‌ ഇത്തരം സഭകള്‍ക്ക്‌ പ്രസക്തിയില്ലാതായിട്ടുണ്ട്‌.
ഏറെ വിനോദസഞ്ചാര പ്രാധാന്യമുള്ള പ്രദേശമാണ്‌ കുടക്‌. കാവേരി നദിയുടെ ഉദ്‌ഭവസ്ഥാനമായ തലക്കാവേരി, ഇരുപ്പു ജലപാതം, ബൈലാകുപ്പെയിലെ ബുദ്ധവിഹാരം, ബ്രഹ്മഗിരി വന്യജീവിസങ്കേതം തുടങ്ങിയവ ഇവിടത്തെ പ്രധാന വിനോദസഞ്ചാര ആകർഷണങ്ങളാണ്‌.
കുടകുഭാഷ. ദ്രാവിഡഗോത്രത്തിൽപ്പെട്ടതാണ്‌ കുടകുഭാഷ. ഇത്‌ കർണാടക സംസ്ഥാനത്തിൽ ഉള്‍പ്പെട്ട കുടകുജില്ലയിലെ ജനങ്ങളുടെ വ്യവഹാരഭാഷയാണ്‌. മലയാളം, കന്നഡ, തുളു എന്നീ ഭാഷകളാൽ ചുറ്റപ്പെട്ട ഒരു പ്രദേശമാണ്‌ ഈ ഭാഷാക്ഷേത്രം. അതുകൊണ്ട്‌ ഈ മൂന്നു ഭാഷകളുടെയും സ്വാധീനത കുടകുഭാഷയിൽ വ്യക്തമായിക്കാണാം. കാൽഡ്വൽ ഇതിനെ കന്നഡത്തിന്റെ ഉപഭാഷയായിട്ടാണ്‌ ഗണിച്ചിട്ടുള്ളത്‌. ഇത്‌ കന്നഡത്തോടു വളരെ ബന്ധപ്പെട്ട ഭാഷയാണെന്നാണ്‌ ഭാഷാശാസ്‌ത്രജ്ഞന്മാർ പൊതുവേ അഭിപ്രായപ്പെടുന്നത്‌. സ്വന്തമായ ലിപിയില്ലാത്ത ഈ ഭാഷ മലയാള-കന്നഡ ലിപികളിൽ എഴുതപ്പെടുന്നു. ധ്വനിവ്യവസ്ഥ, പദനിഷ്‌പത്തി, വാക്യരചന മുതലായ വ്യാകരണാംശങ്ങളിൽ ഇത്‌ ദക്ഷിണ ദ്രാവിഡ ഭാഷാസമൂഹവുമായി ബന്ധപ്പെട്ടിരിക്കുന്നു. കുടകുഭാഷയ്‌ക്ക്‌ ആദ്യമായി ഒരു വ്യാകരണം രചിച്ചത്‌ "കോള്‍' എന്ന പാശ്ചാത്യപണ്ഡിതനാണ്‌.
കുടകുഭാഷയിൽ തമിഴ്‌, മലയാളം എന്നിവയിലെന്നപോലെ വ്യഞ്‌ജനാന്ത പദങ്ങളാണധികവും. കന്നഡ ഭാഷയിൽ മൂലദ്രാവിഡഭാഷയിലെ "ക'കാരം "ച'കാരമായും "പ'കാരം "ഹ'കാരമായും "ച'കാരം "സ'കാരമായും പരിണമിക്കുന്നു. ഈ പരിണാമം കുടകു ഭാഷയിലില്ല. വർണമാല: സ്വരങ്ങള്‍: അ, ആ, ഇ, ഈ, ഉ, ഊ, എ, ഏ, ഒ, ഓ (അനുനാസിക ധ്വനിയും ഇവിടെ സാർഥകമാണ്‌). വ്യഞ്‌ജനങ്ങള്‍: ക, ഗ,ങ; ച, ജ, ഞ; ട, ഡ, ണ; ത, ദ, ന; പ, ബ, മ; യ, ര, ല, വ, സ, ള. കുടകുഭാഷയിലെ ലിംഗം, വചനം, വിഭക്തിപ്രത്യയങ്ങള്‍, നാമം, സർവനാമം, സംഖ്യാവാചകശബ്‌ദം, ഗണവാചകം, ക്രിയാപദം, ക്രിയാവിശേഷണം മുതലായവയെ സംബന്ധിക്കുന്ന കാര്യങ്ങള്‍ തമിഴ്‌, മലയാളം, കന്നഡ എന്നീ ഭാഷയിലെ നിയമങ്ങളെ ആശ്രയിക്കുന്നു. കുടകുഭാഷയിലെ അനേകം പദങ്ങള്‍ മലയാളപദങ്ങളുമായി അടുത്ത ബന്ധമുള്ളതാണ്‌. ഉദാ:
മലയാളം കുടകു ഭാഷ പാല്‌ പാൽ പന്നി പന്‌ദി ഞാന്‍ നാന്‍ നാം നംഗാ നാംഗ നീ നീന്‍ അത്‌ അദ്‌ ഒന്ന്‌ ഒര്‌ രണ്ട്‌ ദണ്ഡ്‌ മൂന്ന്‌ മൂണ്ഡ്‌
(എന്‍.കെ. ദാമോദരന്‍; സ.പ.)
