This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ആസ്‌തികദർശനങ്ങള്‍
സര്‍വ്വവിജ്ഞാനകോശം സംരംഭത്തില്‍ നിന്ന്
ആസ്‌തികദർശനങ്ങള്‍
വേദത്തിന്റെ അപ്രമാദിത്വത്തെയും പരമപ്രാമാണ്യത്തെയും അംഗീകരിക്കുന്ന ഭാരതീയദർശനങ്ങള്‍. വേദപ്രമാണങ്ങളുടെ സാധുതയെ ചോദ്യംചെയ്യുന്നവ നാസ്‌തികങ്ങ(Heterodox)ളാണ്‌ (പ്രമാണ്യബുദ്ധിർവേദേഷു; നാസ്‌തികോ വേദ നിന്ദകഃ എന്നു മനുസ്‌മൃതി). ഈ വ്യാഖ്യാനമനുസരിച്ച്‌ സാംഖ്യം, യോഗം, ന്യായം, വൈശേഷികം, പൂർവമീമാംസ, ഉത്തരമീമാംസ (വേദാന്തം) എന്നീ ആറ്‌ ദർശനങ്ങള്‍ ആസ്‌തികങ്ങള്‍ അഥവാ വൈദികങ്ങളും ജൈനം, ബൗദ്ധം, ചാർവാകം എന്നിവ നാസ്‌തികങ്ങള്‍ അഥവാ അവൈദികങ്ങളും ആണ്‌.
ഈശ്വരന്‍, പരലോകം (സ്വർഗനരകങ്ങള്‍), ആങ്ങാവ്‌ മുതലായവ ഉണ്ടെന്നു വിശ്വസിക്കുന്നവർ ആസ്‌തികന്മാരും ഈശ്വരാദികളുടെ അസ്‌തിത്വത്തില്‍ വിശ്വസിക്കാത്തവർ നാസ്‌തികന്മാരും ആണെന്ന്‌ ഒരു പക്ഷമുണ്ട്‌. ദർശനങ്ങളെ ആസ്‌തികങ്ങളെന്നും നാസ്‌തികങ്ങളെന്നും തരംതിരിച്ചിട്ടുള്ളത്‌ ഈശ്വരവിശ്വാസത്തെ ആധാരമാക്കിയല്ല. സാംഖ്യം, വൈശേഷികം, മീമാംസ എന്നീ ദർശനങ്ങള്‍ ഈശ്വരനെക്കുറിച്ചു പ്രതിപാദിക്കുന്നില്ലെങ്കിലും ഇവ ആസ്‌തികദർശനങ്ങളായിട്ടാണ്‌ കരുതപ്പെടുന്നത്‌. ആസ്‌തികദർശനങ്ങളുടെ അടിസ്ഥാനം ഈശ്വരവിശ്വാസം മാത്രമാണെങ്കില്‍ ഭാരതീയദർശനങ്ങളില്‍ ചിലവ ഈ ഗണത്തില്‍ പെടുകയില്ല. അതുകൊണ്ട്‌ ഈശ്വരനില്‍ വിശ്വസിക്കുന്നു എന്നതുകൊണ്ടല്ല, വേദപ്രാമാണ്യത്തെ അംഗീകരിക്കുന്നതു എന്നതുകൊണ്ടാണ്‌ മേല്‍ച്ചൊന്ന ദർശനങ്ങള്‍ ആസ്‌തികങ്ങളായി പരിഗണിക്കപ്പെടുന്നത്‌. കപിലോപജ്ഞമായ സാംഖ്യദർശനം ഈശ്വരനെ അംഗീകരിക്കുന്നില്ല. (നോ: ഭാരതീയദർശനം)
