This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കാളീചരണ്‍ ബാനർജി (1847 - 1907)
സര്‍വ്വവിജ്ഞാനകോശം സംരംഭത്തില്‍ നിന്ന്
കാളീചരണ്‍ ബാനർജി (1847 - 1907)
ബംഗാളിലെ ഒരു രാഷ്‌ട്രീയനേതാവ്‌. 1847 ഫെ. 9-നു ബംഗാളിലെ ഒരു ബ്രാഹ്മണകുടുംബത്തിൽ ജനിച്ചു. ഇദ്ദേഹത്തിന്റെ പിതാവ്‌ അന്തരിച്ചതിനെത്തുടർന്ന്‌ കുട്ടിക്കാലത്തുതന്നെ കുടുംബഭാരം ഏറ്റെടുക്കേണ്ടിവന്ന ബാനർജിക്ക്‌ വിദ്യാഭ്യാസം നടത്താന്‍ നന്നേ ക്ലേശിക്കേണ്ടിവന്നു. കൽക്കത്തയിലെ ഓറിയെന്റൽ സെമിനാരിയിൽ വിദ്യാഭ്യാസം നടത്തിയ കാലത്ത്‌ ഇദ്ദേഹം ക്രിസ്‌തുമതതത്ത്വങ്ങളിൽ ആകൃഷ്‌ടനായി. പതിനേഴാം വയസ്സിൽ ബിരുദം നേടിയ ബാനർജി ഫ്രീ ചർച്ച്‌ കോളജിൽ അധ്യാപകനായി നിയമിക്കപ്പെട്ടു. പിന്നീട്‌ തത്ത്വശാസ്‌ത്രത്തിൽ എം.എ. ബിരുദവും നിയമബിരുദവും നേടി. കുടുംബാംഗങ്ങളുടെ എതിർപ്പിനെയും പീഡനത്തെയും അതിജീവിച്ചുകൊണ്ട്‌ ഇദ്ദേഹം ക്രിസ്‌തുമതം സ്വീകരിച്ചു. ഇദ്ദേഹത്തിന്റെ ഭാര്യയും സ്വമേധയാ ക്രിസ്‌തുമതവിശ്വാസിനിയായി. 1879-ൽ അധ്യാപകവൃത്തിയിൽനിന്നു വിരമിച്ച ബാനർജി അഭിഭാഷകവൃത്തിയിലും അതോടൊപ്പം ക്രിസ്‌തുമതപ്രചാരണത്തിലും ഏർപ്പെട്ടു. കൽക്കത്ത വൈ.എം.സി.എ.യുടെ ആരംഭം മുതൽ ബാനർജി അതിൽ സജീവമായി പ്രവർത്തിച്ചിരുന്നു; കുറച്ചുകാലം അതിന്റെ പ്രസിഡന്റുമായിരുന്നു. 1897-ൽ ബംഗാള്‍ നിയമസഭാംഗമായിത്തീർന്ന ബാനർജി ഇന്ത്യന്‍ നാഷണൽ കോണ്‍ഗ്രസ്സിന്റെ താത്ത്വികരിൽ ഒരാളായിരുന്നു. കോണ്‍ഗ്രസ്സിന്റെ ഭരണഘടന, ചട്ടങ്ങള്‍ എന്നിവ എഴുതിയുണ്ടാക്കുന്നതിന്‌ 1889-ൽ നിയമിച്ച സമിതിയിലെ പ്രധാനാംഗമായിരുന്നു ഇദ്ദേഹം. 1907 ഫെ. 6-നു ഇദ്ദേഹം നിര്യാതനായി.
