This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
എമെറ്റിന്‍
സര്‍വ്വവിജ്ഞാനകോശം സംരംഭത്തില്‍ നിന്ന്
എമെറ്റിന്‍
Emetine
ഇപ്പിക്കാ (Ipeca cuanha) എന്ന ചെടിയിൽ അടങ്ങിയിട്ടുള്ള ഒരു ആൽക്കലോയ്‌ഡ്‌. തന്മാത്രാഫോർമുല: C29H40O4N2 വെളുത്തപൊടി. ദ്ര.അ. 74ºC. പ്രകാശം തട്ടിയാൽ കറുക്കും. ജലത്തിൽ അല്‌പലേയം. ആൽക്കഹോള്‍, ഈഥർ എന്നിവയിൽ നല്ലതുപോലെ അലിയും. ഉഷ്‌ണമേഖലീയ (tropical) ഔഷധങ്ങളുടെ പിതാവ്‌ എന്നു വിഖ്യാതനായ പിസൊ ആണ്‌ 1647-ൽ ഇപ്പിക്കാച്ചെടിയുടെ തൊലി അതിസാരചികിത്സയ്‌ക്ക്‌ ആദ്യമായി ഉപയോഗിച്ചത്‌. 1817-ൽ ഈ ചെടിയിൽനിന്ന്‌ എമെറ്റിന്‍ വേർതിരിച്ചെടുക്കപ്പെട്ടു. കൊൽക്കത്തയിൽവച്ച്‌ റോജേഴ്‌സ്‌ എന്ന ഡോക്‌ടറാണ്‌ 1912-ൽ ഈ പദാർഥത്തെ അമീബിക്‌ അതിസാരത്തിനു പ്രതിവിധിയായി ആദ്യം പ്രയോഗിച്ചത്‌. തീക്ഷ്‌ണമായ അതിസാരത്തിനും അമീബിക്‌ വിദ്രധികള്‍ക്കും (amoebic abcess)ഇത്‌ ഔഷധമാണ്‌. അധസ്‌ത്വചീയമായും (subcutaneous) അന്തഃപേശീയമായും (intra muscular) ആണു സാമാന്യമായി ഇത്‌ (എമെറ്റിന്‍ ഹൈഡ്രാക്ലോറൈഡ്‌ രൂപത്തിൽ) നല്‌കപ്പെടുന്നത്‌. നല്ല കയ്‌പുള്ളതുകൊണ്ടും വമനകാരിയായതുകൊണ്ടും വായിൽക്കൂടി (orally)) നല്‌കുന്നത്‌ എമെറ്റിന്‍ ബിസ്‌മഥ്‌ അയഡൈഡ്‌ കാപ്‌സ്യൂളുകളായിട്ടാണ്‌.
കഫനിഷ്‌കാസനം (expectorant)ആേയും അതിസ്വേദകം (diaphoretic)ആയും പ്രവർത്തിക്കുന്ന വിധത്തിലുള്ള എമെറ്റിന്‍ ഔഷധയോഗങ്ങളും നിർമിക്കപ്പെട്ടിട്ടുണ്ട്‌. തേള്‍ കുത്തിയസ്ഥാനത്ത്‌ എമെറ്റിന്‍ കടത്തിവിടുന്നത്‌ ഫലപ്രദമായ ഒരു പ്രതിവിധിയാണ്‌. അധികം എമെറ്റിന്‍ നല്‌കിയാൽ മാംസപേശികള്‍ക്കുവേദന, വയറ്റിളക്കം, ഛർദി മുതലായവയുണ്ടാകും; ഹൃദയത്തിനും ദോഷകരമാണ്‌. എമെറ്റിന്‍ അധികം നല്‌കുന്നതുനിമിത്തമുണ്ടാകുന്ന ദോഷങ്ങള്‍ക്ക്‌ എമെറ്റിസം എന്നു പറഞ്ഞുവരുന്നു. എമെറ്റിന്‍ വന്‍തോതിൽ ഉത്‌പാദിപ്പിക്കപ്പെടുന്നത്‌ ഇപ്പിക്കാച്ചെടിയുടെ വേരിൽനിന്നാണ്‌. ഡിഹൈഡ്രാ എമെറ്റിന്‍ രൂപത്തിൽ ധാരാളമായി സംശ്ലേഷിക്കപ്പെടുന്നുമുണ്ട്‌. ഈ സംശ്ലിഷ്‌ടരൂപത്തിനു പ്രകൃതിയിൽനിന്നു ലഭിക്കുന്ന എമെറ്റിനെക്കാള്‍ ചികിത്സാരംഗത്തു കൂടുതൽ പ്രചാരമുണ്ട്‌. നോ. ആൽക്കലോയ്‌ഡുകള്‍
