This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കാണേ, പാണ്ഡുരംഗ്‌ വാമന്‍ (1880 - 1972)
സര്‍വ്വവിജ്ഞാനകോശം സംരംഭത്തില്‍ നിന്ന്
കാണേ, പാണ്ഡുരംഗ്‌ വാമന്‍ (1880 - 1972)
സംസ്‌കൃതപണ്ഡിതനും ഗ്രന്ഥകാരനും. മഹാരാഷ്‌ട്ര സംസ്ഥാനത്തിൽ രത്‌നഗിരിജില്ലയിലെ ഡാവോളിയിൽ ഒരിടത്തരം ബ്രാഹ്മണകുടുംബത്തിൽ വക്കീൽ വാമന്‍ശങ്കറുടെ പുത്രനായി 1880 മേയ്‌ 7-നു കാണേ ജനിച്ചു. ഹൈസ്‌കൂളിൽ പഠിച്ചുകൊണ്ടിരിക്കുമ്പോള്‍ ത്തന്നെ, 16-ാമത്തെ വയസ്സിൽ, ഇദ്ദേഹം സുഭദ്രാദേവിയെ വിവാഹം ചെയ്‌തു. ബി.എ., എം.എ., എൽ.എൽ.എം. എന്നീ പരീക്ഷകളിൽ പ്രശസ്‌ത വിജയം കൈവരിച്ചു. അലഹാബാദ്‌ സർവകലാശാലയിൽ നിന്ന് 1942-ൽ ഡി.ലിറ്റ്‌., മഹാ മഹോപാധ്യായ എന്നീ ബഹുമതി ബിരുദങ്ങള്‍ ഇദ്ദേഹത്തിനു ലഭിക്കുകയുണ്ടായി. 1904 മുതൽ 11 വരെ രത്‌നഗിരിയിലും ബോംബെയിലുമുള്ള പല ഗവണ്‍മെന്റ്‌ ഹൈസ്‌കൂളുകളിലും അധ്യാപകവൃത്തിയിലേർപ്പെട്ടിരുന്നു. 1911-ൽ ബോംബെ ഹൈക്കോടതിയിൽ അഭിഭാഷകവൃത്തി സ്വീകരിച്ചു. ഗവണ്‍മെന്റ്‌ ലാ കോളജിലെ നിയമ പ്രാഫസറായി 1917 മുതൽ 23 വരെ സേവനമനുഷ്‌ഠിച്ചു. 1947 മുതൽ 49 വരെ ബോംബെ സർവകലാശാലയുടെ വൈസ്‌ചാന്‍സലറും 1953 മുതൽ 59 വരെ രാജ്യസഭയിലെ നോമിനേറ്റഡ്‌ മെംബറുമായിരുന്നു. 59-ൽ "നാഷണൽ പ്രാഫസർ ഒഫ്‌ ഇന്‍ഡോളജി'യായി കാണേ നിയമിക്കപ്പെട്ടു. 1960-ൽ പൂണേ സർവകലാശാല ഡി.ലിറ്റ്‌ ബിരുദം നല്‌കി ഇദ്ദേഹത്തെ ആദരിച്ചു. അന്തർദേശീയ പൗരസ്‌ത്യ വിജ്ഞാന സമിതി (International Oriental Conference) യുടെ പല സമ്മേളനങ്ങളിലും കാണേ ഇന്ത്യയുടെ പ്രതിനിധിയായി പങ്കെടുത്തിട്ടുണ്ട്‌. കാദംബരി (1911), ഉത്തരരാമചരിതം (1913), ഹർഷചരിതം (1918, 1921), വ്യവഹാരമയൂഖ (1926) തുടങ്ങിയ അനേകം സംസ്‌കൃത ക്ലാസിക്കുകള്‍ അർഥവിവരണത്തോടുകൂടി കാണേ പ്രകാശനം ചെയ്‌തു. 1944-ൽ ഹിന്ദു കസ്റ്റംസ്‌ ആന്‍ഡ്‌ മോഡേണ്‍ ലാ എന്ന ഗ്രന്ഥവും (മൂന്നു ഭാഗങ്ങളിൽ) 1951-ൽ ഹിസ്റ്ററി ഒഫ്‌ സാന്‍സ്‌ക്രിറ്റ്‌ പൊയറ്റിക്‌സ്‌ എന്ന ഗ്രന്ഥവും പ്രസിദ്ധീകരിച്ചു. ഇദ്ദേഹത്തിന്റെ ചിരസ്‌മരണീയമായ കൃതി നാലു വാല്യങ്ങളിലുള്ള ധർമശാസ്‌ത്രചരിതം (1950-53) എന്ന സംസ്‌കൃത ഗ്രന്ഥമാണ്‌. ഇതിന്‌ 1956-ൽ സംസ്‌കൃതത്തിനുള്ള സാഹിത്യ അക്കാദമി അവാർഡ്‌ ലഭിച്ചു. 1963-ൽ രാഷ്‌ട്രപതി, "ഭാരതരത്‌നം' ബഹുമതി നല്‌കി ഇദ്ദേഹത്തെ ബഹുമാനിച്ചു. സംസ്‌കൃതത്തിലെ സാഹിത്യ മീമാംസാഗ്രന്ഥങ്ങള്‍ക്ക്‌ ഇദ്ദേഹം ചെയ്‌തിട്ടുള്ള കാലനിർണയം പ്രാമാണികമായി ഗണിക്കപ്പെടുന്നു. 1972 ഏ. 18-നു കാണേ നിര്യാതനായി.
(ഡോ. പ്രഭാകർ മാച്വേ; സ.പ.)
