This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
എമ്മാ-ഹു
സര്‍വ്വവിജ്ഞാനകോശം സംരംഭത്തില്‍ നിന്ന്
എമ്മാ-ഹു
Emma-O
ജാപ്പനീസ്‌ പുരാണങ്ങളിൽ പരാമൃഷ്‌ടനായ നരകാധിപതി, ഭാരതീയ സങ്കല്‌പമനുസരിച്ചുള്ള മൃത്യുദേവനായ യമനുമായി എമ്മാ-ഹുവിനെ സാദൃശ്യപ്പെടുത്താം. പുരുഷന്മാരെ ശിക്ഷിക്കാനുള്ള ചുമതല എമ്മാ-ഹുവിനും സ്‌ത്രീകളുടേത്‌ ഇദ്ദേഹത്തിന്റെ സഹോദരിക്കുമാണ്‌. അഗ്നികൊണ്ടു നിറഞ്ഞിരിക്കുന്ന എട്ട്‌ ദിക്കുകളിലൊന്നിലേക്കോ മഞ്ഞുനിറഞ്ഞ എട്ടുദിക്കുകളിലൊന്നിലേക്കോ പാപം ചെയ്‌തവരെ അയയ്‌ക്കുക എന്നതാണു ശിക്ഷ. മരണശേഷം പാപിയുടെ ആത്മാവ്‌ നരകത്തിൽ പ്രവേശിച്ചാലുടന്‍ അവിടെയുള്ള കണ്ണാടിയിൽ അയാളുടെ പാപങ്ങള്‍ പ്രതിഫലിക്കുമെന്നും പാപങ്ങളുടെ തോതനുസരിച്ച്‌ അയാളെ ഏതു നരകത്തിലേക്ക്‌ അയയ്‌ക്കണമെന്ന്‌ എമ്മാ-ഹു വിധിക്കുമെന്നും വിശ്വസിക്കപ്പെടുന്നു. എന്നാൽ ഭൂമിയിൽ ജീവിച്ചിരിക്കുന്നവരുടെ പ്രാർഥനകൊണ്ട്‌ ഇവർക്ക്‌ ശിക്ഷയിൽ നിന്നു മോചനം ലഭിക്കുവാന്‍ സാധ്യമാണെന്നും ജപ്പാന്‍കാർ വിശ്വസിച്ചുവരുന്നു. ഇങ്ങനെ പ്രാർഥനകൊണ്ടു രക്ഷിക്കപ്പെടുന്നവർ ഭൂമിയിലോ സ്വർഗത്തിലോ വീണ്ടും ജനിക്കുന്നുവെന്നാണ്‌ സങ്കല്‌പം. ചൈനീസ്‌ ന്യായാധിപന്റെ തൊപ്പിയണിഞ്ഞു ദണ്ഡുമേന്തി ക്രൂരമായ ഭാവത്തോടെയാണ്‌ എമ്മാ-ഹു സാധാരണ ചിത്രീകരിക്കപ്പെട്ടിട്ടുള്ളത്‌.
