This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ആൽക്കലിപ്പാറ
സര്‍വ്വവിജ്ഞാനകോശം സംരംഭത്തില്‍ നിന്ന്
ആൽക്കലിപ്പാറ
ആഗ്നേയശിലകളിലെ ഒരു വിഭാഗം. കാൽസികം (calcic), ആൽക്കലീയം (alkaline) എന്നിങ്ങനെ രാസഘടനയെ ആസ്‌പദമാക്കി ആഗ്നേയശിലകളെ രണ്ടായി വിഭജിക്കാവുന്നതാണ്‌. പ്രസക്തശിലയുടെ ഘടകങ്ങളായി അലൂമിനയുടെയോ സിലിക്കയുടെയോ അംശത്തെക്കാള്‍ കൂടുതലായി പൊട്ടാസ്യം, സോഡിയം എന്നിവയുടെ ഓക്‌സൈഡുകളാണുള്ളതെങ്കിൽ, അത്‌ ആൽക്കലിപ്പാറകളിൽപ്പെടുന്നു. ഈ ഓക്‌സൈഡുകളുടെ വർധിച്ച അളവ്‌ അവ ഉള്‍ക്കൊള്ളുന്ന മൂലകങ്ങളുടെ അംശം കൂടുതലായുള്ള പ്രത്യേക ധാതുക്കള്‍ രൂപംപ്രാപിക്കുന്നതിന്‌ കാരണമാകുന്നു; ഏജിറിന്‍, ആഗൈറ്റ്‌, അലൂമിനാരഹിതമായ സോഡിക്‌ ആംഫിബോള്‍ എന്നിവ ഇക്കൂട്ടത്തിൽ പ്രധാനപ്പെട്ടവയാണ്‌. ഇതിന്റെ അടിസ്ഥാനത്തിൽ മേല്‌പറഞ്ഞ ധാതുക്കള്‍ അവശ്യഘടകമായുള്ള ശിലകളെ ആൽക്കലിപ്പാറകളായി ഗണിക്കാം. ഈ ധാതുക്കള്‍ ഉരുത്തിരിയുന്നത്‌ ആൽക്കലിസ്വഭാവം ഉണ്ടാകുന്നതിനു നിദാനമാകുന്നു. ഉദാഹരണമായി ഗ്രാനൈറ്റ്‌ശിലകള്‍ ആൽക്കലിധാതുക്കളായ ഏജിറിന്‍, റീബക്കൈറ്റ്‌ തുടങ്ങിയവ പരിഗണനാർഹമായ അളവിൽ ഉള്‍ക്കൊണ്ടാൽ അവയെ ആൽക്കലി ഗ്രാനൈറ്റ്‌ എന്നു വിശേഷിപ്പിക്കാം; സയനൈറ്റ്‌ ശിലയിൽ പ്ലാജിയോക്ലേസ്‌ ഫെൽസ്‌പാർ പൂർണമായും ഇല്ലാതിരിക്കെ തത്‌സ്ഥാനത്ത്‌ ആൽക്കലി ഫെൽസ്‌പാർ ആണുള്ളതെങ്കിൽ ആ ഇനം ശിലയെ ആൽസയനൈറ്റ്‌ എന്നുപറയുന്നു. ബസാള്‍ട്ട്‌ ശിലകളിൽ പ്രത്യേകസാഹചര്യത്തിൽ നെഫിലിന്‍ അനാൽസൈറ്റ്‌, പൊട്ടാഷ്‌ ഫെൽസ്‌പാർ എന്നീ ആൽക്കലി ധാതുക്കള്‍ പ്രമുഖഘടകങ്ങളായി കാണപ്പെടാം; ഈയിനം ശിലകളാണ്‌ ആൽക്കലി ബസാള്‍ട്ട്‌.
ഭൂമുഖത്ത്‌ സാധാരണയായികാണുന്ന ഗ്രാനൈറ്റ്‌, ബസാള്‍ട്ട്‌, ഗാബ്രാ തുടങ്ങിയയിനം ശിലകളിൽ ആൽക്കലി ധാതുക്കള്‍ പ്രമുഖ ഘടകമായി കാണപ്പെടാറില്ല; പ്രായേണ വിരളവുമായിരിക്കും. ആൽക്കലിപ്പാറകളുടെ ഉത്‌പത്തിയെക്കുറിച്ചും വിതരണപരിമിതിയെക്കുറിച്ചുമുള്ള പഠനങ്ങള്‍ നടന്നുകൊണ്ടിരിക്കുന്നതേയുള്ളൂ. മാഗ്മയുടെ വിഘടനം പ്രത്യേക സാഹചര്യങ്ങളിലാകുമ്പോള്‍, അസാധാരണമായ രാസപ്രക്രിയകളിലൂടെ ആൽക്കലിപ്പാറകള്‍ ഉരുത്തിരിയാം. സാധാരണമാഗ്മയിൽ ചുച്ചാമ്പുകല്ല്‌ ലയിച്ചുചേരുന്നത്‌ ആൽക്കലിപ്പാറകളുടെ ഉദ്‌ഭവത്തിന്‌ നിദാനമാകാം. ഗന്ധകം, കാർബണ്‍ എന്നിവയുടെ ക്ലോറിന്‍യൗഗികങ്ങള്‍ കൂടിയതോതിൽ ലയിച്ചുചേർന്നിട്ടുള്ള ജലത്തിന്റെ സാന്നിധ്യത്തിൽ സാധാരണ ഗ്രാനൈറ്റ്‌ മാഗ്മയ്‌ക്ക്‌ ആന്തരികമായി സംഭവിക്കാവുന്ന ഘടകക്രമീകരണ പ്രക്രിയയുടെ പരിണതഫലമായാണ്‌ ആൽക്കലിപ്പാറകളുണ്ടാകുന്നതെന്ന്‌ ചിലർ കരുതുന്നു. ആർതർ ഹോംസിന്റെ അഭിപ്രായത്തിൽ പൊട്ടാസിയത്തിന്റെയും അലൂമിനിയത്തിന്റെയും അംശം കൂടുതലായിട്ടുള്ള ദ്രാവകങ്ങളുടെ താപമർദങ്ങളേറ്റ്‌ ആംശികദ്രവണത്തിനു വിധേയങ്ങളായ പഴക്കംചെന്ന ശിലാസമൂഹങ്ങളിൽനിന്നാണ്‌ ആൽക്കലിപ്പാറകളുണ്ടാകുന്നത്‌. ഒരു പൊതു മാഗ്മ-ആഗാര(magma chamber)ത്തിൽ നിന്നുമാണ്‌ എല്ലായിനം ആൽക്കലിപ്പാറകളും ഉദ്‌ഭൂതമായിട്ടുള്ളതെന്ന പഴയ നിഗമനം ശാസ്‌ത്രീയമായ വിശകലനത്തിലൂടെ നിരസിക്കപ്പെട്ടിരിക്കുന്നു. വ്യത്യസ്‌തസാഹചര്യങ്ങളിൽ വെണ്ണേറെ ചേർപ്പുകളുടെ ഫലമായി ഒരേ ദ്രാവകത്തിൽനിന്നുതന്നെ വ്യതിരിക്തസ്വഭാവമുള്ള ശിലാസമൂഹങ്ങള്‍ ഉണ്ടാകാവുന്നതാണെന്ന വാദത്തിന്‌ അംഗീകാരം കിട്ടിവരുന്നു (പി. രാധാകൃഷ്‌ണന്‍ നായർ)
