This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കുരക്കേണിക്കൊല്ലം
സര്‍വ്വവിജ്ഞാനകോശം സംരംഭത്തില്‍ നിന്ന്
കുരക്കേണിക്കൊല്ലം
കൊല്ലം പട്ടണത്തിന്റെ പഴയപേര്‌. മലബാറിലും തിരുവിതാംകൂറിലും കൊല്ലമുണ്ടായിരുന്നതുകൊണ്ട്‌ അവയെ വേർതിരിച്ചറിയാന്‍ മുന്‍ തിരുവിതാംകൂറിലെ കൊല്ലത്തെ കുരക്കേണിക്കൊല്ലമെന്നും മലബാറിലെ കൊല്ലത്തെ പന്തലായിനിക്കൊല്ലമെന്നും പറഞ്ഞുവന്നു. കൊല്ലം എന്ന പദത്തിന്‌ തുളുവിൽ നഗരമെന്നാണ്‌ അർഥം. കുരക്കേണിപദം വളഞ്ഞ ജലാശയത്തെ സൂചിപ്പിക്കുന്നു. വളഞ്ഞ ജലാശയത്തിന്റെ തീരം എന്നാവാം ഈ പേരിന്റെ അർഥം. 150 വർഷം മുമ്പുവരെ ഈ പേര്‌ നിലനിന്നിരുന്നതായി ശാസനങ്ങളിൽ സൂചനയുണ്ട്‌. കൊല്ലവർഷം 24-ലെ തരിസാപ്പള്ളി ശാസനത്തിലാണ്‌ ഈ പേര്‌ ആദ്യം പരാമർശിച്ചുകാണുന്നത്‌. കൊല്ലത്തെ രാമേശ്വരം ശാസനത്തിൽ "കോയിലധികാരികളായിന രാമർതിരുവടി ശ്രീകുലശേഖര ചക്രവർത്തികള്‍ കുരക്കേണിക്കൊല്ലത്തു പനൈങ്കാവിൽ കോവിലകത്തിരുന്നരുള' എന്നിങ്ങനെ പറഞ്ഞുകാണുന്നു. ഈ രേഖ കൊല്ലം 278-ലേതാണ്‌. ആദ്യമായി കൊല്ലവർഷം രേഖപ്പെടുത്തിയ മാമ്പള്ളിപ്പട്ടയത്തിൽ (കൊല്ലം-149) കൊല്ലമെന്നു മാത്രമേ പറയുന്നുള്ളൂ.
കുരക്കേണിക്കൊല്ലത്തെപ്പറ്റി പ്രസ്‌താവിക്കുന്ന ആദ്യരേഖ തരിസാപ്പള്ളി ശാസനമാണ്‌. സ്ഥാണുരവിയുടെ അഞ്ചാം ഭരണവർഷത്തിൽ (എ.ഡി. 849) വേണാട്ടരചനായ അയ്യനടികള്‍ തിരുവടികള്‍ ഈഴവരും ഈഴക്കൈയരും മണ്ണാനും ഉള്‍പ്പെടുന്ന ഏതാനും കുടുംബങ്ങളെ അവർക്കുള്ള "ഇറകള്‍' ഇളവുചെയ്‌ത്‌ അവർ താമസിക്കുന്ന സ്ഥലത്തോടുകൂടി കുരക്കേണിക്കൊല്ലത്തു "എശോദാതപിരായി' പണികഴിപ്പിച്ച തരിസാപ്പള്ളിക്കു ദാനം ചെയ്‌തതിനെപ്പറ്റിയും ഇളവുചെയ്‌ത നികുതികളെപ്പറ്റിയും ഉള്ള വിവരങ്ങളാണ്‌ ഈ ചെപ്പേടുകളുടെ ഉള്ളടക്കം. പ്രസ്‌തുത ക്രസ്‌തവ ദേവാലയമായിരിക്കാം കൊല്ലം നഗരത്തിൽ ആദ്യമുണ്ടായ ക്രസ്‌തവ സ്ഥാപനം. ചക്രവർത്തിയും കോയിലധികാരിയും നാടുവാഴിയും അഞ്ചുവർണവും മണിഗ്രാമും അറുന്നൂറ്റുവരും എശോദാതപിരായിയെപ്പോലുള്ള മതമേധാവികളും നഗരപുരോഗതിക്കുവേണ്ടി കഠിനാധ്വാനം ചെയ്യുന്ന കാഴ്‌ചയാണ്‌ എ.ഡി. 9-ാം ശതകത്തിൽ കാണുന്നത്‌.
(വി.ആർ.പരമേശ്വരന്‍ പിള്ള)
